L'assicuranza d'edifizis dal Grischun (GVG) fa prescripziuns areguard l'effectiv, l'equipament e la scolaziun dals pumpiers. Questas prescripziuns sa drizzan tenor l'incumbensa respectivamain tenor la grevezza sco er tenor las prescripziuns da la coordinaziun svizra dals pumpiers (CSP).
L'art. 40 da la lescha davart la protecziun preventiva cunter incendis ed ils fatgs da pumpiers en il chantun Grischun (lescha davart la protecziun cunter incendis) regla las contribuziuns als pumpiers. La GVG sa participescha vi da las investiziuns adequatas dals pumpiers grischuns, las qualas correspundan als basegns e las qualas vegnan fatgas a favur da locals per utensils, da material, d'alarm e da vehichels sco er a favur dals custs per la scolaziun e per la furmaziun supplementara dal cader da pumpiers.
Sin basa da las prescripziuns da la lescha davart la protecziun cunter incendis ha la GVG elavurà in nov regulativ da contribuziun, resguardond il document fundamental svizzer «Pumpiers 2015». Quest regulativ è vegnì mess en vigur per il 1. da schaner 2011. Sa basond sin ils art. 2 e 32 da la lescha davart la protecziun cunter incendis sco er sin ils art. 13 ss. da l'ordinaziun tar la lescha davart la protecziun cunter incendis relascha la GVG prescripziuns cleras e liantas davart la dumonda, co che las organisaziuns da pumpiers ston da nov esser equipadas.
Questas prescripziuns vegnan repassadas respectivamain adattadas onn per onn e stattan ussa en ina disproporziun cun la pratica da contribuziun e cun las subvenziuns concedidas da la GVG.
En spezial vala quai per l'acquisiziun da vehichels da pumpiers. Subvenziunads vegnan tant vehichels novs sco er vehichels d'occasiun. Independentamain dal fatg, sch'ils vehichels èn novs u duvrads, vegnan els subvenziunads cun ina contribuziun fundamentala da 20% dal pretsch da cumpra. Il pretsch d'in vehichel nov po sa differenziar per plirs 10'000 francs dal pretsch d'in vehichel d'occasiun.
En ils vitgs ston ils pumpiers cumprar – per motivs finanzials – vehichels d'occasiun. En consequenza da quai è la contribuziun da subvenziun da la GVG pliras giadas pli pitschna. Enconuschentamain han vehichels d'occasiun custs da reparatura e da mantegniment pli gronds che vehichels novs. Il mantegniment e las reparaturas da vehichels e d'apparats na vegnan betg subvenziunads. A las vischnancas, sco organisaziuns executivas dals pumpiers, vegnan uschia adossads custs supplementars, cumbain ch'ellas han distgargià considerablamain la GVG tras la cumpra d'in vehichel d'occasiun.
Er per ils vehichels dal cumbat cunter donns, che las basas dal chantun dovran tenor la cunvegna da prestaziun per pudair ademplir lur incumbensas, exista questa pratica da contribuziun insuffizienta. Vitiers vegn ch'ils custs da la scolaziun da basa per questas incumbensas chantunalas ston vegnir surpigliads da las vischnancas (curs da basa).
Sin fundament dals fatgs menziunads supplitgeschan las sutsegnadras ed ils sutsegnaders la regenza da respunder las suandantas dumondas:
1. Tgi ha la cumpetenza da fixar las tariffas da contribuziun?
2. En tge proporziun finanziala pajan auters chantuns da la Svizra orientala contribuziuns a lur pumpiers en ils vitgs ed a lur pumpiers da las basas?
3. È er la regenza da l'opiniun ch'ils custs per il mantegniment e per la reparatura da vehichels da pumpiers, da maschinas e da l'equipament general duessan vegnir subvenziunads?
4. È la regenza – sin fundament da la buna situaziun finanziala da la GVG – da l'avis ch'i saja giustifitgà da distgargiar las vischnancas cun laschar surpigliar la GVG l'indemnisaziun da diarias (analogamain als curs da cader) per ils curs da basa 1 e 2 sco er per ils curs da basa en il sectur da la dustanza d'ieli e dal salvament sin via?
Samignun, ils 13 da zercladur 2012
Tomaschett (Breil), Parolini, Hartmann (Cuira), Albertin, Berther (Camischolas), Bezzola (Zernez), Blumenthal, Bondolfi, Brandenburger, Burkhardt, Caduff, Caluori, Casty, Casutt, Casutt-Derungs, Cavegn, Clavadetscher, Conrad, Darms-Landolt, Dermont, Dosch, Engler, Fallet, Foffa, Frigg-Walt, Gartmann-Albin, Giacomelli, Grass, Gunzinger, Hartmann (Champfèr), Hitz-Rusch, Holzinger-Loretz, Jaag, Jenny, Kasper, Kleis-Kümin, Koch (Tumein), Koch (Igis), Kollegger (Cuira), Kollegger (Malix), Komminoth-Elmer, Kunz (Fläsch), Lorez-Meuli, Märchy-Caduff, Meyer-Grass, Michael (Donat), Michael (Castasegna), Michel (Tavau Monstein), Nick, Niederer, Noi-Togni, Papa, Parpan, Pedrini, Peyer, Pfenninger, Righetti, Rosa, Sax, Stiffler (Cuira), Tenchio, Tomaschett-Berther (Trun), Wieland, Zanetti, Berther (Segnas), Degonda
Resposta da la regenza
En las explicaziuns introductivas da la dumonda vegni menziunà ch'ils pumpiers en ils vitgs cumprian (u stoppian cumprar) vehichels d'occasiun, ch'els survegnian correspundentamain ina contribuziun pli pitschna da l'assicuranza d'edifizis dal Grischun (GVG) e ch'els na survegnian naginas contribuziuns da la GVG per ils custs da reparatura e da mantegniment ch'èn pli auts en consequenza da la cumpra d'ina occasiun. En il rom da las explicaziuns generalas vegni plinavant crititgà ch'ils custs per ademplir incumbensas chantunalas (basas) vegnian adossads a las vischnancas (custs per curs da basa, mantegniment e reparaturas da vehichels per il cumbat cunter donns).
En cumparegliaziun cun vehichels novs pon vehichels d'occasiun propi chaschunar custs da reparatura e da mantegniment pli auts a las vischnancas. En il giudicament general (custs da chapital / amortisaziuns / reparatura e mantegniment) na constat quai dentant betg. Praticamain senza excepziun chaschunan vehichels d'occasiun tendenzialmain custs totals pli pitschens a las vischnancas che vehichels novs. Perquai na vesa la regenza nagins motivs d'applitgar differentas tariffas da contribuziun per la cumpra da vehichels novs e da vehichels d'occasiun. L'indemnisaziun per manar ina basa da pumpiers vegn reglada da la GVG cun las vischnancas respectivas en ina cunvegna da prestaziun. Indemnisads vegnan ils custs supplementars inclusiv ils custs da scolaziun per ademplir questa incumbensa chantunala. La pretensiun ch'ils custs da la scolaziun da basa per las incumbensas chantunalas stoppian vegnir surpigliads da las vischnancas n'è correspundentamain betg correcta.
En quest connex renda la regenza attent che la grevezza finanziala da las vischnancas per lur pumpiers è sa reducida cleramain ils ultims onns. Partind dals pumpiers communals èn vegnids installads pumpiers da basa per differentas incumbensas (salvament sin via/en tunnels, dustanza d'ieli / da chemia, donns elementars, incendis da guaud), e quai cun spustar correspundentamain ils custs da las vischnancas al chantun. Plinavant èn las vischnancas vegnidas motivadas da la GVG d'ademplir las incumbensas sin plaun regiunal. Tras la concentraziun dals pumpiers ha il dumber d'organisaziuns da pumpiers pudì vegnir reducì da 232 a var 70 unitads ed il dumber da pumpiers da 12'000 a 4'800 persunas. Uschia pon las incumbensas da las vischnancas vegnir furnidas en moda bler pli favuraivla che sch'ellas stuessan vegnir liquidadas d'ina vischnanca suletta.
Sin fundament da questa situaziun da partenza respunda la regenza las dumondas tschentadas sco suonda:
1. Tenor l'art. 39 (40) da la lescha davart la protecziun cunter incendis fixescha la regenza las tariffas da contribuziun.
2. Ils chantuns da la Svizra orientala pajan las suandantas contribuziuns als pumpiers en lur vitgs:
Sco cumplettaziun a questa tabella stoi vegnir menziunà che la GVG paja – en cumparegliaziun cun la gronda part dals auters chantuns – contribuziuns extraordinariamain autas als provediments d'aua da las vischnancas.
3. Na. La finanziaziun dals custs da mantegniment e da reparatura è ina incumbensa communala. In subvenziunament dals custs da mantegniment e da reparatura tras la GVG cuntradi al detretschament da las incumbensas e da las finanzas prendì en mira tranter il chantun e las vischnancas. Per che la GVG possia subvenziunar ils custs da mantegniment e da reparatura da las vischnancas, fissi dal rest necessari da reveder la lescha davart la protecziun cunter incendis. La lescha davart la protecziun cunter incendis prevesa mo contribuziuns d'investiziun.
4. Na. Sche la GVG surpigliass l'indemnisaziun da diarias en dumonda, resultass in augment da las premias da l'assicuranza d'edifizis. Per pudair extender las contribuziuns a diarias da la GVG sin tut ils curs stuess dal rest vegnir revedida la lescha davart la protecziun cunter incendis. La lescha davart la protecziun cunter incendis prevesa mo contribuziuns a curs da scolaziun e da furmaziun supplementara dal cader e da las forzas spezialisadas. Cun l'indemnisaziun pauschala annuala per ils pumpiers da basa paja la GVG oz indirectamain contribuziuns a la scolaziun da basa dals pumpiers da basa en ils secturs dustanza d'ieli e salvament sin via. La GVG surpiglia tut ils custs per la realisaziun dals curs da basa (instructuras ed instructurs, material da curs ed alimentaziun).
5 da settember 2012