Sin plaun federal vegnan fatgas stentas per abolir l'imposiziun da taglia sin la valur da l'atgna locaziun.
Per il cas che l'imposiziun da taglia sin la valur da l'atgna locaziun vegniss abolida:
- Cun tge perditas puncto abitaziuns secundaras stuessan far quint il chantun e las vischnancas?
- Tge models resp. tge regulaziuns prevesa la regenza per il chantun Grischun per cumpensar las perditas correspundentas areguard l'imposiziun da taglia sin la valur da l'atgna locaziun tar abitaziuns secundaras, sch'il dretg surordinà (particularmain la constituziun e la legislaziun federala) la concedissan ina tala libertad?
Cuira, il 1. da settember 2011
Tenchio, Nick, Albertin, Augustin, Berther (Mustér), Berther (Camischolas), Bezzola (Zernez), Blumenthal, Bondolfi, Brandenburger, Buchli-Mannhart, Burkhardt, Caduff, Caluori, Campell, Casanova-Maron, Casutt, Casutt-Derungs, Cavegn, Claus, Clavadetscher, Conrad, Davaz, Della Vedova, Dermont, Dosch, Engler, Florin-Caluori, Fontana, Gasser, Geisseler, Giacomelli, Hartmann (Champfèr), Heiz, Holzinger-Loretz, Jenny, Joos, Kappeler, Kleis-Kümin, Koch (Igis), Kollegger (Malix), Krättli-Lori, Kunz (Fläsch), Kunz (Cuira), Märchy-Caduff, Marti, Meyer-Grass, Michael (Castasegna), Michel, Niggli (Samedan), Parolini, Parpan, Pfäffli, Righetti, Sax, Stiffler (Tavau Plaz), Stiffler (Cuira), Tomaschett-Berther (Trun), Troncana-Sauer, Valär, Vetsch (Claustra Vitg), Waidacher, Wieland, Zanetti, Müller (Haldenstein), Patt, Rodigari, Schucan, Wolf
Resposta da la regenza
La dumonda cumpiglia duas tematicas, per l'ina las perditas causa mancanza da l'imposiziun da taglia sin la valur da l'atgna locaziun tar abitaziuns secundaras e per l'autra alternativas per ina imposiziun da las abitaziuns secundaras suenter ina eventuala aboliziun da la valur da l'atgna locaziun.
L'aboliziun da la valur da l'atgna locaziun tar las abitaziuns secundaras chaschuna perditas da taglia da circa 18,6 milliuns francs en il chantun. En cumparegliaziun cun las taglias sin las entradas durant l'onn da gestiun 2009 da circa 340 milliuns francs stuessi pia vegnir fatg quint cun ina perdita da circa 5,5 % da la taglia sin las entradas. Per las vischnancas e per las baselgias fiss la perdita en tut circa tuttina gronda sco per il chantun. Percunter pudessan las perditas procentualas variar fermamain tranter las vischnancas. Per la vischnanca da Laax cun in effectiv fitg aut d'abitaziuns secundaras crudassan davent passa 20 % da las taglias sin las entradas.
Alternativas per l'imposiziun da la valur da l'atgna locaziun sin abitaziuns secundaras ch'ins perdess eventualmain na datti betg il mument. La taglia sin abitaziuns secundaras ch'è centrala en las ponderaziuns actualas, q.v.d. ina taglia sin immobiglias che vegn incassada sin la valur fiscala d'abitaziuns secundaras è vegnida giuditgada sco ristgada, en quai che concerna il dretg constituziunal, en in'expertisa ch'è vegnida incumbensada da la confederaziun. Per schliar il problem ha la cumissiun per economia e taxas dal cussegl dals chantuns inoltrà ina iniziativa da cumissiun che duai crear ina basa constituziunala per la taglia sin abitaziuns secundaras (fatschenta nr. 11.401: taglia reala sin las immobiglias secundaras). Il mument è la fatschenta sistida perquai ch'i n'è betg cler, sch'il parlament vegn ad acceptar l'aboliziun da la valur da l'atgna locaziun.
Sco alternativa ha il cussegl federal proponì ina uschenumnada taglia che vegn attribuida als custs, cun la quala ils custs, dals quals las possessuras ed ils possessurs d'abitaziuns secundaras profitan principalmain, pon vegnir surdads a quels. Ultra dals gronds custs administrativs (cumprova dals custs correspundents en mintga vischnanca) pledan er las entradas memia pitschnas cunter quest sistem. La taglia sin abitaziuns secundaras che vegn proponida dal forum economic e che sa preschenta en la furma d'ina taxa directiva stuess vegnir approfundada resguardond sia constituziunalitad. Per quest intent sto vegnir spetgà en spezial il giudicament tras las instanzas giudizialas concernent la taglia sin abitaziuns secundaras da Silvaplauna. Autras propostas – sco midar la sterzada interchantunala da taglia cun repartir ils facturs fiscals tranter il chantun da domicil ed il chantun da l'abitaziun secundara u sco midar la NGF da la confederaziun – n'èn betg chaussa dal chantun, èn vegnidas resguardadas fin oz sco pauc empermettentas e n'èn betg vegnidas approfundadas.
02 da november 2011