Incumbensa da la fracziun da la PS concernent l'elavuraziun d'ina strategia chantunala per il turissem
Sessiun: 19.03.2012
Il turissem è la branscha economica la pli impurtanta dal Grischun. Cleramain dapli che la mesadad da la part dals exports da l'economia publica dal Grischun vegn generada en il turissem. Ma dapi onns sa chatta el – cumpareglià cun la concurrenza en Svizra ed a l'exteriur – en in trend negativ.
Per franar quest trend negativ e per profitar dals potenzials creschents dal turissem internaziunal è vegnida iniziada l'onn 2006 la refurma dal turissem grischun. La structura da las destinaziuns è vegnida modernisada ed igl èn vegnidas realisadas mesiras accumpagnantas per augmentar la qualitad.
Il cussegl grond ha deliberà l'onn 2006 in credit d'impegn da 18 milliuns francs per realisar la refurma dal turissem. La confederaziun ha sustegnì questa refurma da las structuras supplementarmain cun 2 milliuns francs. Ultra da quai ha il chantun investì il decenni tranter ils onns 2000 e 2010 passa 83 milliuns francs en infrastructuras turisticas, en projects turistics ed en l'organisaziun da Grischun vacanzas. Cun la lescha davart las taxas turisticas (LTT) duai ussa vegnir garantida ina finanziaziun persistenta dal svilup turistic e dal marketing turistic intermanaschial.
Il medem mument è la dumonda sa sminuida ils ultims mais pervia dal svilup economic en Europa e pervia dal ferm franc svizzer, quai che ha chaschunà ina reducziun gravanta da la conjunctura en il turissem grischun.
Ultra da quai ha l'acceptanza da l'iniziativa cunter las abitaziuns secundaras ils 11 da mars 2012 midà substanzialmain las cundiziuns generalas per il svilup dal turissem grischun. Independentamain da la realisaziun legala da quest verdict dal pievel svizzer cun bleras dumondas che ston anc vegnir scleridas na vegni uschia strusch ad esser pussaivel en l'avegnir da finanziar (en moda traversala) purschidas ed infrastructuras turisticas sur la construcziun d'abitaziuns secundaras. L'orientaziun dal turissem grischun sto midar sia strategia en il sectur da l'alloschament: smetter cun la construcziun d'abitaziuns secundaras e sa volver ad ina modernisaziun ed ad ina meglra occupaziun da las capacitads existentas sco er ad ina promoziun pli ferma da l'hotellaria. Uschè blers letgs fraids sco pussaivel ston vegnir transferids en letgs chauds.
En quest senn vegn la regenza incumbensada d'elavurar ina strategia chantunala cumplessiva per il turissem e da suttametter al cussegl grond in rapport correspundent. En quest connex duain en spezial er vegnir mussadas – entaifer las novas cundiziuns da basa – novas vias per ina politica d'alloschament persistenta e per concepts da finanziaziun intelligents per l'hotellaria e per las infrastructuras turisticas.
Cuira, ils 19 da mars 2012
Pult, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Müller (Tavau Plaz), Noi-Togni, Peyer, Thöny, Trepp, Deplazes, Hensel, Monigatti
Resposta da la regenza
La promoziun dal turissem è – en vista a sia gronda impurtanza per l'economia publica dal Grischun – ina incumbensa impurtanta dal chantun. Qua na sa tracti betg primarmain da promover finanzialmain tscherts projects, mabain oravant tut da meglierar en general las cundiziuns generalas. Sco menziunà en l'incumbensa da fracziun, ha il chantun fatg grondas stentas ils ultims onns per rinforzar il turissem en il Grischun.
Ina mesira centrala en quest connex è il project da refurma "Structuras cumpetitivas e repartiziun da las incumbensas en il turissem grischun" (2006 – 2013). Ultra da la creaziun da destinaziuns cuntegna questa refurma ina retscha da mesiras accumpagnantas che duain er gidar a rinforzar il sistem turistic general. Plinavant è vegnida adattada l'incumbensa a Grischun vacanzas en il senn da la refurma dal turissem grischun, e l'engaschament chantunal en il rom da la campagna da marca "Enavant Grischun" è vegnì augmentà. Cun promover occurrenzas da sport ed infrastructuras turisticas, per part er sur il program chantunal per realisar la nova politica regiunala da la confederaziun (NPR), han pudì vegnir tschentads accents impurtants en la politica regiunala. In ulteriur element impurtant è la nova concepziun da la finanziaziun dal turissem.
Tut las mesiras chantunalas da realisaziun e tut las activitads sa basan sin concepts da detagl resp. sin documents da basa che na pon dentant betg vegnir cumpilads en in'unica strategia turistica chantunala, perquai che las pretensiuns dals giasts e dals purschiders turistics demussan grondas differenzas regiunalas.
Ultra da quai stoi vegnir resguardà ch'il posiziunament e la direcziun turistica da singulas regiuns e destinaziuns turisticas na duain betg vegnir fixads da vart dal chantun. Igl è ina dumonda da la responsabladad da las vischnancas e da las organisaziuns turisticas da s'accordar ad ina strategia turistica cuminaivla e da realisar quella en atgna responsabladad. Quest princip è er francà en la nova lescha davart las taxas turisticas (LTT) ch'il cussegl grond ha deliberà la sessiun d'avrigl 2012.
L'uffizi per economia e turissem fa actualmain lavurs preparatoricas per in project da refurma cuntinuant per ils onns 2014 – 2020 ch'è concepì aposta per las sfidas futuras e che ha la clera finamira da rinforzar anc pli ferm il sistem turistic general dal Grischun. Per ils potenzials turistics dal Grischun èn avant maun differentas basas che duain vegnir resguardadas en il project da refurma "Sistem general dal Grischun 2020" menziunà. En il rom da la candidatura planisada per ils gieus olimpics d'enviern en il Grischun 2022 duai – sco part dal process da persistenza e d'innovaziun – vegnir elavurà e discutà il tema d'in avegnir en las muntognas economicamain fritgaivel, ecologicamain responsabel e socialmain supportabel.
En quest senn è la regenza pronta d'acceptar l'incumbensa da fracziun e da preschentar al cussegl grond in rapport davart ils potenzials turistics chantunals.
28 da zercladur 2012