Navigation

Inhaltsbereich

Sessiun: 23.04.2013
Il turissem ha ina impurtanza speziala per il chantun Grischun. Ils purschiders da prestaziuns turisticas èn dependents dal fatg ch'il chantun Grischun vegn visità regularmain d'in grond dumber da giasts. In factur impurtant per decider da vegnir puspè ina giada en il Grischun èn las emoziuns. Eveniments nunemblidaivels ch'ins ha fatg sco uffant u sco giuvenil han in effect spezialmain ferm en quest connex.

Per differents motivs renunzian adina dapli scolas ed organisaziuns da giuvenils d'organisar champs da sport e da vacanzas. Las consequenzas da quai vegnan ad esser pli baud u pli tard ch'ils giasts vegnan a mancar massivamain als purschiders da prestaziuns turisticas.

Per far frunt a quest trend vegn la regenza incumbensada da promover champs da sport e da vacanzas per giuvenils. Per quai duai vegnir elavurà e realisà in concept adattà che cuntegna ils suandants puncts centrals:

- promoziun activa sco lieu per champs da sport e da vacanzas;

- champs tant durant la stagiun da stad sco er durant la stagiun d'enviern;

- scolas ed organisaziuns da giuventetgna grischunas sco er extrachantunalas sco partenarias giavischadas;

- metter a disposiziun il material da sport e da temp liber sco er las persunas da scolaziun necessaris.

Cuira, ils 23 d'avrigl 2013

Kappeler, Tomaschett (Breil), Grass, Albertin, Baselgia-Brunner, Blumenthal, Bucher-Brini, Buchli-Mannhart, Burkhardt, Caduff, Campell, Casutt Renatus, Cavegn, Conrad, Darms-Landolt, Dermont, Dosch, Engler, Fallet, Geisseler, Holzinger-Loretz, Jeker, Jenny, Kasper, Koch (Tumein), Kollegger (Malix), Märchy-Caduff, Marti, Michael (Donat), Michael (Castasegna), Müller (Tavau Plaz), Niederer, Niggli (Samedan), Parpan, Perl, Peyer, Pult, Righetti, Rosa, Sax, Stiffler (Cuira), Tenchio, Thöny, Trepp, Troncana-Sauer, Waidacher, Wieland, Camathias, Decurtins-Jermann, Deplazes, Epp, Gassmann, Haltiner, Hensel, Lauber, Vassella, Vincenz

Resposta da la regenza

La regenza è er da l'avis che champs da sport e da vacanzas contribueschan ad experientschas emoziunalas restantas ed èn – en connex cun il moviment – impurtants per il svilup fisic, psichic e social dals giuvenils. Er sin plaun federal è l'impurtanza da tals champs – en spezial en ils conturns da la scola – gia vegnida realisada e l'organisaziun da champs en il rom da giuventetgna+sport (G+S) è perquai vegnida facilitada cun mesiras adattadas en la nova lescha federala davart la promoziun dal sport e da l'activitad fisica. Uschia èsi ussa pussaivel da far champs er cun uffants, e champs da sport durant il temp da scola vegnan indemnisads cumplainamain dapi il 1. d'october 2012. Sur G+S po vegnir emprestà fitg favuraivlamain material, en spezial per champs da sport alpin, da sport d'aua e da sport da naiv (mo eventuals custs da spediziun ston vegnir surpigliads). Da tegnair a disposiziun tal material tant sin plaun federal sco er sin plaun chantunal na para betg dad esser raschunaivel per motivs finanzials. Ina cumplettaziun cun material da sport che n'è betg avant maun tar la confederaziun po però vegnir examinada sin dumonda.

Gia dapi blers onns organisescha la partiziun "sport" da l'uffizi per la scola populara ed il sport (USS) agens champs da sport. Quests uschenumnads "champs da sport per giuvenils" vegnan purschids en collavuraziun cun ils chantuns da la Svizra orientala e dal principadi da Liechtenstein a tut ils giuvenils da la Svizra orientala. En questa cumbinaziun stat a disposiziun ina gronda paletta da disciplinas da sport cun var 70 champs, repartids sur tut l'onn, che vegnan frequentads bain dals giuvenils. En quest rom metta il chantun Grischun a disposiziun 4 champs cun circa 300 plazzas. Blers champs d'enviern dals auters chantuns da la Svizra orientala han er lieu en il Grischun en il rom da quest program.

Gia cun l'incumbensa Tomaschett (Breil) ch'è vegnida inoltrada la sessiun d'october 2012 è la regenza vegnida incaricada da promover pli fitg emnas da sport da naiv en scolina (conclus da la regenza nr. 1217 dals 18 da december 2012). Per quest intent ed en il rom dal project "Uffants giai en muntogna" è vegnida fatga ina retschertga tar tut las direcziuns da scola en il chantun Grischun che ha mussà che passa la mesadad da las scolas fa durant il temp da scola in champ da naiv sin almain in stgalim. In quart da las scolas senza champs da sport da naiv fa auters champs da sport. Ensemen cun la retschertga èn las direcziuns da scola vegnidas rendidas attentas e sensibilisadas per las pussaivladads extendidas da profitar da G+S. La partiziun "sport" dal USS maina ussa sin basa da las respostas discurs cun quellas scolas, che han demussà interess per activitads supplementaras da sport e da moviment en furma da champs u da curs.

Il sboz da la nova lescha dal chantun Grischun per promover il sport prevesa ch'ina vasta purschida da disciplinas da sport e d'activitads da moviment duai esser avant maun en tut las regiuns e che questas activitads duain vegnir promovidas e coordinadas cun programs e cun projects adattads. Sco mesira en quest connex vegn la regenza obligada da relaschar in concept cumplessiv per promover il sport ed il moviment en il Grischun e da controllar quel periodicamain. En quel concept vegn la promoziun da champs er ad esser in tema. D'in concept separà duai però vegnir desistì. En quest senn è la regenza pronta d'acceptar l'incumbensa.

03 da fanadur 2013