Las sutsegnadras ed ils sutsegnaders supplitgeschan la regenza da render transparents ils salaris da las polizistas e dals polizists dal chantun Grischun e da la Svizra orientala. En detagl stoi daventar visibel, quant auts ch'ils salaris dal chantun Grischun èn, en tge chantun ch'els èn ils pli auts ed en tge chantun ch'els èn ils pli bass sco er tgenin ch'è il salari medi da la Svizra orientala. Questa glista sto cumpigliar er las singulas funcziuns e las singulas pussaivladads da far carriera professiunala (appuntà, sergent, e.u.v.). Medemamain stoi esser visibel, co che las curvas dals salaris sa movan per lung da l'axa cronologica e tge import ch'ils eventuals supplements han.
Cuira, il 1. da settember 2012
Trepp, Cavegn, Pult, Baselgia-Brunner, Blumenthal, Bucher-Brini, Della Vedova, Dosch, Foffa, Frigg-Walt, Gartmann-Albin, Geisseler, Jaag, Kleis-Kümin, Locher Benguerel, Müller, Niederer, Noi-Togni, Peyer, Pfenninger, Thöny, Tomaschett-Berther (Trun), Degonda, Deplazes, Michel (Igis), Monigatti, Pedrini (Soazza)
Resposta da la regenza
Sch'i vegnan cumparegliads salaris suror ils cunfins dal chantun, èsi da resguardar ch'ina tscherta funcziun è definida da rar en moda identica en plirs chantuns. Ultra da quai tutgan las datas da salari e las infurmaziuns davart la classificiaziun tar las datas dals chantuns ch'èn degnas da vegnir protegidas. Questas datas èn accessiblas a terzas persunas mo sut circumstanzas spezialas.
La classificaziun objectiva da la funcziun fundamentala "polizist" correspunda en il Grischun ad in salari annual brut da minimalmain 76 492 francs fin maximalmain 108 641 francs. Il salari effectiv dependa da la classificaziun subjectiva da las collavuraturas e dals collavuraturs en las classas da salari e da la fixaziun dal salari entaifer la classa da salari respectiva tenor las prescripziuns dal dretg da persunal.
La preschentaziun qua sutvart sa basa sin las valurs medias da las funcziuns da cumparegliaziun, ch'èn vegnidas calculadas, "polizist normal 1+2" dals tschintg chantuns da la Svizra orientala. Las duas tabellas mussan mintgamai il salari mesaun ch'è vegnì calculà sin basa dal salaris annuals bruts ordinads tenor categorias da vegliadetgna. Il "polizist normal 1" correspunda en la polizia chantunala dal Grischun (Pocha) per exempel a la funcziun da la referendaria u dal referendari, il "polizist normal 2" per exempel a la funcziun d'ina scheffa u d'in schef da gruppa.
La cumparegliaziun mussa ch'il salari mesaun da polizistas e da polizists pli giuvens en il chantun Grischun sa chatta sut il salari mesaun dal chantuns cumparegliabels da la Svizra orientala, il salari mesaun da polizistas e da polizists pli vegls dals chantuns cumparegliabels da la Svizra orientala è però pli aut en il chantun Grischun.
Las pussaivladads da far ina carriera professiunala na dependan betg dal grad, mabain da la classificaziun objectiva da las plazzas (vesair art. 7 al. 2 da l'ordinaziun da polizia [OPol, DG 613.100]). Ina carriera tar la polizia pudess per exempel cumenzar suenter la scola da polizia cun ina funcziun sco referendaria u referendari cun in salari mensil da minimalmain 4 980 francs e terminar sur la staziun d'ina referendaria u d'in referendari dal servetsch specific e d'ina scheffa u d'in schef da gruppa en la funcziun da scheffa u da schef da post cun in salari mensil da maximalmain 8 836 francs. I valan supplements per prestaziuns da lavur particularas tenor l'art. 33 da la lescha dal persunal (LP, DG 170.400). Ultra da quai sto la regenza tenor l'art. 32 LP relaschar in reglament intern per indemnisar incumbensas ed obligaziuns spezialas da collavuraturas e da collavuraturs da la Pocha. La Pocha ha pajà l'onn 2011 supplements d'in import da totalmain 1 547 565 francs. En media en quai stads 287 francs per polizista u per polizist al mais. I fiss pussaivel da cumparegliar en moda valaivla ils supplements cun auters chantuns mo faschond ina lavur exagerada, perquai che las regulaziuns davart ils supplements èn tuttina fitg differentas.
31 d’october 2012