Tenor l'art. 38 da la nova lescha da finanzas dal chantun Grischun (nLFC) vegnan 22 fin 27 pertschient da la part chantunala dals daners da la lottaria naziunala attribuids a la finanziaziun speziala "sport". Dals meds finanzials restants van mintgamai almain dus tschintgavels a la promoziun da la cultura sco er a la protecziun da la natira e da la patria. Pertge ch'il sport survegn tenor questa lescha damain meds finanzials or dals daners da la lottaria naziunala, n'è betg chapaivel en vista a l'impurtanza dal sport en la societad. Questa discussiun han la cumissiun e la regenza laschà davent sapientivamain en il rom da la revisiun totala da la lescha da finanzas; perquai sto la discussiun vegnir manada ussa.
Las sutsegnadras ed ils sutsegnaders incumbenseschan perquai la regenza da suttametter al cussegl grond ina revisiun da l'art. 38 nLFC, tenor la quala i pon vegnir attribuids al sport almain uschè blers meds finanzials sco als secturs da la cultura e da la protecziun da la natira e da la patria.
Cuira, ils 19 d'october 2011
Kunz (Cuira), Michael (Donat), Cavegn, Aebli, Albertin, Barandun, Berther (Camischolas), Bezzola (Zernez), Branden-burger, Bucher-Brini, Buchli-Mannhart (Stussavgia Plaz), Caluori, Campell, Casanova-Maron, Casty, Casutt, Casutt-Derungs, Clalüna, Davaz, Dosch, Engler, Felix, Fontana, Geisseler, Giacomelli, Grass, Gunzinger, Hartmann (Champfèr), Heiz, Hitz-Rusch, Holzinger-Loretz, Jeker, Jenny, Kappeler, Kasper, Koch (Tumein), Koch (Igis), Kunz (Fläsch), Marti, Meyer-Grass, Michel (Tavau Monstein), Montalta, Nick, Niggli (Samedan), Niggli-Mathis (Grüsch), Papa, Parolini, Pedrini, Perl, Pfäffli, Rathgeb, Rosa, Sax, Steck-Rauch, Stiffler (Tavau Plaz), Stiffler (Cuira), Troncana-Sauer, Tscholl, Valär, Vetsch (Pragg-Jenaz), Waidacher, Wieland, Zanetti, Zweifel-Disch, Calonder, Cortesi, Grünenfelder Hunger, Haltiner, Liesch, Patt
Resposta da la regenza
Dapi il cumenzament da l'onn 2004 survegnan ils chantuns las parts dals retgavs nets da la Swisslos tras ina suletta contribuziun. Quai suenter la fusiun da la lottaria interchantunala, da l'associaziun da lottaria SEVA e da la societad da sport-toto a l'interpresa "Swisslos". Dapi lura vegn la quota da gudogn repartida entaifer il chantun sin il fond da la lottaria naziunala e sin il fond da sport, e quai tenor ina clav procentuala. Avant l'onn 2003 èn en media 19,5 pertschient dals retgavs totals ids durant 10 onns a favur da la promoziun dal sport. En ina soluziun transitorica, che ha valì fin a l'entrada en vigur da la revisiun da la lescha davart las finanzas dal chantun Grischun, ha la regenza fixà da nov la procentuala a favur dal fond da sport a 22 pertschient per l'onn 2004. En la lescha davart las finanzas dal chantun Grischun dals 18 da zercladur 2004 eri vegnì fixà da metter a disposiziun al fond da sport 22 fin 27 pertschient da la quota chantunala vi dal gudogn net da la lottaria interchantunala. En la sessiun d'avust 2005 ha il cussegl grond fixà questa quota – en il rom dal spazi d'agir – a 27 pertschient ed ha mess en vigur quest conclus per l'onn 2006.
Il spazi d'agir legal da 22 fin 27 pertschient da la quota chantunala vi dal gudogn net da la lottaria interchantunala a favur dal fond da sport è alura vegnì surpiglià senza midadas en l'art. 15 al. 1 da la revisiun da la lescha davart las finanzas e davart la surveglianza da las finanzas dal chantun Grischun dals 30 d'avust 2007 (LFSF; DG 710.100) ch'è actualmain anc en vigur. Ils meds finanzials da 73 pertschient che restan suenter la deducziun da la quota dal fond da sport vegnan attribuids a la finanziaziun speziala "Lottaria naziunala". Almain dus tschintgavels stattan alura mintgamai a disposiziun per la promoziun da la cultura sco er per la protecziun da la natira e da la patria (art. 15 al. 2 LFSF). Davart il tschintgavel restant decida la regenza.
L'attribuziun da la quota da gudogn als secturs "cultura" e "protecziun da la natira e da la patria" duai vegnir explitgada a maun dal preventiv 2012. Quel parta d'ina quota da totalmain 11'000'000 francs vi dal gudogn net da la lottaria naziunala (rubricas 4271 e 4273). Da quels daners vegnan 27 pertschient, pia 2'970'000 francs, attribuids al fond da sport (rubrica 4273). Ils 73 pertschient restants, pia 8'030'000 francs, vegnan attribuids a la finanziaziun speziala "Lottaria naziunala" (rubrica 4271) per la promoziun da la cultura, per la protecziun da la natira e da la patria sco er per contribuziuns dal champ da cumpetenza da la regenza. La quota da la regenza importa in tschintgavel da quests 73 pertschient, pia 1'600'000 francs.
A chaschun da la revisiun totala da la LFSF, ch'il cussegl grond ha deliberà ils 19 d'october 2011, èn las cumpetenzas da decisiun vertentas sco er la pratica da reparter ils meds finanzials vegnidas formuladas en moda pli transparenta (art. 38 da la nova lescha da finanzas dal chantun Grischun [lescha da finanzas, nLFC]), e sin basa da la giurisdicziun dal tribunal federal concernent la pussaivladad da far in referendum cunter contribuziuns dal fond da sport (sentenzia 1C_493/2009) èn ellas vegnidas messas sin ina meglra basa giuridica che fin qua.
Pervia da la gronda impurtanza sociala tant dal sport sco er dals secturs "cultura" e "protecziun da la natira e da la patria" è la regenza da l'avis ch'i saja giustifitgà da reparter en l'avegnir en moda pli equilibrada la quota chantunala vi dal gudogn net da la lottaria interchantunala. Ina repartiziun da mintgamai 30 pertschient para dad esser cunvegnenta e gista. Uschia restass in import reducì da 10 pertschient (fin ussa 14,6 pertschient), davart il qual la regenza pudess vinavant disponer libramain. Sin basa da las explicaziuns qua survart è la regenza pronta d'examinar ina revisiun da l'art. 38 nLFC. Ella propona al cussegl grond d'acceptar l'incumbensa en il senn da sias explicaziuns.
11 da schaner 2012