"Cur che tut ils mirs dattan ensemen en l'Europa, vegn er la Svizra a sfunsar pli u main", ha ditg la presidenta da la confederaziun Eveline Widmer-Schlumpf a chaschun da ses pled dal 1. d'avust da quest onn. Ed ella ha fatg allusiun a la pussaivladad che la Grezia e per consequenza eventualmain ulteriurs stadis europeics indebitads sco il Portugal, la Spagna, l'Irlanda u l'Italia vegnian a stuair bandunar l'uniun monetara.
Sch'il spazi europeic giess ord l'auter, quai che na para betg exclus malgrà l'entrada en vigur dal fond da salvament permanent per l'euro, avess quai consequenzas er per il Grischun.
En quest senn supplitgeschan las sutsegnadras ed ils sutsegnaders la regenza da respunder las suandantas dumondas:
1. Tge consequenzas avess quai, sch'il spazi europeic giess ord l'auter per:
a) l'economia publica dal Grischun en general?
b) las finanzas dal Grischun?
c) ils instituts dal chantun, sco la banca chantunala grischuna, la cassa da pensiun dal chantun Grischun e.u.v.?
2. Tge strategias persequitescha la regenza per mitigiar eventualmain las consequenzas negativas da la crisa da l'euro per il Grischun?
3. Ha la regenza gia prendì mesiras u pensa ella da prender talas?
Cuira, ils 24 d'october 2012
Niederer, Hartmann (Cuira), Kappeler, Albertin, Augustin, Berther (Mustér), Berther (Camischolas), Blumenthal, Bondolfi, Caduff, Casutt-Derungs, Cavegn, Clalüna, Della Vedova, Dermont, Dosch, Fasani, Foffa, Geisseler, Gunzinger, Hitz-Rusch, Holzinger-Loretz, Kleis-Kümin, Kollegger (Malix), Krättli-Lori, Lorez-Meuli, Märchy-Caduff, Michael (Donat), Noi-Togni, Parolini, Rosa, Stiffler (Cuira), Tenchio, Tomaschett (Breil), Tomaschett-Berther (Trun), Zanetti, Camathias, Degonda, Haltiner, Lauber, Patt (Jenaz), Rischatsch-Casaulta, Schucan
Resposta da la regenza
Anc adina na poi betg vegnir exclus dal tuttafatg ch'in dals stadis commembers sortia da la zona da l'euro u che quella giaja insumma dapart. Tuttina para la probabilitad – pervia da las mesiras da la banca centrala europeica – in pau pli pitschna che anc avant in pèr mais. Sco che la crisa europeica da debits mussa, èn finanzas publicas saunas d'ina impurtanza centrala per mantegnair la capacitad d'agir dals stadis sco er dals stadis commembers. En questa vista gioga la Svizra – cun il frain a l'indebitament – ina rolla exemplarica. Er las finanzas chantunalas ston esser equilibradas a la lunga. Per evitar deficits structurals ston las expensas e las entradas vegnir mantegnidas en equiliber a vista mesauna.
1a) La sortida d'in singul stadi avess plitost consequenzas da natira indirecta per l'economia grischuna, pervia da l'entretschament direct da quella cun il commerzi da l'exteriur ch'è per il pli pitschen. In ir dapart da la zona da l'euro chaschunass ina recessiun per l'entira Uniun europeica. La dumonda che pervegn da martgads impurtants per il Grischun, sco p.ex. da la Germania, regrediss pia considerablamain. En spezial na pudess ins betg far quint a media vista che la dumonda turistica dals stadis da la UE sa recreass. Las consequenzas per l'economia publica da la Svizra e correspundentamain er dal Grischun dependan dentant fermamain dal fatg, sche la banca naziunala po mantegnair il curs da stgomi dad 1.20 francs per l'euro.
1b) Da vart da las entradas sa laschassan spetgar grondas consequenzas negativas. En spezial en connex cun las parts al gudogn da la banca naziunala svizra (BNS) sco er en connex cun las taglias federalas directas fissi da far quint gia a curta vista cun perditas considerablas. A vista mesauna fissi da partir dal fatg, ch'i resultass in regress dals pajaments or da la gulivaziun da las resursas da la confederaziun e dals chantuns. Ma er tar las taglias chantunalas sco er tar ils retgavs da las investiziuns da la facultad finanziala fissi da spetgar perditas. I n'è dentant betg pussaivel da prognostitgar la dimensiun probabla da la grevezza per las finanzas chantunalas en lur totalitad.
1c) La cassa da pensiun chantunala dal Grischun (CP) è posiziunada cun quità en vista als conturns da la politica finanziala ed economica. Natiralmain che la CP fiss pertutgada, sche la zona da l'euro giess dapart, eventualmain in pau main ferm che autras interpresas. Er la banca chantunala grischuna tgira ses engaschaments a l'exteriur mo cun resalva ed en il rom da quai che necessari per il manaschi. Las consequenzas directas d'in ir dapart da la zona da l'euro pudess la banca chantunala grischuna dumagnar. Las consequenzas finanzialas indirectas che resultassan per la banca chantunala grischuna na sa laschan strusch stimar ord vista actuala.
2. Da princip stoi vegnir cuntinuà cun la politica da finanzas dal chantun ch'è sa cumprovada, ch'è da lunga durada e che ha effects anticiclics. Per cumbatter cunter las fasas d'ina recessiun economica sto il stadi intervegnir uschè pauc sco pussaivel. Las directivas da la politica da finanzas dal cussegl grond èn prescripziuns cleras per diriger las finanzas en il rom dal budget annual. La directiva da la politica da finanzas adattada per l'onn 2013 concernent ils deficits dal budget permetta durant maximalmain trais onns surplis d'expensas fin maximalmain 80 milliuns francs (empè da 50 milliuns francs) en temps, nua ch'i vegnan prendidas mesiras per stabilisar la conjunctura. Sche la crisa da l'euro chaschuna effectivamain ina fasa da recessiun er en Svizra, stattan a disposiziun meds finanzials limitads a favur da mesiras per promover la conjunctura, e quai independentamain da l'agen chapital cumprovà.
3. Cun excepziun dal turissem è actualmain la situaziun economica dal Grischun anc cuntentaivla. Mesiras per stabilisar l'economia grischuna fan mo senn, sch'ellas vegnan prendidas en concordanza cun ils programs da conjunctura da la confederaziun. I sto pia vegnir empruvà da cuntanscher ina coordinaziun cun la confederaziun. Il mument n'èsi betg pussaivel da planisar mesiras concretas.
17 da december 2012