Cleantech è ina metoda economica che schanegia las resursas e ch'è pia persistenta. La branscha da cleantech cumpiglia tut ils purschiders da tecnologias e tut las prestaziuns en il sectur dal svilup, da la producziun e da l'utilisaziun da cleantech. Cleantech na sa definescha betg tras la dumonda "Tge vegn producì?", mabain tras las dumondas "Co vegni producì?" respectivamain "Per tge vegn il product duvrà?". En Svizra lavuran approximativamain 160'000 persunas en il sectur da cleantech. Quai correspunda a 4,5 pertschient da tut las persunas occupadas. Il potenzial da creschientscha vegn stimà sco fitg aut.
Oz è la Svizra anc posiziunada relativamain bain en il sectur da cleantech, ma l'ultim decenni ha ella pers in pau da sia impurtanza. Il "masterplan svizzer da cleantech" da la confederaziun localisescha perquai in tschert basegn d'agir. La concurrenza internaziunala è sa meglierada ils ultims onns ed ha per part surpassà cleramain la Svizra. Cun il "masterplan svizzer da cleantech", che sa drizza a la confederaziun, als chantuns, ad interpresas ed ad ulteriuras instituziuns, duai la Svizra puspè surpigliar ina rolla directiva.
En quest connex vegnan suttamessas las suandantas dumondas a la regenza:
1. Co giuditgescha la regenza il "masterplan svizzer da cleantech" e sias constataziuns principalas sco er en general l'impurtanza da cleantech per l'avegnir ecologic ed economic da noss pajais?
2. Tge rolla vesa la regenza per il chantun Grischun en connex cun cleantech sco er en connex cun sias schanzas e cun ses potenzials da svilup?
3. È la regenza pronta d'elavurar ina strategia grischuna da cleantech e da sustegnair spezialmain la branscha da cleantech en il senn d'ina promoziun economica sistematica?
4. È la regenza eventualmain pronta da reveder la lescha per il svilup economic er en quel senn che la finamira d'ina furmaziun da "clusters" sco tala en il sectur da cleantech vegn persequitada cun promover domiciliaziuns d'interpresas adattadas, la scolaziun da spezialistas e da spezialists, lur colliaziun sin plaun internaziunal sco er ulteriuras mesiras adattadas?
Cuira, ils 18 d'avrigl 2011
Pult, Thöny, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Müller (Tavau Plaz), Noi-Togni, Peyer, Trepp, Michel (Igis), Monigatti, Pedrini (Soazza)
Resposta da la regenza
Il "masterplan svizzer da cleantech" ha la finamira che la Svizra s'acquistia fin l'onn 2020 ina cumpetenza da cleantech dominanta sin l'entir mund. Quai premetta progress considerabels en il transfer da savida e da tecnologia. Quests progress ston purtar in meglier entretschament tranter la savida da las interpresas e da las scolas autas e vegnan ad esser in agid per rinforzar cleramain la cumpetitivitad en quest sectur. La finamira è quella da vegnir percepì sin plaun internaziunal sco lieu da producziun e d'export dominant per products da cleantech. En consequenza da quai vegnan a vegnir creadas plazzas da lavur persistentas e d'auta qualitad. Da vart dal chantun vegn il potenzial da creschientscha stimà sco aut en quest sectur.
Tar la dumonda 1: Las finamiras fixadas vegnan consideradas sco correctas, las mesiras e las recumandaziuns deducidas vegnan giuditgadas sco cunvegnentas. Cunzunt tras la discussiun actuala davart la sortida or da l'energia atomara vali da reglar il futur ecologic ed economic da noss pajais sco er la dumonda dal provediment d'energia. Pussaivladads cumpetitivas d'energias regenerablas ston vegnir promovidas ed acceleradas.
Tar la dumonda 2: La regenza è persvadida che l'utilisaziun da la forza idraulica e d'autras energias regenerablas ha ina gronda impurtanza entaifer la branscha da cleantech. Per ella ed er per las ulteriuras interpresas grischunas ch'èn activas en il sectur da cleantech stoi vegnir garantì cun mesiras adequatas ch'ellas chattian il contact cun la branscha da cleantech. Quai duai vegnir fatg cun agid d'in transfer sistematic da savida e da tecnologia. En las scolas spezialisadas superiuras ed en la scola auta spezialisada stoi plinavant vegnir creada ina savida tecnologica che po vegnir dada vinavant ad interpresas existentas tras purschidas adattadas da furmaziun supplementara e che po er avair in effect da sustegn per domiciliar novas interpresas.
Tar la dumonda 3: Il "masterplan svizzer da cleantech" ch'è vegnì elavurà porscha er il rom strategic per il Grischun. L'elavuraziun d'ina strategia grischuna da cleantech n'è perquai betg necessaria. La regenza è pronta da sustegnair projects dal sectur da la branscha da cleantech, sche quels èn cumpatibels cun la basa da la lescha per il svilup economic (LSE; DG 932.100). Perquai ch'ils martgads da vendita da quests projects innovativs sa chattan per l'ina ordaifer il chantun e perquai che quests projects stgaffeschan per l'autra plazzas da lavur, è in sustegn pussaivel.
Tar la dumonda 4: En il rom da la revisiun da la LSE è la regenza pronta da resguardar en ina furma adequata il svilup da furmaziuns da "clusters", als quals er ils sectur da cleantech appartegna. Plinavant è la lescha davart las scolas autas ed ils instituts da perscrutaziun en consultaziun fin ils 30 da settember 2011. Questa lescha generala porscha la pussaivladad da metter accents da perscrutaziun tematics cun agid d'incaricas da prestaziun e da contribuziuns globalas. Igl è previs da promover studis che s'orienteschan a la tecnologia, uschia ch'igl è er pussaivel d'integrar la branscha da cleantech. En quest connex stoi vegnir examinà, cun tge instituts ch'i pudessan vegnir stgaffidas plivalurs supplementaras per l'economia regiunala, las qualas han eventualmain er in effect positiv per il sectur da cleantech. En il sectur da la nova politica regiunala lavura il chantun vi d'in project che prevesa il transfer da savida e da tecnologia (TST) sco er in meglier entretschament tranter ils differents consorzis da TST e las raits tecnologicas.
La furmaziun da "clusters" ed il rinforzament da la branscha da cleantech dependan principalmain da l'engaschi da las interpresas che sa mettan en per il svilup dals potenzials en differents secturs en il senn d'ina strategia communabla.
1. da fanadur 2011