Cuntegn da la pagina

Damonda Tomaschett (Breil) concernent il tunnel lingia Tödi

sessiun: 29.08.2013
Tier projects gronds dil traffic public (BAHN 2000 1. Etappe; NEAT) constatescha la Regenza grischuna, che las investiziuns ein flessegiadas pil pli en favur dils spazis economics denter Turitg e Berna. Sebasond sin quella constataziun ha igl uffeci d’energia e traffic grischun incaricau avon varga 10 onns in inschignier da traffic da far valer en ina secunda etappa (BAHN 2000, 2 Etappe; Anschluss an das Hochgeschwindigkeitsnetz) ils interess dil cantun Grischun en quei affar. Il resultat da quels interess ei la studia “Zu(g)kunft Graubünden”, la quala attesta lur actualitad sin la plattafuorma gr.ch.

Il cantun Grischun ha spitgau dil project (BAHN 2000, 2 Etappe; AHN) in rinforz economic pil cantun Grischun. Tala spetga ei deplorablamein, specialmein per la Surselva, buca ida en vigur. La Surselva pitescha d’ina depopulaziun surdimensiunala. La petga economica principala, il turissem, noda onn per onn ina marcanta digren da hosps.

Per dar damogn allas pretensiuns d’ina sauna creaziun da valur en Surselva egl avegnir eis ei indispensabel, che la Surselva vegn pli datier dalla gronda regiun metropolitana da Turitg.

La studia Zu(g)kunft Graubünden presenta sut punct 3.4 la situaziun malguessa per la Surselva en caussa factibladad dil traffic individual e traffic public. Ferton che las untgidas da Trin e Flem ein realisadas ei la siala denter Tumein e Schluein cun bia traffic plaun (camiuns, bus, tracturs, vias cuvretgas cun neiv etc.) il crap da scarpetsch per contonscher la part miez e sura dalla Surselva en in temps raschuneivel. Ultra da quei fa il traffic ord igl entir intschess nord ina sviada da 90 km (1 viadi) entuorn Cuera per contonscher la Surselva. Il hosp spontan da damaun viagescha dapli, stat denton pli cuort temps ella destinaziun.

La studia presenta per la Surselva la varianta d’in tunnel da ca. 14 km denter Linthal e Trun e muossa aschia perspectivas per dar alla Surselva novs impuls ed idealas cundiziuns da rama per surmuntar las sfidas d’ina val perifera.

Il project dalla lingia Tödi (Tunnel viafier Linthal 14 km ni Schwanden ca. 20 km entochen Trun) fuss, sper la viafier cun transport da persunas e rauba, era ideala sco via rulonta (nez per autos e camiuns, analog Vereina). La Surselva s’avischinass alla metropola Turitg culla plazza aviatica e fuss contonschibla enteifer 75 minutas. Sper igl enorm potenzial turistic dalla gronda aglomeraziun ei era la purschida dils plaz da lavur el spazi economic denter Turitg e Berna da risguardar sco ulteriura schanza.

Per ils motivs menziunai tschentan ils sutsignai alla regenza las suandontas damondas;

1. Tgei peisa e tgei accent dat la regenza
a. alla studia “Zu(g)kunft Graubünden” cul tunnel varianta Tödi?
b. ad ina pusseivla realisaziun dil project tunnel Tödi?

2. Il tunnel dil Vereina ha migliurau la situaziun economica dall’Engiadina Bassa considerablamein. Ei la regenza dil Grischun buc era dil meini che la part miez e sura dalla Surselva havess ner basegns d’ina colligiaziun sperta ella Bassa per aschia frenar la depopulaziun e dar perspectivas alla giuventetgna?

3. Ha la regenza dil Grischun discurriu davart la studia “Zu(g)kunft Graubünden” e cunzun sur dil project tunnel Tödi cun la regenza dil cantun Glaruna? Sche gie, tgei meini ha la regenza dil cantun Glaruna?

Cuira, ils 29 d'avust 2013

Tomaschett (Breil), Casutt Renatus, Tomaschett-Berther (Trun), Berther (Camischolas), Blumenthal, Caduff, Casutt-Derungs Silvia, Darms-Landolt, Dermont, Giacomelli, Kleis-Kümin, Montalta, Peyer, Sax, Degonda

Resposta da la regenza

Cun il studi "Zu(g)kunft Graubünden" è vegnida fatga l'onn 2001 ina sintesa cumplessiva davart il traffic public da viafier entaifer il chantun Grischun e sin las lingias d'access impurtantas. Il studi è anc adina actual e cuntegna in'entira retscha da visiuns pussaivlas per amplifitgar las colliaziuns da traffic en noss chantun.

Il settember 2012 ha la regenza grischuna deliberà la missiva davart la planisaziun da novas colliaziuns da traffic. A chaschun da la sessiun da december 2012 ha il cussegl grond prendì enconuschientscha da questa preschentaziun. En in studi da concept appartegnent davart novas transversalas da las Alps tras il Grischun èn vegnidas fatgas las emprimas ponderaziuns fundamentalas. Il facit è stà quel che la construcziun da trajects da viafier sutterrans fin a las destinaziuns turisticas dal Grischun sa lascha – pervia dals custs – giustifitgar mo, sch'ils trajects pon vegnir realisads en il rom d'ina nova transversala da las Alps. Perquai che la probabilitad ch'ina nova transversala da las Alps tras il Grischun vegnia realisada è dentant actualmain minimala e perquai ch'in project da quest gener sa chatta per gronda part ordaifer il champ da decisiun dal chantun, n'è il project betg vegnì persequità vinavant. Questas cundiziuns generalas disfavuraivlas ha la regenza gia menziunà en la resposta a l'incumbensa Engler (cf. PCG sessiun d'avust 2013, p. 105 ss.).

Independentamain da quai è er la regenza da l'avis da las sutsegnadras e dals sutsegnaders, ch'ina buna cuntanschibladad dal chantun – ed uschia er da la part sura da la Surselva – saja in motor efficazi per la creschientscha e possia gidar decisivamain a rinforzar l'economia generala e las regiuns. En ils conturns economics e politics actuals duai il chantun Grischun dentant en emprima lingia far las investiziuns planisadas ed instradar projects concrets, uschia ch'i resulta – cun ils stgars meds finanzials ch'èn avant maun – in grond niz per l'economia publica.

Tar quests projects tutgan er amplificaziuns punctualas e sistematicas sin la lingia da la Surselva, sco p.ex. l'engrondiment da la staziun da viafier e da bus a Glion u inslas da dus binaris en il sectur da las cruschadas dal sistem.

Las singulas dumondas pon vegnir respundidas sco suonda:

1. Pervia dal potenzial da dumonda limità e pervia dals gronds custs d'investiziun e da manaschi è la realisaziun d'in tunnel dal Tödi da Linthal a Trun sco mesira isolada pauc probabla en il proxim futur. Ina cuntinuaziun da quest project paress cunzunt cunvegnenta en il rom d'ina nova transversala da las Alps sco lingia Tödi-Greina fin a Biasca.

2. La lingia dal Veraina, che ha custà 820 milliuns francs e ch'è vegnida averta la fin da l'onn 1999, ha gì effects positivs per las regiuns Engiadina bassa/Val Müstair ed ha er purtà in grond niz per l'entira rait da la Viafier retica. Er ina meglieraziun da la colliaziun da la Surselva en direcziun da Cuira e Turitg è da princip segiramain fitg raschunaivla e correcta. Tras l'amplificaziun dal traject da Cuira a Mustér, en spezial er da la staziun da viafier e da bus a Glion, po plinavant vegnir generà entaifer in curt temp in grond niz er per la relaziun da traffic impurtanta tranter l'aglomeraziun da Cuira e la Surselva.

3. Fin ussa n'ha la regenza grischuna betg discutà il project Tödi cun la regenza glarunaisa. Ella è dentant pronta da tematisar proximamain quest project er envers la regenza glarunaisa per vegnir a savair, co ch'ella valitescha eventuals scleriments, che stuessan vegnir fatgs cuminaivlamain, davart ils avantatgs ed ils dischavantatgs d'in tal project.

30 d’october 2013