Incumbensa da la cumissiun per sanadad e fatgs socials (CSF) concernent il detretschament da las incumbensas e da las finanzas en la tgira da persunas malsaunas
Sessiun: 14.06.2011
Ils ultims onns è la lescha per promover la tgira da persunas malsaunas (DG 506.000) vegnida suttamessa a differentas revisiuns parzialas. A chaschun da la sessiun d'avust 2010 ha il cussegl grond deliberà la revisiun parziala da la finanziaziun da la tgira ed en la sessiun da zercladur 2011 vegn discutada la revisiun parziala da la finanziaziun dals ospitals. Tuttas duas revisiuns èn daventadas necessarias pervia da midadas dal dretg surordinà e chaschunan custs supplementars considerabels per il chantun e per las vischnancas. La regenza argumentescha che quests custs supplementars stoppian vegnir repartids uschia che la grevezza restia constanta per il chantun e per las vischnancas – quai sin basa d'ina clav da pertschients plitost casuala. Casuala è la clav, perquai ch'ella vegn eruida sin fundament d'ina situaziun mumentana da las structuras dals custs e perquai che la stimaziun dals custs che furma la basa per quai sa mussa mintgamai sco pli u main correcta. En quest connex stoi vegnir constatà che la stimaziun dals custs è propi difficila, perquai ch'i ston vegnir stimads tant las malsegirezzas natiralas sco il svilup da la quantitad e dal pretsch sco er ils effects da midadas da sistem. Questa situaziun chaschuna chapaivlamain discussiuns e concurrenzas tranter il chantun e las vischnancas areguard la repartiziun dals custs. La finanziaziun communabla dals ospitals e da las instituziuns da tgira chaschuna ultra da quai blera lavur administrativa e gronds custs per ils furniturs da prestaziuns, numnadamain per il chantun e per las vischnancas.
La cumissiun per sanadad e fatgs socials incumbensescha la regenza d'examinar detagliadamain il sistem actual da la finanziaziun dals ospitals e da la tgira e da far uschè svelt sco pussaivel in rapport en chaussa. En spezial duain vegnir examinadas las regulaziuns da las ordinaziuns concludidas da la regenza che chatschan ad aut ils custs e che na dattan a las vischnancas nagin spazi d'agir per limitar ils custs che resultan en connex cun la finanziaziun dals ospitals e cun la finanziaziun da la tgira. Ultra da quai vegn la regenza incumbensada da rapportar, sut tge premissas e cun tge consequenzas ch'ina finanziaziun dals ospitals sulettamain tras il chantun ed ina finanziaziun da la tgira unicamain tras las vischnancas pudess vegnir realisada en il futur, sche las instituziuns responsablas restan las medemas.
Cuira, ils 14 da zercladur 2011
Casanova-Maron, Candinas, Trepp, Augustin, Gunzinger, Hardegger, Holzinger-Loretz, Kleis-Kümin, Niggli-Mathis (Grüsch), Noi-Togni, Troncana-Sauer
Resposta da la regenza
Ils ultims onns è la lescha per promover la tgira da persunas malsaunas (DG 506.000) vegnida suttamessa a differentas revisiuns parzialas. En spezial las midadas da la finanziaziun da la tgira respectivamain da la finanziaziun dals ospitals ch'il cussegl grond ha concludì en la sessiun d'avust 2010 ed en la sessiun da zercladur 2011 chaschunan sin fundament da las prescripziuns da la LAMal grevezzas supplementaras considerablas per il maun public. La repartiziun dals custs supplementars sin il chantun e sin las vischnancas tenor la clav vertenta proponida da la regenza en las duas revisiuns parzialas ha il cussegl grond midà en omadus cas a favur da las vischnancas. Cuntrari a la regenza, che vuleva cuntinuar cun las clavs da repartiziun existentas per las contribuziuns dal maun public tranter las vischnancas ed il chantun, ha il cussegl grond decidì tuttas duas giadas d'adossar la gronda part dals custs supplementars al chantun. En il cas da la finanziaziun dals ospitals resulta da la clav da repartiziun concludida dal cussegl grond schizunt ina distgargia considerabla per las vischnancas en cumparegliaziun cun las expensas ch'ellas han gì fin oz.
Tenor las regulaziuns che vegnan menziunadas en l'incumbensa n'han las vischnancas nagina libertad d'agir per influenzar ils custs che resultan tar la realisaziun da la finanziaziun dals ospitals e da la tgira. Questas regulaziuns sin il stgalim d'ina ordinaziun sa restrenschan dentant a prescripziuns fatgas envers las chasas da tgira ed envers ils servetschs da la spitex. Las directivas areguard las plazzas da scolaziun che ston vegnir messas a disposiziun èn necessarias per garantir ch'i saja avant maun avunda persunal qualifitgà per furnir las prestaziuns ch'i basegna. Las prescripziuns èn vegnidas elavuradas en stretga collavuraziun cun las instituziuns e cun las federaziuns pertutgadas e valan da princip sco prescripziuns minimalas. Las directivas qualitativas e quantitativas concernent l'effectiv da persunal èn necessarias per garantir ina qualitad da la tgira ed ina assistenza adequata. En il cas singul è l'uffizi da sanadad cumpetent da divergiar da questas prescripziuns.
L'examinaziun detagliada dal sistem actual da la finanziaziun dals ospitals e da la tgira che vegn pretendida cun l'incumbensa po vegnir fatga il pli baud suenter ch'igl èn avant maun las datas dals emprims 2 onns suenter l'introducziun da las novas regulaziuns da finanziaziun. Enconuschientschas ch'èn cumprovadas suffizientamain davart las consequenzas da las novas regulaziuns da finanziaziun resultan pir sin basa da 2 onns da gestiun. Pir lura pon vegnir mussadas en moda fidada las consequenzas – en il senn da l'incumbensa – d'ina finanziaziun dals ospitals sulettamain tras il chantun e d'ina finanziaziun da las chasas da tgira e da la spitex unicamain tras las vischnancas, mantegnend las medemas instituziuns responsablas.
La regenza è pronta d'acceptar questa incumbensa.
12 da fanadur 2011