Dapi l'entrada en vigur da la taxa sin il traffic pesant dependenta da la prestaziun (TTPDP) pon ins observar pli e pli savens che transports professiunals vegnan fatgs cun vehichels agriculs (tractors cun chars annexs). Quests transports vegnan per part exequids da purs, ma er d'interpresas da mastergn che s'acquistan ils vehichels correspundents. Uschia po d'ina vart vegnir guntgida la TTPDP, ma da l'autra vart er ina part da las prescripziuns per camiuns. Ultra d'ina distorsiun da concurrenza chaschuna quai er disturbis pli e pli gronds dal traffic sin ils straduns.
Igl è tuttavia chapaivel che purs tschertgan entradas da gudogn supplementaras. En quest connex stoi dentant vegnir resguardà ch'ils purs survegnan contribuziuns da gestiun considerablas ed er auters sustegns dal maun public, entant che l'ulteriur mastergn n'ha nagin access a quests subsidis.
Er sche la branscha da construcziun ha actualmain pli che avunda lavur, quai che chaschuna er in boom tar las interpresas da transport, vegn la concurrenza agricula ad esser dira, ina giada ch'il boom da construcziun tschessa.
Er il stadi perda entradas considerablas. Taxas che vegnan notabene duvradas per l'utilisaziun da l'infrastructura pon uschia vegnir guntgidas. Qua tras vegn utilisada l'infrastructura che stuess en sasez vegnir pajada da las utilisadras e dals utilisaders tras taglias e tras taxas.
En quest connex supplitgain nus la regenza da respunder las suandantas dumondas:
1. È er la regenza da l'opiniun che las leschas da traffic vegnian nizzegiadas ora tras ils transports cun tractors e cun chars annexs, per survegnir avantatgs envers la concurrenza?
2. Sche gea: Vesa la regenza pussaivladads per cumbatter cunter questa distorsiun dal martgà?
3. Quant gronda è la differenza da la taglia sin vehichels a motor tranter in camiun ed in tractor cun char annex?
4. Resultan tras quests transports – ultra da las taglias sin vehichels a motor e da la TTPDP – ulteriurs profits che chaschunan ina distorsiun dal martgà?
5. Po la regenza mussar la contaminaziun da substanzas nuschaivlas per rauba da transports professiunals, e quai tant per in camiun sco er per in tractor?
Cuira, ils 31 d'avust 2012
Wieland, Montalta, Foffa, Aebli, Bleiker, Buchli-Mannhart, Burkhardt, Casanova-Maron, Casty, Casutt, Casutt-Derungs, Clavadetscher, Conrad, Dudli, Engler, Felix, Fontana, Furrer-Cabalzar, Giacomelli, Heiz, Holzinger-Loretz, Jeker, Jenny, Krättli-Lori, Kunz (Fläsch), Mani-Heldstab, Meyer-Grass, Noi-Togni, Parolini, Pfenninger, Stiffler (Cuira), Tomaschett (Breil), Trepp, Tscholl, Vetsch (Claustra), Vetsch (Pragg-Jenaz), Waidacher, Zweifel-Disch, Degonda, Fausch, Monigatti
Resposta da la regenza
Tenor il dretg federal pon tractors cun ina sveltezza maximala fin 40 km/h vegnir immatriculads sco tractors agriculs u industrials – cun ina sveltezza da passa 40 km/h mo sco tractors industrials (art. 161 da l'ordinaziun davart las pretensiuns tecnicas a vehichels stradals, OPTV; CS 741.41). Sco vehichels agriculs dastgan els vegnir duvrads – tenor l'art. 86 al. 1 da l'ordinaziun davart las reglas dal traffic sin via (ORT; CS 741.11) – mo en connex cun la cultivaziun d'in bain agricul u d'in bain dal medem status. Els han in numer d'immatriculaziun verd. Il medem status sco ils manaschis agriculs han ils manaschis forestals, ils manaschis che servan a la planticultura, en spezial a la cultivaziun da legums, a la pumicultura ed a la viticultura, las orticulturas e las apiculturas. Vehichels agriculs dastgan er vegnir duvrads per viadis agriculs per terzas persunas, e quai er cunter indemnisaziun. Persunas che na fan betg il pur pon tegnair vehichels agriculs, sch'ellas fan mo viadis agriculs e mo lavurs agriculas per terzas persunas. Cun tractors industrials percunter na pon ins betg mo far viadis agriculs, mabain er viadis industrials u unicamain viadis industrials. Tals tractors ston avair numers d'immatriculaziun alvs.
1. I capita ch'i vegnan fatgs transports industrials scumandads cun vehichels agriculs. Per part vegn quai fatg sapientivamain, per part perquai ch'ins n'enconuscha betg la situaziun giuridica. Tenor l'avis da la regenza dastgass quel che agescha sapientivamain, er agir per avantatgs economics.
2. La regenza n'ha naginas pussaivladads per cumbatter cunter talas distorsiuns dal martgà, perquai che la confederaziun ha la cumpetenza da decider davart l'immatriculaziun e l'intent d'utilisaziun da tractors. Tras controllas correspundentas e sche necessari tras denunzias po la polizia chantunala percunter empruvar d'impedir ch'i vegnan fatgs (er vinavant) transports scumandads cun vehichels agriculs (quai ch'ella fa dal rest er).
3. Per il camiun cun in pais total (PTot) da 26 t, ch'è il tip da camiun che vegn utilisà il pli savens en il Grischun, ston ins pajar ina taglia da traffic annuala da 2'689.30 francs. Per ina cumbinaziun da vehichels cun ina chargia utilisabla cumparegliabla – cun in tractor industrial (PTot 8 t) ed in char annex (PTot 18 t) – ston ins percunter pajar ina taxa da 1'566.55 francs. Per in camiun da 18 t resultass ina relaziun da 2'009.30 francs a 1'492.55 francs. Questas differenzas resultan principalmain, perquai ch'ils tractors industrials vegnan taxads mo cun la mesadad da las tariffas da camiuns. Quai pervia da lur capacitads da transport irrelevantas e pervia dals paucs kilometers charrads per onn.
4. A la regenza n'èn enconuschents nagins avantatgs che fissan colliads cun tals transports.
5. Ils camiuns ed ils tractors n'èn betg suttamess a las medemas prescripziuns da svapur. La svapur maximalmain admissibla da monoxid carbonic (CO), d'idrocarbon (HC), d'oxid da nitrogen (NOx) e da pulvra fina (PM) vegn dentant fixada per omaduas categorias da vehichels, uschia ch'ina cumparegliaziun è tuttavia pussaivla. Tenor las prescripziuns da svapur vertentas ston camiuns (CA) e tractors (TR) (en la categoria da prestaziun da 130 kW fin 560 kW) observar las suandantas limitas d'emissiuns en g/kWh: CO: CA = 1,5 / TR = 3,5; HC: CA = 0,46 / TR = 0,19; NOx: CA = 2,0 / TR = 2,0; PM: CA = 0,02 / TR = 0,025. Areguard las emissiuns po il cumportament da camiuns e da tractors da las generaziuns pli giuvnas pia vegnir giuditgà sco bunamain identic.
22 d'october 2012