Navigation

Inhaltsbereich

Sessiun: 06.12.2012
Per evitar epidemias dal virustgel dovri – en reguard epidemiologic – ina rata da vaccinaziun en massa tar ca. 95 % dals uffants. En l'Europa dal nord, en l'America dal sid ed en ils Stadis Unids da l'America è quai gia il cas dapi onns. En il Grischun importa la rata da vaccinaziun en massa mo 74 %. Nus ans chattain sin il terzultim rang da tut la Svizra!

Sin tut il mund è il virustgel il motiv per in mez milliun mortoris d'uffants, q.v.d. per la mesadad da tut ils mortoris d'uffants che fissan evitabels. Tut auter ch'ina malsogna d'uffants benigna, sco quai ch'ils adversaris da vaccinaziuns vulessan dar da crair.

Las Svizras ed ils Svizzers viageschan gugent ed han adina puspè chaschunà epidemias da virustgel a l'exteriur (Südostschweiz dals 9 da november 2012).

Tschertas universitads en l'Australia ed en ils Stadis Unids da l'America pretendan gia dapi onns in attest da vaccinaziun cunter il virustgel ed er la WHO ponderescha da recumandar restricziuns d'entrar en pajais ch'èn pertutgads d'ina epidemia. La rata da vaccinaziun en massa cunter il virustgel dependa per gronda part da la conscienza davart la privlusadad da la malsogna sco er da l'infurmaziun davart eventuals effects secundars da la vaccinaziun, quai ch'è pia tranter auter er in affar da la sanadad publica. L'uffizi federal da sanadad publica (UFSP) annunzia las suandantas cifras:

- inflammaziuns dal tscharvè pervia dal virustgel: 200 fin 2000 pro 1 milliun cas da malsogna,
cun vaccinaziun: 0,6 fin 1,6 pro 1 milliun cas da malsogna

- ospitalisaziuns: 10 000 fin 25 000 pro 1 milliun cas da malsogna,
cun vaccinaziun: 20 fin 50 pro 1 milliun cas da malsogna

- mortoris pervia da malsogna: 300 fin 1000 pro 1 milliun cas da malsogna,
mortoris suenter vaccinaziun: main che 0,001 pro 1 milliun cas da malsogna

En ils fatgs da sanadad datti darar ina mesira cun ina meglra proporziun tranter ils custs ed il niz.

Betg mo sco persunas che viageschan a l'exteriur, mabain er sco persunas che ospiteschan umans da tut il mund essan nus ina ristga d'infecziun considerabla.

En quest connex sa tschentan per las sutsegnadras ed ils sutsegnaders intginas dumondas:

1. Co giuditgescha la regenza il fatg che la rata da vaccinaziun en massa cunter il virustgel è uschè bassa?

2. Tgenins èn – tenor l'opiniun da la regenza – ils motivs principals che la rata da vaccinaziun en massa cunter il virustgel è uschè bassa?

3. Tge quinta la regenza da far fin l'onn 2022, per ch'il Grischun daventia abel per ils gieus olimpics areguard la rata da vaccinaziun en massa cunter il virustgel, q.v.d. per cuntanscher ina rata da vaccinaziun en massa tar 95 % dals uffants, uschia ch'i na po betg dar in'epidemia dal virustgel en il Grischun, en cas ch'ils gieus olimpics avessan lieu en noss chantun?

Cuira, ils 6 da december 2012

Trepp, Augustin, Baselgia-Brunner, Frigg-Walt, Gartmann-Albin, Jaag, Kleis-Kümin, Locher Benguerel, Müller (Tavau Plaz), Peyer, Thöny, Tomaschett-Berther (Trun), Deplazes, Michel (Igis), Monigatti

Resposta da la regenza

Sco en intgins auters pajais da l'Europa occidentala e centrala sa derasa il virustgel adina puspè er en Svizra. Ils onns 2007 fin 2012 èn vegnids registrads 5182 cas en Svizra. En il Grischun èn vegnids annunziads 212 cas durant questa perioda.
Tar las retschertgas davart il grad da vaccinaziun en massa, che vegnan fatgas regularmain en tut la Svizra, ha il Grischun cuntanschì l'ultima giada l'onn 2010 valurs levamain sut la media. Però è la rata da vaccinaziun en massa creschida cleramain dapi l'onn 2002 tar tut las gruppas da la populaziun examinadas. Il Grischun è pia suandà vaira bain la tendenza svizra.
Per ch'ins possia far svanir il virustgel per adina, èsi necessari che passa 95% da la populaziun saja immuna cunter il virustgel – saja quai tras vaccinaziuns u cun avair gì ina giada la malsogna.
L'atun 2012 ha il cussegl federal concludì la "Strategia naziunala per eliminar il virustgel 2011-2015" ed ha publitgà quella sin la pagina d'internet da l'uffizi federal da sanadad publica (UFSP). Las mesiras las pli impurtantas èn:
• augmentar la rata da vaccinaziun en massa tras infurmaziuns adequatas, facilitar l'accessibladad a la vaccinaziun cun agid da differents impuls
• cumbatter l'erupziun dal virustgel cun mesiras unitaras en tut la Svizra
• meglierar la surveglianza da l'andament da la malsogna
Cun questas ed ulteriuras mesiras duai la Svizra esser libra dal virustgel fin la fin da l'onn 2015.

La regenza respunda las dumondas tschentadas sco suonda:

1. La rata da vaccinaziun en massa da tut las gruppas da la populaziun examinadas en il Grischun è levamain sut la media svizra, sa chatta dentant en il rom da la gronda part dals ulteriurs chantuns rurals da la Svizra orientala. Dapi il cumenzament da las mesiraziuns è questa rata dentant sa meglierada cleramain en tut las gruppas.

2. Ils motivs che la rata da vaccinaziun en massa è levamain sut la media n'èn betg enconuschents en il cas singul. In motiv pussaivel pudess esser quel che la vaccinaziun cunter il virustgel vegn recumandada pir suenter l'emprim onn da vita. A partir dal segund onn da vita è il contact tranter la media u il medi ed ils geniturs main intensiv, perquai ch'ils intervals tranter las controllas da rutina usitadas èn bler pli lungs. Uschia crescha la probabilitad che la vaccinaziun cunter il virustgel vegn emblidada.

3. La regenza ha l'intenziun da prender part al program federal per eliminar il virustgel. Il UFSP ha planisà da cumenzar a realisar il program en il decurs da l'onn 2013, las activitads principalas èn previsas ils onns 2014 e 2015. La regenza sustegna la finamira da far svanir, fin la fin da l'onn 2015, per adina il virustgel en Svizra. In'epidemia dal virustgel duess uschia pia esser fitg pauc probabla, sch'ils gieus olimpics d'enviern avessan eventualmain lieu l'onn 2022 en il Grischun.

24 da schaner 2013