En il "model directiv concernent il provediment da la sanadad dal chantun Grischun" ch'è vegnì preschentà dacurt, ha il departament da giustia, segirezza e sanadad (DGSS) mussà, co che las structuras dal provediment da la sanadad dal Grischun ston vegnir concepidas per garantir en l'avegnir in sistem da sanadad che resguarda tut las regiuns e ch'è economicamain supportabel. Il model directiv cuntegna tschintg mesiras, cun las qualas duain vegnir realisadas las structuras planisadas dal provediment da la sanadad. Il model directiv è vegnì distribuì ad in vast circul d'adressatas ed adressats. Tenor il departament duai uschia vegnir iniziada ina discussiun extendida davart las structuras prendidas en mira e davart las mesiras correspundentas en las regiuns ed en la publicitad interessada.
Las sutsegnadras ed ils sutsegnaders tschentan las suandantas dumondas a la regenza:
1. Tge reacziuns hai dà d'ordaifer sin las mesiras ch'èn previsas en il model directiv per realisar las structuras dal provediment da la sanadad ch'il departament ha prendì en mira?
2. Co sa preschenta l'urari per realisar las mesiras previsas en il model directiv?
3. En tge stadi actual sa chatta il svilup da l'organisaziun vers ils centers da sanadad previs en las singulas regiuns resp. vers las regiuns da provediment da la sanadad?
Cuira, ils 3 da december 2013
Gunzinger, Kleis-Kümin, Hardegger, Augustin, Bezzola (Zernez), Bleiker, Blumenthal, Brandenburger, Bucher-Brini, Buchli-Mannhart, Burkhardt, Caluori, Casanova-Maron, Casty, Casutt Renatus, Casutt-Derungs Silvia, Claus, Conrad, Darms-Landolt, Dermont, Dosch, Fallet, Felix, Florin-Caluori, Foffa, Furrer-Cabalzar, Gartmann-Albin, Giacomelli, Grass, Hartmann (Champfèr), Heiz, Hitz-Rusch, Holzinger-Loretz, Jaag, Jeker, Jenny (Arosa), Kasper, Koch (Tumein), Kollegger (Cuira), Kollegger (Malix), Komminoth-Elmer, Krättli-Lori, Kunz (Cuira), Mani-Heldstab, Märchy-Caduff, Nick, Niggli-Mathis (Grüsch), Noi-Togni, Papa, Parolini, Peyer, Pfäffli, Pfenninger, Pult, Rosa, Stiffler (Tavau Plaz), Stiffler (Cuira), Thöny, Tomaschett-Berther (Trun), Trepp, Troncana-Sauer, Waidacher, Wieland, Deplazes, Hauser, Hensel, Jenny-Marugg (Claustra Vitg), Monigatti, Patt
Resposta da la regenza
La regenza respunda las dumondas sco suonda:
1. En general è il model directiv vegnì percepì en moda fitg positiva. Reacziuns positivas concretas sin las mesiras ch'èn vegnidas previsas dal departament per endrizzar las structuras en mira dal provediment da la sanadad hai dà fin oz cunzunt areguard la creaziun planisada da regiuns da provediment da la sanadad ed areguard ils impuls per furmar ina suletta instituziun responsabla per mintga regiun da provediment da la sanadad.
2. La discussiun ch'è vegnida lantschada cun la publicaziun dal model directiv è in emprim pass per realisar las mesiras previsas. Las prestaziuns d'utilitad publica dals ospitals vegnan indemnisadas gia oz en moda adequata, la repartiziun dal credit global sin ils ospitals sto eventualmain vegnir adattada. Er il provediment ambulant garantescha il chantun gia oz tenor las pussaivladads ch'el ha en ses sectur. En il rom da lur capacitads persunalas sustegnan il departament e l'uffizi da sanadad tut las activitads che gidan a furmar regiuns da sanadad. Tenor la planisaziun actuala vegn suttamess al cussegl grond l'onn 2016 in project per realisar las mesiras previsas en il model directiv per furmar regiuns da sanadad.
3. Il stadi actual dal svilup organisatoric en las singulas regiuns variescha fitg. La tabella qua sutvart dat ina survista davart il dumber da las instituziuns responsablas ch'èn activas en las singulas regiuns d'ospital en ils secturs da l'ospital, da las chasas da persunas attempadas e da tgira e da la spitex. En general pon ins partir dal fatg che dapli instituziuns responsablas ch'ina regiun ha e dapli basegn d'agir ch'igl è avant maun en questa regiun. Per la regiun d'ospital da Cuira sto questa constataziun vegnir relativada. Sco menziunà en il model directiv vegn la regiun d'ospital da Cuira – pervia da sia grondezza – dividida per motivs pratics en subregiuns per las chasas da persunas attempadas e da tgira sco er per ils servetschs da la spitex. En las regiuns dal Partenz e da la Val Müstair è gia vegnida cuntanschida la finamira dal departament, numnadamain che las prestaziuns vegnan furnidas en tut ils secturs tras in sulet purschider.
12 da favrer 2014