Navigation

Inhaltsbereich

Sessiun: 01.09.2011
L'ultim temp s'augmentan las novitads davart l'applicaziun da greva violenza en il spazi public, tant a l'exteriur sco er deplorablamain en Svizra. Differentas giadas èn persunas vegnidas attatgadas cun violenza da delinquents singuls u da gruppas e vegnidas blessadas per part grevamain u schizunt mortalmain. Er davant il Grischun na sa ferma betg questa tendenza da violenza absurda e brachiala. Suenter cas sumegliants en il passà è vegnì pitgà in um l'ultima giada ils 31 da fanadur 2011 da cler bel di a la staziun da Cuira talmain ch'el ha stuì vegnir manà a l'ospital. Schebain che l'areal vegn surveglià d'ina camera da la polizia, n'han ils delinquents betg pudì vegnir identifitgads. Quai, perquai che la lescha da polizia da la citad da Cuira na permetta betg la registraziun dals maletgs da la surveglianza tras video, e quai er betg per l'intent da sclerir acts chastiabels. Quests fatgs na vegnan betg chapids d'ina gronda part da la populaziun e promovan malcuntentientscha. L'ultim temp han las votantas ed ils votants svizzers adina puspè exprimì che la giustia stoppia esser pli consequenta envers las delinquentas ed envers ils delinquents. Pervia da quai dattan las sutsegnadras ed ils sutsegnaders a la regenza la suandanta incarica:

La lescha da polizia dal chantun Grischun sto vegnir examinada e, sche necessari, adattada uschia ch'ella porscha ina basa legala suffizienta per il chantun e per las vischnancas per far valair la segirezza publica e per tegnair quint dal sentiment da segirezza da la populaziun. En spezial sto la surveglianza dal spazi public vegnir legitimada, sche quai fa da basegn. Las datas registradas ston pudair vegnir arcunadas per in tschert temp per pudair duvrar ellas per identifitgar delinquentas e delinquents ubain per sclerir malfatgs.

Cuira, il 1. da settember 2011

Felix, Marti, Caduff, Aebli, Albertin, Bezzola (Zernez), Blumenthal, Brandenburger, Buchli-Mannhart, Burkhardt, Campell, Candinas, Casty, Casutt, Cavegn, Clalüna, Conrad, Darms-Landolt, Dosch, Dudli, Engler, Fontana, Furrer-Cabalzar, Geisseler, Giacomelli, Grass, Gunzinger, Hardegger, Hartmann (Champfèr), Hartmann (Cuira), Hitz-Rusch, Holzinger-Loretz, Jeker, Joos, Kleis-Kümin, Koch (Tumein), Kollegger (Cuira), Kollegger (Malix), Komminoth-Elmer, Krättli-Lori, Kunz (Fläsch), Kunz (Cuira), Lorez-Meuli, Mani-Heldstab, Michael (Donat), Michael (Castasegna), Montalta, Niggli (Samedan), Niggli-Mathis (Grüsch), Papa, Parolini, Pedrini, Steck-Rauch, Stiffler (Tavau Plaz), Stiffler (Cuira), Tomaschett (Breil), Tomaschett-Berther (Trun), Troncana-Sauer, Tscholl, Valär, Vetsch (Claustra Vitg), Waidacher, Wieland, Zanetti, Bricalli, Largiadèr, Müller (Haldenstein), Patt, Rodigari, Schucan, Wolf

Resposta da la regenza

Displaschaivlamain datti adina dapli communicaziuns en las medias davart ina prontezza pli frequenta da duvrar violenza e davart in augment da l'applicaziun da violenza en il spazi public er en Svizra, en spezial en aglomeraziuns grondas. Per fortuna na constatescha la polizia chantunala dal Grischun actualmain betg in augment da delicts da violenza en la publicitad. En cas da l'incident sin la staziun da Cuira dals 31 da fanadur 2011 che vegn menziunà en l'incumbensa sa tracti d'in cas singul che ha ultra da quai pudì vegnir sclerì da la polizia chantunala. Mo sin basa da questa situaziun na fissi pervia da quai betg necessari d'agir directamain e da reveder la basa legala davart la surveglianza tras video. Tuttina mussa quest incident ch'i n'è betg fitg raschunaivel da survegliar il spazi public cun cameras da video senza registrar ed arcunar e – sch'igl è vegnì commess in act chastiabel – d'evaluar pli tard las registraziuns per las pudair duvrar per ina persecuziun penala.

En cas da la surveglianza tras video sa tracti – tenor l'opiniun giuridica unanima – d'ina greva intervenziun en la sfera privata. En ina societad libra han las burgaisas ed ils burgais il dretg da sa muventar en la publicitad en moda libra, nunobservada e nuncontrollada. Applitgond questa concepziun giuridica è la basa giuridica vertenta pervia da quai formulada en moda restrictiva ed ella na prevesa betg il med d'ina surveglianza generala tras video. Ina tala mesira poliziala surpassass il champ d'applicaziun da l'art. 22 al. 3 da la lescha da polizia dal chantun Grischun (DG 613.000), tenor il qual registraziuns da video èn pussaivlas, sch'igl exista in privel concret ch'in act chastiabel pudess vegnir commess.

La surveglianza tras video n'è senza dubi betg il med universal per limitar la criminalitad. Ella po esser – applitgada en moda preventiva sco er repressiva – l'instrument gist per proteger in tschert bain giuridic e per impedir u per sclerir acts chastiabels.

Per che la pussaivladad giuridica saja avant maun per survegliar il spazi public sut tschertas circumstanzas cun meds tecnics e per ch'il med da la surveglianza tras video stettia a disposiziun sto la lescha da polizia vegnir adattada correspundentamain. En quest connex sto vegnir observà il princip da la proporziunalitad ed i ston vegnir definidas cleras reglas per registrar, per arcunar, per evaluar e per stizzar las registraziuns da video.

La regenza è pronta d'adattar correspundentamain la lescha da polizia e propona al cussegl grond d'acceptar l'incumbensa.

19 d'october 2011