La Svizra ha determinà il svilup persistent sco ina finamira naziunala a lunga vista e francà quel consequentamain en la constituziun federala. Dapi l'onn 1997 exista ina strategia da persistenza ch'è vegnida formulada dal cussegl federal e che vegn repassada periodicamain. Er dus terzs dals chantuns e tut las citads pli grondas han gia sviluppà strategias analogas, il chantun Grischun però anc betg.
En il rom da las lavurs preparatoricas per la candidatura per ils gieus olimpics dal Grischun 2022 è vegnida elavurada ina charta davart la persistenza, l'innovaziun e l'ierta (charta PII), da la quala il cuntegn pudess esser decisiv per il Grischun. Questa charta PII è ina basa fritgaivla per sviluppar ina strategiada da persistenza.
A chaschun d'ina occurrenza davart il tema da la persistenza en il turissem grischun l'avrigl 2013 èsi sa mussà ch'igl existan en il Grischun malsegirezzas considerablas concernent la persistenza en general e concernent la persistenza en la branscha d'export la pli impurtanta en spezial.
En il rom da la sessiun dals giuvenils 2013 è er vegnida discutada la charta PII resp. la mancanza d'ina strategia da persistenza en il Grischun. En quest connex èsi sa mussà che las parlamentarias ed ils parlamentaris giuvens han crititgà oravant tut che la giuventetgna saja vegnida integrada memia pauc en l'elavuraziun da la PII. Persistenza stat per ina consideraziun a lunga vista, ed en quest connex sto la giuventetgna dad oz vegnir integrada stringentamain en la concepziun dal futur.
Per differents motivs vegn la regenza incumbensada d'elavurar e da preschentar al cussegl grond ina strategia da persistenza per il Grischun che sa basa sin la charta PII. Il "cussegl da persistenza" che duai elavurar questa strategia, sto esser in spievel da la societad grischuna. Quai vul dir che er dunnas e giuvenils ston esser integrads adequatamain.
Cuira, ils 11 da zercladur 2013
Kappeler, Clalüna, Märchy-Caduff, Baselgia-Brunner, Bucher-Brini, Casutt-Derungs Silvia, Fontana, Frigg-Walt, Gartmann-Albin, Jaag, Jeker, Locher Benguerel, Müller (Tavau Plaz), Noi-Togni, Peyer, Pfenninger, Pult, Righetti, Rosa, Stiffler (Cuira), Thöny, Trepp, Bürgi-Büchel, Degonda, Deplazes, Hensel, Monigatti
Resposta da la regenza
Cun l'inscunter suprem mundial da las naziuns unidas dal zercladur 1992 a Rio de Janeiro è la persistenza vegnida renconuschida sco princip directiv da la communitad internaziunala, da l'economia, da la societad sco er da la politica. In svilup è persistent, sch'el correspunda als basegns da la generaziun actuala, senza che las pussaivladads da generaziuns futuras vegnian periclitadas. Persistenza n'è insumma betg mo focussada sin l'ecologia, mabain chapescha la capacitad economica sco per exempel finanzas publicas solidas e solidaritad sociala sco dimensiuns equivalentas e colliadas ina cun l'autra.
Fin ussa n'ha il chantun betg formulà ina strategia da persistenza formala. Tuttina è il concept per il svilup persistent vegnì recepì vastamain ed è vegnì integrà en differents instruments existents, per exempel en il program da la regenza 2013-16, en il plan directiv chantunal u en la legislaziun d'energia. Er il plan da mesiras per l'igiena da l'aria po vegnir resguardà sco instrument da la persistenza.
En connex cun la preparaziun da la candidatura ha l'uniun XXIV. Gieus olimpics d'enviern Grischun 2022 elavurà il concept "persistenza, innovaziun, ierta (PII)". Sa basond sin quel èn vegnidas formuladas reglas da basa en l'uschenumnada charta PII cun l'intent d'elavurar il dossier tar la candidatura a questa occurrenza gronda. Ord vista da la regenza cuntegnan il rapport PII e la charta PII elements essenzials d'in svilup persistent che pon vegnir applitgads per il Grischun er independentamain da la candidatura. Per trair a niz per il futur las basas ch'èn cuntegnidas en il rapport PII ed en la charta PII e per las transferir en ina strategia da persistenza resguarda la regenza in agir en las suandantas etappas sco cunvegnent:
• En il rapport PII resp. en la charta PII ston vegnir identifitgads quels elements che pon vegnir surpigliads en ina strategia chantunala da persistenza, independentamain d'ina candidatura per ils gieus olimpics d'enviern.
• Alura ston vegnir identifitgadas quellas pretensiuns e quellas sfidas che survegnan in'urgenza pli gronda per il Grischun ubain perquai che questa occurrenza gronda na vegn betg realisada ubain – independentamain da quai – perquai che lur impurtanza daventa decisiva per il futur economic, social, finanzial ed ecologic da noss chantun. Da quai resultan princips ed in sistem da finamiras per la strategia da persistenza.
• Tschertas finamiras relevantas dastgassan gia esser ina part integrala dal program da la regenza 2013-16 u vegnan realisadas en autras structuras u en auters programs. Da la fusiun da questas finamiras e da questas activitads cun il sistem da finamiras da la strategia da persistenza resulta in inventari dals aspects dal svilup persistent ch'èn renconuschids.
• Quest inventari preschenta en emprima lingia las mesiras che curran u che vegnan instradadas en differentas structuras. In'armonisaziun cun il sistem da finamiras da la strategia da persistenza pussibilitescha d'eruir il basegn d'agir. Da quel resulta in plan d'acziun per il svilup persistent. Quest plan è l'instrument operativ da la strategia da persistenza.
Ils princips, il sistem da finamiras, l'inventari ed il plan d'acziun furman ils elements d'ina strategia chantunala da persistenza. Els sa laschan sviluppar en etappas. Sco menziunà en l'introducziun, includa la noziun da la persistenza blers aspects da nossa vita da mintgadi. Per che la strategia survegnia er in fundament solid, èsi d'impurtanza decisiva che l'economia, il turissem, l'administraziun ed ulteriuras organisaziuns ed instituziuns interessadas e relevantas vegnian integradas e possian cooperar. Per realisar e per controllar las mesiras che resultan eventualmain dal plan d'acziun stoi però vegnir desistì da stgaffir ulteriuras structuras parallelas sco per exempel in cussegl da persistenza. Las mesiras correspundentas pon mintgamai vegnir fixadas en il rom dal program da la regenza e dal plan da finanzas.
La regenza è pronta d'acceptar questa incumbensa en il senn da questas explicaziuns.
23 d'avust 2013