En ses program 2013-2016 ha la regenza grischuna declerà la promoziun da l'economia sco tema central. Areguard las taglias ha ella menziunà che «la buna posiziun tar la grevezza fiscala tras la taglia sin il gudogn» stoppia vegnir mantegnida (missiva nr. 11/2011-2012, p. 1288). En sia intenziun strategica ha la regenza previs da «mantegnair e meglierar levamain la cumpetitivitad dal Grischun sco lieu d'interpresas cun agid da taglias moderadas sin il gudogn e sin il chapital» (punct central da svilup 24).
D'ina «buna posiziun tar la grevezza fiscala tras la taglia sin il gudogn» na pon ins en il fratemp displaschaivlamain betg pli discurrer, cunzunt betg tar las interpresas pitschnas e mesaunas: Tar in gudogn net dad 80'000.– francs e cun in chapital da 2 milliuns francs resultan en il Grischun (a Cuira) taglias da 21'370.– francs. Dapli taglias ston mo anc vegnir pajadas a Basilea ed a Delémont. Schizunt tar societads anonimas pitschnas (gudogn da 30'000.– francs e chapital da 100'000.– francs) è il Grischun sin la 19avla plazza da la rangaziun dals chantuns (funtauna: administraziun federala da taglia, Grevezza fiscala en Svizra, 2013). Quai mussa ch'il Grischun n'è – per differentas categorias da societads da chapital – betg pli cumpetitiv en la cumparegliaziun da taglia interchantunala. Ina reducziun da la tariffa da taglia d'actualmain 5,5 % a 4,5 % è perquai ina necessitad che sto – en vista als votums fatgs a chaschun dal tractament da l'intervenziun Nigg (vesair protocol dal cussegl grond dals 24 d'october 2012, p. 385 ss.) – vegnir restrenschida al chantun. En l'avegnir duain il chantun e las vischnancas pia avair differentas tariffas da taglia en la lescha chantunala da taglia.
Per mantegnair il Grischun sco lieu d'interpresas, ed en vista al fatg che la tariffa da la taglia sin il gudogn na po, per motivs da la politica da finanzas, actualmain betg vegnir sbassada anc pli fitg, duain las pussaivladads d'amortisar investiziuns sin donn e cust dal gudogn dentant vegnir concepidas da medema maniera sco las praticas respectivas dal chantun il pli attractiv. Amortisaziuns rinforzan la basa finanziala da las interpresas, segireschan lur independenza e promovan uschia ulteriuras investiziuns. Las tariffas d'amortisaziun vegnan fixadas da l'administraziun da taglia. Tenor l'avis da las sutsegnadras e dals sutsegnaders ston vegnir auzadas las tariffas d'amortisaziun (sco p.ex. amortisaziuns sin chasas d'abitar e da persunal da mo 2 % a 4 %, sin edifizis industrials da 4 % a 8 %, sin construcziuns moviblas da 20 % a 25 %). Il sistem da las amortisaziuns immediatas sto vegnir structurà uschia, ch'il Grischun è concepì en quest grà – areguard la singula activa – mintgamai da medema maniera sco il chantun il pli attractiv. D'ina adattaziun da las tariffas d'amortisaziun e da la pratica d'amortisaziuns immediatas na profitassan betg mo las persunas giuridicas, mabain er las persunas cun activitad da gudogn independenta (firmas singulas, societads collectivas e commanditaras).
Per resumar incumbenseschan las sutsegnadras ed ils sutsegnaders la regenza da realisar ina u l'autra ubain tuttas duas da las suandantas pretensiuns:
- reducir la taglia per las persunas giuridicas per 1 % a da nov 4,5 % sco nova tariffa da taglia chantunala e laschar la tariffa da taglia per las vischnancas a 5,5 % e/u
- las tariffas d'amortisaziun ston mintgamai vegnir auzadas sin il nivel dal chantun il pli attractiv tenor la valur da facultad activada, ed il sistem da las amortisaziuns immediatas sto mintgamai vegnir concepì da medema maniera sco il sistem d'amortisaziun il pli attractiv en la cumparegliaziun interchantunala.
Cuira, ils 22 d'october 2013
Kunz (Cuira), Barandun, Bezzola (Zernez), Burkhardt, Casanova-Maron, Claus, Clavadetscher, Engler, Fontana, Furrer-Cabalzar, Giacomelli, Hartmann (Cuira), Heiz, Hitz-Rusch, Holzinger-Loretz, Jenny (Arosa), Krättli-Lori, Kunz (Fläsch), Marti, Michael (Castasegna), Niggli (Samedan), Pfäffli, Rosa, Steck-Rauch, Stiffler (Cuira), Troncana-Sauer, Valär, Vetsch (Pragg-Jenaz), Wieland, Zweifel-Disch, Candrian, Felix (Scuol), Jenny (Claustra), Kuoni, Patt
Resposta da la regenza
La fracziun da la PLD pretenda d'ina vart ina reducziun da la tariffa da la taglia sin il gudogn da 5,5 a 4,5 pertschient per la taglia chantunala ed uschia er per la taglia da cultus (art. 3 al. 2 da la lescha da taglia per il chantun Grischun [LT]). Da l'autra vart duain las tariffas d'amortisaziun vegnir amortisadas al chantun tras la regulaziun la pli favuraivla per l'economia.
En la sessiun d'october 2012 ha il cussegl grond – cuntrari a la proposta da la regenza – refusà l'incumbensa Nigg che pretendeva da reducir la tariffa da la taglia sin il gudogn da 5,5 a 4,5 pertschient per la taglia chantunala, per la taglia supplementara e per la taglia da cultus. En la sessiun d'october 2013 è l'incumbensa Kunz, che pretendeva da reducir la taglia sin il gudogn ad ina chargia fiscala da 12 u 13 pertschient per tut las suveranitads fiscalas, vegnida retratga pervia da las perditas calculadas. En la resposta a questa incumbensa è la regenza s'exprimida cunter in spustament da las grevezzas tranter las vischnancas ed il chantun en il rom da la fixaziun da las tariffas da la taglia sin il gudogn, perquai che quai avess cuntrafatg a las directivas da la politica da finanzas dal cussegl grond (PCG 2 | 2013/2014, p. 226); quai duai restar uschia.
Tras la reducziun proponida per la tariffa da la taglia sin il gudogn sa reduciss la grevezza fiscala effectiva da 16,68 a 15,91 pertschient. Tar retgavs da 65 milliuns francs da la taglia sin gudogn resultassan circa 11,4 milliuns francs damain entradas per il chantun e circa 1,2 milliuns francs per las baselgias chantunalas. La distgargia per las persunas giuridicas importass 0,77 puncts procentuals tar la taglia sin il gudogn. En la cumparegliaziun interchantunala da las grevezzas sa meglierassan las cifras dal chantun levamain.
La verificaziun ed in'eventuala reducziun da la grevezza tras la taglia sin il gudogn, er en la relaziun interchantunala, fan part dal program da la regenza 2013-2016 (punct central da svilup "politica fiscala"; PS 24; missiva carnet nr. 11 / 2011-2012, p. 1255 ss.). Las mesiras tar la taglia sin il gudogn na pon dentant vegnir realisadas betg en moda isolada resguardond mo il program da la regenza. Ellas ston vegnir consideradas sut l'aspect da la concurrenza fiscala interchantunala, da la finanziabladad da las entradas pli pitschnas, che n'è en mintga cas betg vegnida meglierada tras ils conclus da la refurma da la gulivaziun da finanzas, da l'effect da la mesira sin il Grischun sco lieu economic e.u.v. Il cussegl grond ha incumbensà la regenza da preschentar ina vista generala resp. ina strategia per promover il svilup economic dal chantun Grischun (incumbensa Caduff concernent ina pausa tar la revisiun totala da la lescha per il svilup economic). Questa incumbensa è vegnida acceptada cun 105 cunter 0 vuschs (PCG 1 | 2013/2014, p. 12) e las lavurs correspundentas han gia cumenzà. La regenza è da l'avis che la dumonda da l'autezza da la taglia sin il gudogn dal chantun, da la taglia supplementara e da la taglia da cultus stoppia vegnir discutada e decidida ensemen cun questa consideraziun cumplessiva dal lieu economic grischun. En quest rom sto er vegnir resguardada la valur directiva menziunada ch'il cussegl grond ha fixà concernent il spustament da las grevezzas tranter las vischnancas ed il chantun. En vista a la finanziabladad da la mesira ston ins er resguardar il svilup da la refurma da l'imposiziun da taglia sin interpresas III e sias consequenzas pussaivlas per las finanzas dal chantun, nua ch'i smanatschan betg mo perditas da la taglia sin il gudogn, mabain er damain entradas da la NGF da la confederaziun.
La segunda part da l'incumbensa pretenda in augment da las tariffas d'amortisaziun per pudair guntgir las pussaivladads limitadas da la reducziun da la taglia sin il gudogn. Sche las perditas da la reducziun da la tariffa da la taglia sin il gudogn n'èn dentant betg finanziablas, na pon il chantun e las vischnancas er betg sa prestar las perditas che resultan da l'augment da la tariffa d'amortisaziun. Mo perquai che questas perditas èn main transparentas, n'èn ellas betg main realas. Er giuridicamain è la regenza per part da l'avis che questa pretensiun na saja betg realisabla. Tenor ils art. 32 ed 81 LT pon vegnir deducidas las amortisaziuns betg motivadas da la fatschenta. Uschia ston las tariffas d'amortisaziun, che vegnan fixadas da la regenza (e betg da l'administraziun da taglia), sa drizzar tenor la reducziun effectiva da la valur dals bains d'investiziun respectivs. Plinavant ston las tariffas d'amortisaziun esser identicas per la confederaziun ed il chantun, perquai che divergenzas na fissan materialmain betg giustifitgablas ed administrativamain betg raschunaivlas e cuntrafaschessan al princip da l'armonisaziun fiscala verticala. Er dastgassan differentas tariffas d'amortisaziun strusch sa cunfar cun l'art. 84 da la constituziun chantunala, che prevesa da tegnair uschè bass sco pussaivel las grevezzas administrativas per interpresas. In augment da las tariffas ordinarias d'amortisaziun vegn perquai refusà da la regenza. Percunter exista en il sectur da las amortisaziuns immediatas dapli libertad d'agir, perquai ch'il dretg federal renviescha en quest reguard a las regulaziuns chantunalas. Perquai è la regenza pronta d'examinar l'autezza da las amortisaziuns immediatas, e quai cun s'orientar a la correctadad objectiva da la soluziun e betg a las tariffas d'amortisaziun las pli autas d'in auter chantun.
La regenza è pronta d'acceptar l'incumbensa cun questas restricziuns.
22 da schaner 2014