Navigation

Inhaltsbereich

Sessiun: 23.04.2013
Per sustegnair scientificamain la sortida or da l'energia atomara, augmenta la confederaziun ils meds finanzials per la perscrutaziun da l'energia. Cun il plan d'acziun "Perscrutaziun coordinada da l'energia en Svizra" propona il cussegl federal en il rom da la strategia d'energia 2050 mesiras da promoziun liadas a l'intent per rinforzar la perscrutaziun da l'energia ils onns 2013 fin 2016. Il plan d'acziun prevesa da construir set centers da cumpetenza colliads tranter las universitads. Els sa deditgeschan a temas centrals sco l'effizienza energetica, las raits, l'accumulaziun, il provediment d'electricitad e las dumondas da mobilitad. Entant che la perscrutaziun tradiziunala da l'energia cumpiglia l'entira chadaina da valurisaziun da l'exploraziun da la basa fin al svilup datiers dal product, è il focus tar il plan d'acziun sin la perscrutaziun che s'orientescha a l'applicaziun. En il rom dal program da promoziun "Perscrutaziun coordinada da l'energia en Svizra" pon uschia scolas autas e centers da cumpetenza cun la participaziun da l'economia privata s'annunziar tar la cumissiun per tecnologia ed innovaziun (CTI) e tar il fond naziunal per daners da promoziun per lur projects.

En las scolas autas participadas duain grazia als meds finanzials supplementars vegnir stgaffidas fin l'onn 2020 tut en tut 30 novas gruppas da perscrutaziun inclusiv professuras. Il cussegl naziunal ed il cussegl dals chantuns han permess per quest intent a chaschun da la sessiun da primavaira 2013 – 2016 tut en tut 202 milliuns francs.

Las sutsegnadras ed ils sutsegnaders incumbenseschan la regenza da sclerir, sch'il Grischun è en cas da s'annunziar per in center da cumpetenza per forza idraulica en il rom dal plan d'acziun "Perscrutaziun coordinada da l'energia en Svizra" ensemen cun l'economia d'electricitad e cun ina scola auta.

Cuira, ils 23 d'avrigl 2013

Caduff, Dudli, Bezzola (Samedan), Augustin, Barandun, Berther (Mustér), Berther (Camischolas), Blumenthal, Bondolfi, Buchli-Mannhart, Burkhardt, Caluori, Campell, Casanova-Maron, Casty, Casutt-Derungs Silvia, Cavegn, Conrad, Darms-Landolt, Della Vedova, Dosch, Fallet, Felix, Foffa, Geisseler, Giacomelli, Gunzinger, Hardegger, Hartmann (Cuira), Hitz-Rusch, Holzinger-Loretz, Jeker, Jenny, Kappeler, Kleis-Kümin, Kollegger (Cuira), Kollegger (Malix), Krättli-Lori, Märchy-Caduff, Meyer-Grass, Michael (Donat), Michael (Castasegna), Nick, Niederer, Niggli-Mathis (Grüsch), Parolini, Parpan, Pedrini (Roveredo), Perl, Peyer, Pult, Righetti, Sax, Stiffler (Tavau Plaz), Stiffler (Cuira), Tenchio, Tomaschett (Breil), Trepp, Troncana-Sauer, Tscholl, Vetsch (Pragg-Jenaz), Waidacher, Wieland, Zanetti, Zweifel-Disch, Calonder, Camathias, Decurtins-Jermann, Deplazes, Epp, Gassmann, Gugelmann, Hensel, Lauber, Müller (Haldenstein), Pedrini (Soazza), Vincenz

Resposta da la regenza

Tar l'elavuraziun dal plan d'acziun "Perscrutaziun coordinada da l'energia en Svizra" sut la direcziun dal secretariat da stadi per furmaziun e perscrutaziun SFP (dapi il 1. da schaner 2013 secretariat da stadi per furmaziun, retschertga ed innovaziun SEFRI) èn dumondas da l'innovaziun tecnologica e da la coordinaziun stadas en il center. Uschia han ins d'ina vart stuì sclerir, en tge instituziuns ch'il potenzial da perscrutaziun duai vegnir rinforzà sistematicamain a vista mesauna ed a vista pli lunga, per che innovaziuns tecnologicas e lur introducziun sin il martgà possian sustegnair e segirar che la nova strategia d'energia 2050 vegnia realisada confurm al temp. Da l'autra vart han ins stuì giuditgar, tge mesiras da promoziun che garanteschan il meglier la cooperaziun indispensabla tranter la scola politecnica federala, las scolas autas spezialisadas e las universitads sin il sectur da la perscrutaziun da l'energia.

Ina mesira ch'il cussegl federal propona en la missiva tar il plan d'acziun "Perscrutaziun coordinada da l'energia en Svizra" per rinforzar la perscrutaziun da l'energia 2013–2016 cumpiglia l'installaziun da centers da cumpetenza interuniversitars per la perscrutaziun, ils "Swiss Competence Centers for Energy Research" (SCCER). Quests SCCER vegnan installads en ils secturs "effizienza", "raits e lur cumponentas, sistems d'energia", "accumulaziun d'energia", "provediment d'electricitad", "economia, ambient, dretg, cumportament", "concepts, process e cumponentas effizientas en la mobilitad ed en l'industria" sco er "biomassa". La publicaziun per installar ils SCCER en quests set champs d'acziun ha gì lieu ils 23 da matg 2013.

En il Grischun è la scola auta da tecnica ed economia SATE Cuira sa fatschentada intensivamain cun la strategia d'energia dal chantun e cun il plan d'acziun "Perscrutaziun coordinada da l'energia en Svizra". En quest connex ha il cussegl da scola auta da la SATE concludì il november 2012 da crear in center per effizienza da l'energia CEFF. Cunquai che la strategia da la SATE sa deditgescha intensivamain al tema central da la perscrutaziun orientada a l'applicaziun en il sectur da l'effizienza da l'energia, n'ha la SATE betg persequità vinavant il champ d'acziun "provediment d'electricitad", al qual er il champ da perscrutaziun "forza idraulica" appartegna. Qua avessi duvrà memia blers meds finanzials e memia bler persunal per installar in agen sectur da perscrutaziun cun installaziuns tecnicas e cun cumpetenzas professiunalas.

L'installaziun dal CEFF a la SATE vegn ad esser terminada fin la fin da l'onn 2013 e vegn a cumpigliar ils secturs parzials "economia", "construcziun" ed "electrotecnica". Uschia vegn il CEFF a stgaffir cumpetenzas davart las dumondas actualas da l'effizienza da l'energia sco er en vista a las sfidas da la societad da 2000 watts e render accessiblas questas cumpetenzas a l'economia, a las studentas ed als students sco er a la populaziun en furma da perscrutaziun applitgada, d'instrucziun e da prestaziuns da servetsch. Fin al termin d'inoltraziun dals 9 da fanadur 2013 vegn la SATE a decider, en tge sectur ch'ella po sa participar a l'installaziun dals SCCER; discurs correspundents cun la scola politecnica federala, cun las universitads e cun las scolas autas spezialisadas han lieu actualmain. Tras la collavuraziun en in u en plirs SCCER po la posiziun da la SATE vegnir rinforzada en il sectur da la perscrutaziun da l'energia. Schebain i reussescha da rabitschar in dals centers da cumpetenza SCCER planisads a la scola auta spezialisada da la Svizra orientala SASSO u a la SATE Cuira, vegn a sa mussar pir cur ch'i vegn decidì davart las differentas inoltraziuns per installar ils SCCER. Influenzada vegn questa decisiun betg sco ultim dals meds finanzials che stattan a disposiziun a la SATE. I ston vegnir mess a disposiziun tuttina blers agens meds finanzials sco quai che la confederaziun conceda. Quai vul dir che la SATE sto generar meds finanzials supplementars per pudair stgaffir las cumpetenzas necessarias.

Er la regenza è da l'avis che la SATE duaja sa participar activamain a la publicaziun per installar ils SCCER ed uschia a la realisaziun dal plan d'acziun "Perscrutaziun coordinada da l'energia en Svizra".

En quest senn è la regenza pronta d'acceptar l'incumbensa.

27 da zercladur 2013