La Svizra ha ina lescha detagliada davart la lavada da daners suspectus. Tgi che vuless pajar summas pli grondas sin contos svizzers, sto far indicaziuns detagliadas davart la derivanza dals daners. Uschia ha la plazza da finanzas svizra pudì vegnir liberada per gronda part da daners illegals. La lescha davart la lavada da daners suspectus ha dentant laschà avert ina largia. Tar l'acquist d'immobiglias n'è ella betg applitgabla.
Tenor l'avis da l'uffizi federal da polizia fedpol (rapport annual 2010) è il sectur d'immobiglias spezialmain sensibel en quai che reguarda la lavada da daners. Quai cunzunt, perquai che pajaments en daner blut sajan anc adina usitads en quest sectur. Er il cussegl federal na contesta betg ch'i saja avant maun in potenzial d'abus tar acquists d'immobiglias che vegnan reglads sur pajaments en daner blut u sur bancas estras.
Tenor experts po p.ex. il fatg, ch'ils pretschs d'immobiglias explodeschan, esser in indizi per lavadas da daners. Cunzunt ils territoris cun in'attracziun internaziunala e cun fitg bleras persunas estras ritgas èn spezialmain periclitads.
Perquai vegnan fatgas las suandantas dumondas a la regenza:
1. Co giuditgescha la regenza il privel da la lavada da daners tras il commerzi d'immobiglias sin terren chantunal?
2. Datti en il chantun Grischun territoris che vegnan considerads da la regenza sco spezialmain periclitads?
3. Èn gia vegnids registrads en il chantun Grischun incidents e/u cas da suspect en questa chaussa?
4. È la regenza pronta da s'engaschar tar la confederaziun, per ch'il commerzi d'immobiglias vegnia suttamess a la lescha davart la lavada da daners suspectus?
Cuira, il 1. da settember 2011
Müller (Tavau Plaz), Pult, Baselgia-Brunner, Bucher-Brini, Burkhardt, Cavegn, Frigg-Walt, Gartmann-Albin, Gasser, Jaag, Kappeler, Kollegger (Cuira), Locher Benguerel, Meyer-Grass, Michel, Noi-Togni, Peyer, Pfenninger, Stiffler (Cuira), Thöny, Trepp, Troncana-Sauer, Monigatti
Resposta da la regenza
Dapi l'onn 2005 s'occupan il cussegl federal ed il parlament federal adina puspè cun la problematica d'ina eventuala lavada da daners en il commerzi d'immobiglias. L'onn 2005 è la proposta dal cussegl federal da subordinar expressivamain activitads dal commerzi d'immobiglias a la lescha davart la lavada da daners suspectus (LLDS), vegnida refusada cleramain en la consultaziun. A las federaziuns da las branschas èsi gartegià da mussar ch'il commerzi d'immobiglias en Svizra haja gia prescripziuns suffizientas. En spezial s'effectuescha la disposiziun dal cudesch penal davart il cumbat cunter la lavada da daners (art. 305bis CP). Pertutgà è mintgin (pia betg mo intermediaturs da finanzas) che commetta in act ch'è adattà per impedir d'eruir l'origin, da chattar u da confiscar valurs da facultad che, sco ch'el sa u sto supponer, derivan d'in crim. En la debatta davart la revisiun dal project l'onn 2008 è il parlament federal alura stà da l'avis ch'i na saja betg necessari d'extender il champ d'applicaziun da la LLDS sin agents d'immobiglias. Las intervenziuns parlamentaras ch'èn vegnidas inoltradas sin quai (11.3711 interpellaziun Pirmin Schwander, Commerzi d'immobiglias e lavada da daners dals 17-6-2011; 11.3119 moziun Anita Thanei, Extensiun dal champ d'applicaziun da la LLDS dals 16-3-2011; 10.4061 postulat Brigit Wyss, Revisiun da la LLDS dals 16-12-2010; 10.4048 interpellaziun Carlo Sommaruga, Lavada da daners en il sectur d'immobiglias. Extensiun dal champ d'applicaziun da la LLDS? dals 16-12-2010; 10.5545 ura da dumondas Brigit Wyss, Commerzi d'immobiglias e lavada da daners dals 13-12-2010) ha il cussegl federal respundì regularmain en quel senn ch'in abus sistematic dal sectur d'immobiglias svizzer per lavar daners na saja betg vesaivel. In potenzial d'abus na possia dentant betg vegnir exclus, en spezial en cas d'immobiglias che vegnan cumpradas e pajadas ordaifer il champ d'applicaziun da la LLDS, p.ex. sur bancas estras u tras pajaments en daner blut, senza ch'in intermediatur da finanzas ch'è suttamessas a la LLDS saja pertutgà. Il cussegl federal persequiteschia attentamain il svilup en il sectur d'immobiglias sco er il svilup internaziunal dal cumbat cunter la lavada da daners en quest sectur e vegnia a proponer mesiras adattadas, sch'il privel d'abus sa conferma.
1. Sco il cussegl federal è er la regenza da l'avis ch'i na dettia nagins indizis che laschian concluder ch'il sectur d'immobiglias vegnia malduvrà sistematicamain per lavar daners.
2. Territoris u lieus periclitads pudessan esser lieus turistics renumads cun ina structura da giasts esters e cun in viv commerzi d'immobiglias. Il ferm svilup dals pretschs dastgass dentant plitost star en connex cun la purschida stgarsa en cumparegliaziun cun il giavisch da giasts esters bainstants da posseder objects da prestige. Sco periclitadas dastgassan ultra da quai er valair regiuns, nua ch'i n'exista betg in martgà d'immobiglias per propi e nua ch'ils vendiders tschertgan desperadamain cumpraders. I n'èn dentant avant maun nagins indizis da periclitaziuns u d'abus concrets en il senn da la LLDS. Ultra da quai vegnan las transacziuns fatgas en la gronda part dals cas sur bancas svizras, ch'èn suttamessas sco instituts da finanzas a la LLDS.
3. Fin ussa n'èn vegnids registrads nagins cas da suspect.
4. Il tema è preschent dapi onns sin plaun federal ed il rapport annual 2010 da l'uffizi federal da polizia (fedpol) vegn ultra da quai a gidar a sensibilisar per questa tematica. Perquai ch'il chantun Grischun n'ha nagins cas da suspect, na datti per la regenza er nagins motivs d'intervegnir supplementarmain tar la confederaziun.
14 d'october 2011