Navigation

Inhaltsbereich

Sessiun: 18.04.2011
Il resultat da l'onn da gestiun 2010 dal chantun Grischun è fitg allegraivel. Empè d'in deficit prognostitgà da 35 milliuns francs è vegnì realisà in plus da 109 milliuns francs.

Da quest retgav supplementar duai profitar l'entira populaziun grischuna ed er l'economia grischuna. En vista a las grondas discussiuns davart in provediment d'energia segir ed en vista al fatg ch'il chantun ha grondas resursas natiralas ed er bler know-how en il sectur da las energias regenerablas, duai vegnir creà in fond grischun d'energia en la dimensiun da 109 milliuns francs.

Or da quest fond duain – en collavuraziun cun l'economia e cun la perscrutaziun – vegnir promovidas investiziuns en energias regenerablas ed en tecnologias nettas (cleantech), ma er sustegnids mesiras, projects, investiziuns e servetschs en quest sectur.

Las sutsegnadras ed ils sutsegnaders incumbenseschan la regenza da transferir en quest senn il gudogn dal quint annual 2010 en in fond grischun d'energia e da relaschar las disposiziuns necessarias en chaussa.

Cuira, ils 18 d'avrigl 2011

Peyer, Baselgia-Brunner, Bucher-Brini, Frigg-Walt, Giacomelli, Jaag, Locher Benguerel, Müller (Tavau Plaz), Noi-Togni, Pult, Thöny, Trepp, Michel (Igis), Monigatti, Pedrini (Soazza)

Resposta da la regenza

L'incumbensa qua avant maun pretenda d'attribuir cumplettamain il surpli dal retgav dal quint dal chantun 2010 en la dimensiun da circa 109 milliuns francs ad in fond grischun d'energia che stuess vegnir creà da nov. Or da quest fond duain – en collavuraziun cun l'economia e cun la perscrutaziun – vegnir promovidas investiziuns en energias regenerablas ed en tecnologias nettas (cleantech), ma er sustegnids mesiras, projects, investiziuns e servetschs en quests secturs.

Er la regenza è da l'avis ch'i stoppia vegnir investì tant en la perscrutaziun sco er en l'applicaziun d'energias regenerablas e da tecnologias nettas. In'attenziun speziala sto er vegnir dada a l'effizienza energetica.

Gia oz vegnan furnidas prestaziuns considerablas en il sectur da la promoziun d'energias regenerablas e da tecnologias nettas. Tras l'indemnisaziun per cuvrir ils custs da la furniziun d'electricitad (ICF) vegni promovì la forza idraulica (fin 10 megawatts), la fotovoltaica, l'energia dal vent, la geotermia, la biomassa e ruments or da biomassa. Da l'autra vart sustegnan la confederaziun ed ils chantuns dapi l'onn 2010 sanaziuns d'edifizis cun il program da promoziun "Il program d'edifizis". Tras la nova lescha d'energia dal chantun Grischun (LEG; DG 820.200) è a medem temp la promoziun chantunala vegnida coordinada cun il program da promoziun naziunal. Cun il "masterplan svizzer da cleantech" ha il cussegl federal plinavant stgaffì in instrument per pudair rinforzar sistematicamain la forza innovativa da las interpresas en quest sectur. Cun il program EnergiaSvizra dispona la confederaziun la finala dapi l'onn 2001 d'in program per l'effizienza energetica e per energias regenerablas.

Sin l'entir mund sa chatta la politica d'energia danovamain en ina midada. Er en Svizra han ils eveniments a Fukushima dà in'ulteriura midada a las discussiuns d'energia concernent il provediment, il clima, l'economia e l'ambient. Il cussegl federal ha concludì ils 25 da matg 2011 da sortir pass per pass or da l'energia atomara. Quai cun serrar las ovras nuclearas existentas a la fin da lur durada da manaschi e cun betg pli remplazzar quellas tras novas ovras nuclearas. Per quest intent èsi – tenor il cussegl federal – necessari da renovar il sistem d'energia actual. En la strategia d'energia 2050 skizzescha el numerusas mesiras pussaivlas ch'i vala da discutar. Questas discussiuns vegnan a duvrar lur temp e probablamain a purtar numerusas mesiras supplementaras.

Las sfidas futuras en ils secturs da l'effizienza energetica, da las energias regenerablas e da cleantech ston vegnir prendidas per mauns en stretga collavuraziun da tut las persunas participadas ed en spezial vegnir coordinadas cun ils instruments e cun ils meds da promoziun gia existents. La creaziun d'in fond chantunal d'energia separà na serviss insumma betg a questa finamira da coordinaziun – il cuntrari. Or da las finanzas generalas dal chantun vegnissan creads meds finanzials spezials che cumplettassan durant in tschert temp limità las prestaziuns da promoziun budgetadas en moda ordinaria. En quest connex stuessan vegnir scleridas – ultra da dumondas giuridicas – er dumondas da cumpetenza (natira giuridica dal fond, cumpetenzas per il pajament al fond e per la prelevaziun or dal fond e chaussas sumegliantas). Fonds duessan dentant vegnir creads mo, sch'il chantun ha entradas ch'èn liadas a l'intent previs, per pudair ademplir las incumbensas fixadas. Cas cuntrari chaschunan ils fonds ch'ils meds finanzials svaneschan or dal preventiv ordinari, e quai cun tut las consequenzas negativas areguard la transparenza ed areguard l'effizienza. Ina regulaziun da l'utilisaziun dals meds finanzials confurm als basegns sur tut ils champs d'incumbensa dal chantun vegniss pia engrevgiada considerablamain. L'engaschi finanzial respectiv dal chantun per realisar la politica d'energia chantunala duai empè da quai avair lieu sco fin ussa sur il preventiv ordinari.

Per ils motivs menziunads refusa la regenza l'incumbensa.

8 da fanadur 2011