Dumonda Pult concernent la rolla dal chantun en connex cun ils svilups enturn l'hotel Therme a Val S. Pieder
Sessiun: 15.02.2012
La publicitad interessada ha pudì persequitar ils ultims mais tras las medias, co ch'igl è vegnì cumbattì per l'avegnir da l'hotel Therme a Val S. Pieder, in hotel che appartegna a la vischnanca da Val S. Pieder. Ussa duai la populaziun da Val S. Pieder decider en ina radunanza communala, tgenina da las offertas da modernisaziun e da renovaziun fatgas per la Therme che duai vegnir acceptada. Independentamain da questa decisiun autonoma e democratica da la vischnanca da Val S. Pieder sa tschentan intginas dumondas areguard ils andaments ed ils eveniments dals ultims mais ch'èn vegnids enconuschents ed areguard la rolla che differents posts chantunals han gì en quest connex.
Tenor differents rapports en las medias ha l'uffizi per economia e turissem (UET) giugà ina rolla impurtanta tar la tschertga d'investiders resp. da cumpraders per la Therme a Val S. Pieder resp. tar la planisaziun da la finanziaziun da las novas investiziuns. Ed er l'uffizi da vischnancas (UV) duai esser stà involvì gia baud en la chaussa «Therme a Val S. Pieder». Ma gist da quests rapports en las medias resultan dentant – en spezial en il cas da l'UET – differents puntgs da vista dals andaments e da las intenziuns da l'uffizi. Per quest motiv supplitgain nus la regenza da respunder las suandantas dumondas:
1. Tge rollas avevan ed han l'UET e l'UV tar la finanziaziun d'investiziuns en l'hotel Therme a Val S. Pieder resp. tar l'intenziun da la vischnanca da vender questa interpresa?
2. Cura (data) èn l'UET e l'UV vegnids activs per l'emprima giada e tgenins èn stads ils motivs per quai?
3. Tge participaziuns ha l'UET empermess a la finanziaziun? Cun tge cundiziuns èn questas participaziuns vegnidas colliadas?
4. È la regenza collectiva gia sa fatschentada fin ussa cun ils plans d'investiziun e da vendita da la Therme a Val S. Pieder ed ha ella eventualmain prendì conclus en chaussa?
Cuira, ils 15 da favrer 2012
Pult, Peyer
Resposta da la regenza
1. Il chantun promova il svilup economic en ses territori cun la finamira da segirar las plazzas da lavur existentas e da crear novas. Igl è ina da las incumbensas fundamentalas da l'uffizi per economia e turissem (UET) da s'inscuntrar – sco post da servetsch cumpetent – cun investiders pussaivels. En quest connex infurmescha il UET gia en in stadi da project tempriv, sche ed en tge dimensiun ch'igl existan pussaivladads da promoziun tenor la lescha per promover il svilup economic en il chantun Grischun (lescha per il svilup economic, LSE; DG 932.100). Per incumbensa da la regenza e dal departament cumpetent surveglia l'uffizi da vischnancas (UV) las finanzas da las vischnancas (cf. art. 67 da la constituziun chantunala [CC; DG 110.100] ed art. 97 da la lescha da vischnancas [LV; DG 175.050]).
2. Il cumenzament da la stad 2010 han gì lieu – sin dumonda dal biro da cussegliaziun da la STOFFELpart – emprims contacts areguard il giudicament da la situaziun, areguard las pussaivladads da promoziun ed areguard l'ulteriur proceder. L'avust 2010 han represchentants dal cussegl d'administraziun da la Hotel e bogn termal Val S. Pieder SA (Hoteba SA) e cussegliaders da la STOFFELpart infurmà il UET davart la situaziun da la Therme a Val S. Pieder. Questa sesida ha gì la finamira d'eruir soluziuns per segirar la cuntinuaziun da l'interpresa e da chattar sin basa da quai eventualas pussaivladads da sustegn da vart dal chantun. La stad 2011 han il UET sco er la vischnanca da Val S. Pieder confruntà il UV cun la dumonda, tge consequenzas ch'ina vendita da la Hoteba SA haja per las finanzas communalas. Il UV ha beneventà las intenziuns da vendita, menziunond ch'i duessan vegnir contractadas cundiziuns uschè avantagiusas sco pussaivel per la vischnanca. En in mail dals 19 da december 2011 a la vischnanca da Val S. Pieder ha il UV repetì la tenuta davart las consequenzas finanzialas suttamessas: Ord vista da la surveglianza da las vischnancas saja quai da beneventar, sche la vischnanca vegnia relaschada or da la "responsabladad" per la Hoteba SA. Ina recumandaziun per in tschert cumprader potenzial n'ha il UV betg fatg.
3. Tenor la LSE po il chantun conceder contribuziuns u emprests a projects da manaschis d'alloschament, sch'i sa tracta da projects impurtants per l'economia regiunala e sch'ils projects gidan decisivamain a garantir ina purschida turistica cumpetitiva en la regiun. Sin basa dals documents da project ch'eran avant maun quella giada e sin fundament d'in giudicament da la societad svizra da credit d'hotel (SCH) è il UET partì dal fatg ch'ina contribuziun à fonds perdu da 2 milliuns francs ed in emprest chantunal da 2 milliuns francs a la Hoteba SA sajan pussaivels. In'eventuala promoziun po vegnir examinada vinavant sut la premissa ch'i saja avant maun in concept general inclusiv ina glista detagliada dals custs, in plan da fatschenta ed ina planisaziun da termins actuala sco er ina decisiun davart la prestaziun da promoziun da la SCH.
4. La regenza è vegnida infurmada a bucca davart las intenziuns da la Hoteba SA. Fin ussa n'èn vegnids prendids nagins conclus. In'eventuala garanzia da contribuziun da vart dal chantun vegn dada pir, cur ch'ils gremis cumpetents – en quest cas la vischnanca da Val S. Pieder – han inoltrà da lur vart ina dumonda actualisada correspundentamain.
26 d'avrigl 2012