L'UST elavura actualmain l'emprim concept da spazi per il chantun Grischun. Il concept da spazi è in rom d'orientaziun ed in agid da decisiun per il futur svilup dal territori dal chantun. Il concept da spazi fixescha las finamiras e las strategias dal svilup dal territori e duai servir en il futur sco agid d'orientaziun a las autoritads da tut ils stgalims, particularmain cur ch'ellas planiseschan abitadis, infrastructuras da traffic e d'energia, cur ch'ellas concepeschan cuntradas u cur ch'ellas exequeschan ulteriuras activitads che influenzeschan il territori. Suandond questa finamira elavura l'uffizi chantunal cumpetent il concept da spazi per il chantun Grischun e pia las finamiras dal svilup dal territori per il chantun.
Concretamain vul quai dir ch'il concept da spazi furma la basa per il plan directiv chantunal. Il plan directiv chantunal è l'instrument directiv da la regenza per il svilup dal territori. Il plan directiv determinescha la direcziun per il svilup dal territori dal chantun e fixescha las activitads che gidan a realisar l'urden territorial ch'ins vul cuntanscher. Il plan directiv parta da la situaziun actuala e mussa en ina vista generala dal puntg da vista chantunal il svilup dal territori che vegn prendì en mira per il futur cun resguardar las differentas pretensiuns al territori.
Tenor l'art. 14 da la lescha davart la planisaziun dal territori per il chantun Grischun decida en il chantun Grischun la regenza davart il plan directiv e davart sias midadas. Uschia decida la regenza en suletta cumpetenza tge svilups che duain avair lieu en tge territori. Gist en vista al futur svilup economic dal chantun pari a las sutsegnadras ed als sutsegnaders ch'ina basa pli vasta sco er ina debatta pli ampla davart il plan directiv sajan giavischadas. I para pia cunvegnent ch'il concept da spazi dal Grischun vegnia suttamess al cussegl grond per la discussiun en il rom dal rapport cumplessiv tar la lescha davart il svilup economic.
Las sutsegnadras ed ils sutsegnaders incumbenseschan la regenza da suttametter al cussegl grond il concept da spazi dal Grischun sco element dal rapport cumplessiv ch'è vegnì empermess tar la lescha davart il svilup economic.
Cuira, ils 31 d'avust 2013
Caduff, Nick, Albertin, Berther (Mustér), Berther (Camischolas), Blumenthal, Brandenburger, Caluori, Casanova-Maron, Casty, Casutt Renatus, Cavegn, Claus, Conrad, Darms-Landolt, Dermont, Dosch, Engler, Fallet, Fasani, Florin-Caluori, Furrer-Cabalzar, Geisseler, Hardegger, Hartmann (Champfèr), Hitz-Rusch, Holzinger-Loretz, Jeker, Jenny (Arosa), Joos, Kasper, Kleis-Kümin, Kollegger (Malix), Krättli-Lori, Kunz (Fläsch), Kunz (Cuira), Lorez-Meuli, Michael (Donat), Montalta, Niggli-Mathis (Grüsch), Papa, Parolini, Parpan, Pfäffli, Righetti, Sax, Steck-Rauch, Tenchio, Tomaschett (Breil), Tomaschett-Berther (Trun), Troncana-Sauer, Tscholl, Waidacher, Wieland, Bürgi-Büchel, Coray, Degonda, Jenny-Marugg (Claustra Vitg), Patt, Pfister
Resposta da la regenza
Tar il rapport da la strategia generala per il svilup economic en il Grischun
Ils 29 d'avust 2013 ha il cussegl grond acceptà l'incumbensa Caduff ch'è vegnida inoltrada la sessiun d'avrigl 2013 e che concerna ina pausa tar la revisiun totala da la lescha per il svilup economic. Tenor questa incumbensa sto vegnir elavurà per mauns dal cussegl grond in rapport general che cuntegna ina strategia per ina politica economica integrativa, la quala resguarda las differentas politicas secturialas (p.ex. infrastructura, traffic, organisaziun dal territori, energia ed ambient, taglias, furmaziun e perscrutaziun, cultura e sport, sanadad e vegliadetgna). Tenor il plan da termins duai la missiva davart il "rapport da la strategia generala per il svilup economic" vegnir preschentà al cussegl grond la sessiun d'october 2014.
Tar il concept da spazi dal Grischun (CS GR)
En il program da la regenza 2013-2016 ch'è vegnì deliberà dal cussegl grond la sessiun da december 2012 figurescha tranter auter l'elavuraziun d'ina strategia da realisaziun per il concept dal territori per la Svizra sco punct 2 "Sa sviluppar sco spazi da lavur e da viver attractiv" dal champ d'acziun da las mesiras prioritaras. Quai duai vegnir realisà cun stgaffir in concept chantunal independent da spazi. In tal concept è er indispensabel sco basa per reveder il plan directiv chantunal en consequenza da la revisiun da la lescha federala davart la planisaziun dal territori (LPT 1) ch'è vegnida acceptada ils 3 da mars 2013. In concept da spazi è focussà sin aspects territorials (sfidas, integraziun dal Grischun en il concept da spazi da la Svizra, finamiras territorialas dal svilup, differenziaziuns territorialas e.u.v.).
Il CS GR vegn elavurà en in process participativ cun grond sustegn, al qual collavuran circa 130 represchentantas e represchentants da regiuns, d'organisaziuns e d'uffizis dal Grischun. En il rom da totalmain set occurrenzas pon quellas represchentantas e quels represchentants s'engaschar activamain tar la concepziun dal concept da spazi e gidar a crear il resultat.
L'urari prevesa ch'ils cuntegns principals dal concept da spazi vegnian elavurads l'onn 2013 en ils differents gremis accumpagnants. Per l'onn 2014 èn previsas ulteriuras occurrenzas, duas rundas da consultaziun en scrit sco er la redacziun definitiva dal concept da spazi. Sin fundament da quest process d'elavuraziun cun grond sustegn duai il CS GR vegnir preschentà la fin da l'onn 2014 a la regenza sco basa per reveder il plan directiv chantunal.
Coordinaziun da la strategia generala per il svilup economic e dal concept da spazi GR
Il rapport da la strategia generala per il svilup economic ed il CS GR han – or da l'optica dal cuntegn – paucs puncts cuminaivels. Entant ch'il rapport davart il svilup economic prenda en mira ina strategia generala per la politica economica, è il concept da spazi focussà sin ina disposiziun dal territori uschè optimala sco pussaivel.
Areguard il temp duai il rapport da la strategia generala per il svilup economic vegnir deliberà da la regenza la stad 2014, entant ch'il CS GR vegn suttamess a la regenza pir la fin da l'onn 2014. Il rapport davart l'economia vegn pia terminà probablamain var in mez onn avant il concept da spazi.
Questa graduaziun dal temp è d'avantatg per la coordinaziun dal rapport davart l'economia cun il CS GR che vegn prendida en mira cun questa incumbensa. Uschia èsi garantì per l'ina ch'il cussegl grond po debattar la sessiun d'october 2014 il medem mument sur dal rapport davart l'economia sco er sur la direcziun dal concept da spazi che vegn ad esser avant maun sco sboz quel mument. Da l'autra vart porscha quest proceder l'avantatg che la regenza po deliberar il concept da spazi la fin da l'onn 2014 en enconuschientscha da las decisiuns dal cussegl grond ch'èn relevantas per il concept da spazi. Questa adattaziun areguard il temp ed il cuntegn maina ad ina coordinaziun optimala dal rapport davart l'economia e dal concept da spazi. L'incumbensa qua avant maun po pia vegnir acceptada sin basa da questas explicaziuns.
23 d'october 2013