Il maun public, en quest cas il chantun, surdat a l'economia privata incaricas per studis, per examinaziuns da realisabladad, per analisas, per documents da basa e per chaussas sumegliantas. Plinavant vegnan apparentamain er impundids meds fiscals per referats u per «sparrings». Incumbensà savens cun talas incaricas vegn il biro Hanser e partenaris da Turitg. Quest biro procura er la gestiun dal forum economic dal Grischun, che vegn finanzià principalmain dal chantun Grischun. Tenor l'atgna glista da referenzas ha il biro Hanser e partenaris survegnì ils ultims onns almain las suandantas incaricas per il chantun Grischun:
Cussegl grond
- referat en la cumissiun predeliberanta davart il tema «liberalisaziun dal martgà d'electricitad» (1998)
Regenza
- controlla dal success da la promoziun chantunala da l'economia e direcziuns da las activitads politicas economicas futuras (1986)
Departament da construcziun, traffic e selvicultura
- plazza aviatica Engiadina a Samedan, argumentari concernent ils effects economics regiunals sco er accumpagnament dal project (2011)
Departament da l'intern e da l'economia publica
- concept per in institut per relaziuns economicas internaziunalas (1989)
- impurtanza da las scolas autas spezialisadas per l'economia publica dal chantun Grischun (1999)
Uffizi per la furmaziun professiunala
- examinaziun d'eventuals concepts d'organisaziun per las scolas professiunalas (2006)
Uffizi d'agricultura e da geoinfurmaziun
- evaluaziun dals potenzials dal martgà e da la politica chantunala da promoziun da l'economia da nutriment en il chantun Grischun (a partir da 2009)
- referat «Problematica da l'elavuraziun dal latg da silo» (2010)
Uffizi per las scolas medias
- analisa davart l'avegnir dal gimnasi inferiur ord vista economica (2003)
Uffizi per il svilup dal territori
- expertisa davart il tractament dal turissem en la planisaziun directiva chantunala (1999)
- instrumentari e concepts per la politica d'abitaziuns secundaras (2008)
Uffizi per la furmaziun terziara
- mussavia e coaching per analisar l'impurtanza da las scolas spezialisadas superiuras per l'economia publica (2005)
Uffizi per economia e turissem
- sustegn per il svilup da «structuras cumpetitivas e repartiziun da las incumbensas en il turissem grischun» (2006)
- program da realisaziun per la nova politica regiunala per la perioda 2008 – 2011 (2007)
- partenari da «sparring» en dumondas dal svilup da la politica d'abitaziuns secundaras (2008)
- sustegn per la concepziun e per l'introducziun d'ina taxa turistica chantunala (TTC) (2008)
- basas per giuditgar la rentabilitad da projects da vitgs da vacanzas (2010)
- examinaziun da realisabladad per utilisaziuns turisticas en regiuns cun pauc potenzial en il Grischun: abitaziuns e stallas nunutilisadas (2010)
- mussavia per vischnancas, per autoritads e per promoturs per domiciliar vitgs da vacanzas ed hotels en destinaziuns turisticas alpinas (2010)
- program da realisaziun 2012 – 2015 per la nova politica regiunala chantunala (2010)
- svilup da l'economia locala dal Grischun (2010)
- projects da pilot per la politica communala d'abitaziuns secundaras (2010)
- tschertga d'investiders per la resgia a Domat (2011)
En quest connex tschentan las sutsegnadras ed ils sutsegnaders las suandantas dumondas a la regenza:
1. En tge dimensiun finanziala surdat il chantun annualmain lavurs en il senn qua survart?
2. Tge part ha il biro Hanser e partenaris survegnì da quai ils ultims onns?
3. Quant gronda è la quota da lavurs ch'èn vegnidas surdadas entaifer il chantun ed ordaifer il chantun?
4. Tenor tge criteris vegnan tschernids ils posts incaricads?
5. Tge fa la regenza per ch'i na resultian naginas preferenzas unilateralas e per ch'i dettia er vinavant ina tscherta concurrenza tranter ils posts incaricads potenzials?
6. Co giuditgescha la regenza l'idea che la surdada da talas incaricas stuess vegnir publitgada uffizialmain?
Cuira, ils 19 da mars 2012
Peyer, Pult, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Müller (Tavau Plaz), Noi-Togni, Thöny, Trepp, Deplazes, Hensel, Monigatti
Resposta da la regenza
1. Ils ultims quatter onns ha il chantun surdà en media lavurs per circa 14 milliuns francs ad onn sut il titel "prestaziuns da servetsch da terzas persunas". Cumpigliadas èn qua las incaricas en il senn pli vast da la dumonda. Il volumen d'incaricas per mandats da cussegliaziun na sa lascha betg deducir da la statistica da surdada. En cumparegliaziun cun l'entir volumen da prestaziuns da servetsch dastgass quel dentant giugar ina rolla sutordinada. Lunschor la gronda part va a quint da las prestaziuns da servetsch en il sectur da construcziun (en spezial servetschs d'inschigneria e d'architectura).
2. Il biro Hanser e partenaris SA ha survegnì tranter l'onn 2007 e l'onn 2011 incaricas per circa 400 000 francs ad onn. Quai correspunda ad ina quota da circa 2,8 pertschient dal volumen d'incaricas menziunà. Quest biro è ina da pliras interpresas che ha survegnì incaricas da cussegliaziun da l'administraziun chantunala. In'accumulaziun marcanta da surdadas d'incaricas a questa firma po vegnir constatada sulettamain tar l'uffizi per economia e turissem. Da princip stoi vegnir remartgà ch'il circul da firmas da cussegliaziun cun qualificaziuns suffizientas, ch'èn ablas d'elavurar las incumbensas en la qualitad pretendida, è relativamain pitschen e restrenschì en il Grischun.
3. La quota da lavurs ch'èn vegnidas surdadas entaifer il chantun ha importà circa 60 pertschient durant quest temp. Ils ulteriurs 40 pertschient èn vegnids surdads a mandataris ordaifer il chantun Grischun.
4. En cas da prestaziuns da servetsch ha la qualificaziun qualitativa da l'offerent – sco l'experientscha da la firma e dal persunal engaschà, las referenzas, l'organisaziun resp. l'execuziun dal project, il concept u l'analisa da l'incarica – per il solit l'emprima prioritad. Il pretsch gioga ina rolla impurtanta, ma per il solit betg decisiva. Tenor la giurisdicziun constanta da la dretgira administrativa po il pretsch avair ina impurtanza sutordinada en cas d'incaricas pli cumplexas. Quai cuntrari ad incaricas pli simplas, nua ch'il pretsch sto vegnir valità cun almain 50 pertschient tenor las maximas da la dretgira administrativa.
5. I po vegnir constatà ch'ils posts d'acquisiziun chantunals observan la legislaziun da submissiun e ch'els tegnan quint – en il rom da lur surdadas – da las finamiras principalas dal dretg d'acquisiziun, sco l'utilisaziun economica dals meds finanzials publics, la promoziun da la concurrenza, il tractament egual dals offerents, la garanzia da la transparenza e la protecziun giuridica. Al medem resultat è er arrivada in'examinaziun che la controlla da finanzas ha fatg l'onn passà. Sin basa da questa pratica da surdada etablida na vesa la regenza nagins motivs per mesiras supplementaras, sco il relasch da directivas e da chaussas sumegliantas. La dependenza da firmas singulas (uschenumnads "furniturs da la curt") duai vegnir evitada, ed i duai vegnir procurà per ina concurrenza suffizienta.
6. Las incaricas ston vegnir surdadas tenor la procedura previsa da la lescha sin basa da la valur stimada da l'incarica. Per las prestaziuns da servetsch vul quai dir che incaricas cun ina valur totala da main che 100 000 francs ston vegnir acquistadas da princip en ina procedura directa, incaricas da 100 000 fin 250 000 francs en il rom d'ina procedura d'invit e pir a partir da passa 250 000 francs en il rom d'ina procedura averta cun ina publicaziun en il fegl uffizial. Cun far diever da questas limitas minimalas legalas vegni tegnì quint il meglier pussaivel dals interess da l'economia publica indigena. Per evitar custs administrativs supplementars e per cuntanscher ina tscherta libertad d'agir n'è la publicaziun uffiziala voluntara da tut las incaricas betg recumandabla.
29 da zercladur 2012