Ils artitgels 28d e 38 da la lescha davart ils fatgs da sanadad dal chantun Grischun prescrivan ch'i stoppian vegnir registradas tar la persuna tractada, per exempel en in ospital, "las datas essenzialas concernent la durada ed il gener dal tractament". Questas uschenumnadas documentaziuns da pazientas e da pazients ubain rapports medicals (RM) ston vegnir archivads durant almain 10 onns.
En consequenza da l'èra electronica vegnan talas documentaziuns da pazientas e da pazients fatgas pli e pli savens en furma electronica. Il problem è ch'igl exista ina gronda malsegirezza davart la forza da cumprova da documents electronics. I n'è betg cler, sche las datas electronicas bastan sco med da cumprova. Uschia ston vegnir archivadas duas giadas las documentaziuns da pazientas e da pazients, numnadamain en furma electronica e sin palpiri. Quai chaschuna blera lavur administrativa, ma er blers custs.
Perquai dumandain nus la regenza il suandant:
1. Ils artitgels 28d e 38 da la lescha da sanadad dal chantun Grischun èn formulads en moda averta. Poi vegnir deducì da quai che la documentaziun electronica da pazientas e da pazients ha il medem status giuridic sco la documentaziun sin palpiri, uschia ch'ins pudess desister da quella sin palpiri?
2. Ha la documentaziun electronica da pazientas e da pazients la medema forza da cumprova sco quella sin palpiri?
3. È la regenza da l'avis ch'i sajan necessarias adattaziuns da la lescha – per exempel en il senn da la lescha da pazientas e da pazients dal chantun Turitg, numnadamain § 17 al. 2 – cun la permissiun da dastgar manar ina documentaziun da pazientas e da pazients er en furma electronica:
"Documentaziun da pazients
§ 17.1 Da mintga pazienta e da mintga pazient vegn fatga ina documentaziun davart ils scleriments e davart il tractament che sto vegnir actualisada cuntinuadamain.
2 La documentaziun po vegnir manada sin palpiri u en furma electronica. Ella duai vegnir anonimisada en moda simpla."
4. È la regenza pronta d'infurmar las instituziuns correspundentamain?
Cuira, ils 23 d'avrigl 2013
Nick, Caduff, Hardegger, Albertin, Barandun, Bezzola (Zernez), Blumenthal, Burkhardt, Caluori, Casanova-Maron, Casty, Casutt-Derungs Silvia, Cavegn, Clavadetscher, Conrad, Darms-Landolt, Dermont, Dosch, Engler, Felix, Frigg-Walt, Geisseler, Giacomelli, Gunzinger, Hartmann (Champfèr), Hartmann (Cuira), Hitz-Rusch, Holzinger-Loretz, Jeker, Jenny, Kasper, Kleis-Kümin, Kollegger (Cuira), Kollegger (Malix), Komminoth-Elmer, Krättli-Lori, Kunz (Fläsch), Kunz (Cuira), Märchy-Caduff, Marti, Meyer-Grass, Michael (Castasegna), Niederer, Niggli (Samedan), Niggli-Mathis (Grüsch), Parolini, Peyer, Pfäffli, Rosa, Sax, Steck-Rauch, Stiffler (Tavau Plaz), Stiffler (Cuira), Tenchio, Tomaschett-Berther (Trun), Trepp, Troncana-Sauer, Tscholl, Valär, Vetsch (Pragg-Jenaz), Wieland, Camathias, Decurtins-Jermann, Deplazes, Epp, Gugelmann, Müller (Haldenstein)
Resposta da la regenza
Dapi la fin dal 20avel tschientaner ha la digitalisaziun chaschunà ina midada tant en la tecnica sco er en quasi tut ils secturs da la vita. Quest svilup ha er tschiffà il sectur da sanadad. Ils sistems da la gestiun ed archivaziun electronica da documents vegnan duvrads adina pli savens er en la medischina. Perquai stattan en il center pli e pli dumondas davart las premissas legalas per l'archivaziun digitala autentica da documents a lunga vista.
L'obligaziun da documentar cas medicinals resulta dal contract da tractament tenor il dretg da mandat tranter la media u il medi e la pazienta u il pazient. Per las registraziuns en il rom da l'obligaziun da documentaziun na dependi betg dal medium. Tenor la pratica vertenta dal tribunal federal vegn acceptada la qualitad da document per datas da computer, sch'ellas èn segiradas suffizientamain cunter l'extincziun u cunter modificaziuns nunintenziunadas (DTF 116 IV 349; Trechsel/Pieth, Commentari da la pratica concernent il CP, 2. ediziun, avant art. 251 N 2). Sche questas premissas èn ademplidas, pon ins sa basar sin la forza da cumprova da las registraziuns digitalisadas. Da l'obligaziun da documentaziun resulta er il dretg da prender invista da l'anamnesa. Sche documents vegnan archivads en moda digitala, sto vegnir garantida la registraziun cumpletta e correcta da las datas. Ultra da quai sto vegnir mantegnida lur controllabladad, vegnir garantida lur autenticitad e ston esser disponibels e legibels da tut temp ils documents.
En il chantun Grischun vegnan tractadas l'archivaziun e la conservaziun da las documentaziuns da pazientas e da pazients en moda eterogena. Il transferiment da tut las documentaziuns a l'anamnesa electronica marscha plainamain. L'incumbensà federal per la protecziun da datas ha desistì fin oz da dar recumandaziuns per evitar violaziuns cunter la protecziun da datas. A maun da cas singuls ha el dentant constatà che la via a "security by design" tar ils sistems per l'elavuraziun da datas è anc lunga.
Las prescripziuns da la lescha davart ils fatgs da sanadad dal chantun Grischun (lescha da sanadad; DG 500.000) che datescha da l'onn 1984 concernent la documentaziun da pazientas e da pazients na resguardan betg explicitamain il svilup digital, admettan dentant – pervia da la formulaziun averta – da realisar la documentaziun da pazientas e da pazientas en furma exclusivamain electronica.
La regenza respunda las dumondas sco suonda:
1. Gea, sche la registraziun digitalisada na po betg pli vegnir modifitgada e sche mintga access al sistem vegn protocollà.
2. Gea.
3. Dal puntg da vista da la regenza n'èsi betg necessari d'adattar la lescha.
4. Gea.
20 da zercladur 2013