Navigation

Inhaltsbereich

Sessiun: 01.09.2011
Sch'ins entra oz en in areal da scola, vegnan ins en la gronda part dals cas rendì attent cun tavlas ch'ins sa chatta en ina zona, en la quala i na dastga betg vegnir fimà. Malgrà l'instrucziun da prevenziun en nossa scola populara mussan statisticas però ch'il consum da nicotin tar ils giuvenils crescha puspè.

En il Grischun s'engascha la pro aere GR dapi ils onns 1980 per las nunfimadras e per ils nunfimaders sco er per las fimadras passivas e per ils fimaders passivs. Dapi l'onn 1998 metta la pro aere GR a disposiziun contracts da nunfimader per giuvenils dal 7. fin al 9. onn da scola. Sch'il contract è vegnì ademplì durant in onn, ha la cassa da la classa survegnì 30.– francs per giuvenil.

L'onn da scola passà han 112 classas da 19 vischnancas suttascrit in contract da nunfimader cun 1541 giuvenils. En quest connex sa tracti da las suandantas vischnancas da scola: Cazas, Churwalden, Cuira, Domat, Favugn, Glion, Grüsch, Lai, Landquart, Mustér, Pasqual, Rueun, Scuol, Sedrun, Sumvitg, Trimmis, Tusaun, Valendau e Zizers.

Quest project è vegnì finanzià en emprima lingia da la dieschma d'alcohol dal chantun. Per in terz da las contribuziuns ha la pro aere GR fatg ina dumonda a la vischnanca respectiva, dus terzs èn vegnids pajads da la contribuziun chantunala menziunada. La contribuziun chantunala ha importà 30'000 francs. Avant dus onns è ella vegnida reducida a 10'000 francs.

Il zercladur 2011 ha la pro aere GR stuì communitgar a las vischnancas da scola pertutgadas ch'il chantun na vegnia – sin proposta da l'uffizi dal servetsch social chantunal – a pajar pli naginas contribuziuns ad ellas! In project cun success sto vegnir terminà, perquai ch'il sustegn finanzial dal chantun na vegn betg pli cuntinuà. E quai, schebain ch'ils ultims 14 onns han 8972 giuvenils suttascrit ed ademplì in contract da nunfimader! En spezial en ils ultims quatter onns èn quests contracts vegnids appreziads adina pli fitg, malgrà la remuneraziun plitgunsch modesta da "mo" 30.– francs per contract. Degn da vegnir menziunà en noss egls è er il fatg che la Lia pulmunara GR lantscha in project cun il titel "In emprendissadi senza fimar", quai ch'è fitg bainvis. Il problem dal fimar na cumenza dentant betg pir en l'emprendissadi, mabain en la scola populara. Per quest motiv èsi tant pli impurtant da render attent als privels gia sin il stgalim superiur. I project da la Lia pulmunara GR pudess ins pia designar sco project successur.

I tuna gia quasi sco ina sgnocca d'avrigl che pro aere GR stoppia vegnir dissolvida l'onn da la prevenziun e l'onn europeic da la lavur voluntara.

Las sutsegnadras ed ils sutsegnaders pretendan da la regenza ch'ella sustegnia vinavant la pro aere GR cun 30'000 francs, per ch'in project raschunaivel e cun success possia exister vinavant. La prevenziun è anc adina la medischina la pli favuraivla!

Cuira, il 1. da settember 2011

Furrer-Cabalzar, Dermont, Locher Benguerel, Albertin, Augustin, Baselgia-Brunner, Berther (Camischolas), Blumenthal, Bondolfi, Bucher-Brini, Casty, Casutt-Derungs, Clalüna, Darms-Landolt, Engler, Frigg-Walt, Gartmann-Albin, Gasser, Geisseler, Giacomelli, Gunzinger, Hitz-Rusch, Holzinger-Loretz, Joos, Kappeler, Krättli-Lori, Kunz (Fläsch), Kunz (Cuira), Märchy-Caduff, Meyer-Grass, Michel, Müller (Tavau Plaz), Niggli (Samedan), Noi-Togni, Papa, Pedrini, Peyer, Pfenninger, Pult, Rathgeb, Steck-Rauch, Tenchio, Thöny, Tomaschett-Berther (Trun), Trepp, Troncana-Sauer, Waidacher, Wieland, Zweifel-Disch, Monigatti, Patt, Schucan

Resposta da la regenza

Las sutsegnadras ed ils sutsegnaders pretendan da la regenza da sustegnair pro aere GR vinavant cun ina contribuziun annuala da 30'000.– francs. Sch'il cussegl grond accepta questa incumbensa, intervegn el directamain en ina cumpetenza che sa chatta, en il senn da la separaziun da las pussanzas tranter l'executiva e la legislativa, en ils mauns da la regenza.

Conclus da credit prenda il cussegl grond da princip en il rom dal preventiv. Tenor l'avis da la regenza n'èsi betg raschunaivel da pregiuditgar conclus concernent il preventiv cun agid d'ina incumbensa. En cas dal fond per intents d'utilitad publica e per cumbatter l'abus da meds enivrants, or dal qual la contribuziun a la pro aere GR è vegnida finanziada, sa tracti dal rest d'in uschenumnà stget fond che vegn alimentà da meds finanzials liads ad in intent. Expensas d'in stget fond na ston betg vegnir suttamessas ad in conclus da credit. Ultra da quai è la cumpetenza da disponer e d'administrar fonds, legats e fundaziuns chaussa da la regenza. La cumpetenza per distribuir meds d'utilitad publica or dal retgav net da l'administraziun federala d'alcohol (dieschma d'alcohol) e dal retgav net da la taxaziun dal commerzi en detagl da bavrondas destilladas (taxas da patenta d'alcohol) è er chaussa da la regenza, gist uschia sco da dumandar contribuziuns or da la Fundaziun dr. Stephan à Porta.

En il rom da las disposiziuns da la lescha da sanadad sustegna il chantun differents projects che promovan la sanadad e che vegnan realisads da l'uffizi da sanadad u dal ZEPRA Grischun per incumbensa dal chantun. Er autras organisaziuns s'engaschan – senza meds finanzialas dal chantun – en la prevenziun cunter il fimar. Cun classas da scola fa la pro aere GR contracts da nunfimader che valan in onn da scola. Sco recumpensaziun d'avair ademplì il contract survegnan ils giuvenils ina contribuziun finanziala che sto vegnir duvrada per in'occurrenza da la classa. La finamira da pro aere GR è quella d'extender pass per pass sia purschida en classas dals stgalims superiurs, senza concretisar co ch'il project duai vegnir realisà a vista mesauna e co che la finanziaziun, ch'è previsa pervia da l'extensiun intenziunada, duai vegnir reglada. En il quint annual 2009 disponiva la pro aere GR d'agens meds finanzials che surpassan cleramain ina svieuta annuala. Analisas qualifitgadas da l'effect da la metoda da prevenziun ch'è vegnida tschernida da la pro aere na datti betg.

En la sessiun da favrer 2007 ha il cussegl grond tractà il rapport da famiglia dal chantun Grischun. En quest connex ha el discutà e concludì differentas mesiras. En cas da las purschidas da cussegliaziun per famiglias ha il cussegl grond incumbensà la regenza d'examinar las purschidas da cussegliaziun existentas e da finanziar eventualas purschidas novas cun las resursas existentas. Questa incumbensa dal cussegl grond ha incità la regenza d'examinar e d'optimar sia pratica concernent il pajament da meds d'utilitad publica. Sa basond sin questas prescripziuns èn vegnidas stritgadas differentas contribuziuns ad organisaziuns, tranter auter er quella a la pro aere GR.

Or da ponderaziuns da princip en quai che concerna l'intervenziun parlamentara sco er pervia da las cumpetenzas fixadas dal dretg da finanzas e dal dretg spezial n'è la regenza betg pronta da realisar las pretensiuns en la moda che vegn pretendida en l'incumbensa. Ella propona al cussegl grond da refusar l'incumbensa concernent in sustegn finanzial a la pro aere GR tras il chantun. La regenza è però pronta d'examinar ina nova dumonda da la pro aere GR, sche las persunas responsablas da l'organisaziun preschentan il svilup da la purschida da prevenziun ch'è planisà per il futur sco er ina confinanziaziun decisiva da las vischnancas pertutgadas ed examineschan ina coordinaziun cun autras purschidas da prevenziun che persequiteschan finamiras cumparegliablas.

28 d'october 2011