Suenter che la lescha chantunala davart las taxas turisticas (LTT) è vegnida refusada, èn differentas vischnancas e regiuns turisticas actualmain londervi da reveder lur relaschs davart la finanziaziun dal turissem. Ins ha spetgà da reveder quests relaschs, perquai che bleras persunas responsablas faschevan quint cun ina soluziun chantunala. En il rom da l'elavuraziun stattan ussa bleras vischnancas davant dumondas e problematicas sumegliantas.
En blers lieus sa tschenta en spezial la dumonda da simplifitgar la finanziaziun dal turissem, tras quai ch'ins na definescha per exempel betg la pernottaziun sco basa da calculaziun, mabain tras quai ch'ins giavischass in'autra basa da calculaziun. La basa legala valaivla per incassar ina taxa da cura ed ina taxa per promover il turissem è reglada en la lescha chantunala davart las taglias communalas e davart las taglias da baselgia (LTCTB), en spezial en ils art. 22 e 23. Uschenavant ch'igl è giavischà da simplifitgar quest sistem, dovri ina midada en questa lescha. Tras la revisiun da la LTCTB pudess la basa legala vertenta per incassar ina taxa da cura ed ina taxa per promover il turissem vegnir cumplettada resp. substituida tras ina taxa turistica communala (analogamain a l'art. 38 LTT).
Cun crear en la LTCTB basas legalas chantunalas che han il medem dumber da regulaziuns sco tar las disposiziuns vertentas concernent ina taxa da cura ed ina taxa per promover il turissem (art. 2 al. 3 ed en ils art. 22 e 23 LTCTB) pudessan las vischnancas survegnir in instrumentari giuridic modern per metter la finanziaziun dal turissem e la promoziun da las structuras da las destinaziuns sin in nov fundament. Uschia vegniss stgaffida la pussaivladad da suttametter a la taglia la capacitad e betg la pernottaziun. Qua tras pudess l'interprendider innovativ, che ha success, vegnir remunerà cun ina grevezza degressiva, e la finanziaziun dal turissem pudess vegnir simplifitgada considerablamain.
Las sutsegnadras ed ils sutsegnaders incumbenseschan perquai la regenza da suttametter al cussegl grond ina missiva tar ina revisiun parziala da la lescha davart las taglias communalas e davart las taglias da baselgia (LTCTB), en la quala vegnan – tras l'adattaziun da l'art. 2 al. 3 e tras l'integraziun d'in nov art. 23a – creadas las basas chantunalas per che las vischnancas possian introducir taxas turisticas sco alternativa resp. cumplettaziun da las taxas da cura e da las taxas per promover il turissem d'enfin ussa. Quai cun laschar a las vischnancas la libertad da decider, sch'ellas vulan incassar vinavant taxas da cura e taxas per promover il turissem u sch'ellas vulan introducir empè da quai ina nova taxa turistica communala.
La revisiun parziala da la LTCTB duai sa basar sin scleriments giuridics che resguardan er la giurisdicziun actuala da la dretgira administrativa e dal tribunal federal resp. duai cuntegnair enconuschientschas ch'èn vegnidas fatgas en il rom dals scleriments preliminars per l'introducziun da la LTT. A las vischnancas duai vegnir messa a disposiziun ina lescha da model cun explicaziuns correspundentas per incassar ina taxa turistica communala.
Cuira, ils 4 da december 2013
Caduff, Troncana-Sauer, Parolini, Aebli, Albertin, Barandun, Berther (Mustér), Berther (Camischolas), Blumenthal, Buchli-Mannhart, Burkhardt, Caluori, Casty, Casutt Renatus, Casutt-Derungs Silvia, Cavegn, Conrad, Darms-Landolt, Della Vedova, Dermont, Dosch, Fallet, Felix, Florin-Caluori, Fontana, Geisseler, Grass, Gunzinger, Hardegger, Hartmann (Champfèr), Holzinger-Loretz, Jeker, Joos, Kasper, Kleis-Kümin, Koch (Tumein), Kollegger (Malix), Komminoth-Elmer, Lorez-Meuli, Montalta, Niederer, Niggli (Samedan), Niggli-Mathis (Grüsch), Papa, Pedrini, Perl, Pfenninger, Pult, Rosa, Sax, Stiffler (Tavau Plaz), Thöny, Tomaschett (Breil), Tomaschett-Berther (Trun), Trepp, Zanetti, Degonda, Jenny-Marugg (Claustra Vitg), Paterlini, Patt
Resposta da la regenza
Cun l'incumbensa vegn la regenza dumandada da suttametter al cussegl grond ina missiva tar ina revisiun parziala da la lescha davart las taglias communalas e davart las taglias da baselgia (LTCTB), cun la quala duain vegnir creadas las basas per che las vischnancas possian introducir ina nova taxa turistica. La nova taxa duai permetter a las vischnancas d'imponer taglia sin las capacitads empè sin las pernottaziuns. Qua tras possia l'interprendider innovativ, che ha success, vegnir remunerà cun ina grevezza degressiva, e la finanziaziun dal turissem possia vegnir simplifitgada. Las vischnancas duain pudair decider sezzas, sch'ellas vulan restar tar il sistem actual cun las taxas da cura e cun las taxas per promover il turissem u sch'ellas vulan introducir empè da quai ina nova taxa turistica communala. Per las vischnancas duai ultra da quai vegnir elavurada ina lescha da model cun explicaziuns correspundentas per incassar ina taxa turistica communala.
Areguard il cuntegn duai questa taxa s'orientar a la taxa turistica chantunala refusada dal suveran; en la LTCTB duain dentant vegnir reglads mo paucs puncts centrals. La taxa turistica pretendida n'è betg ina taglia che stuess vegnir introducida da tut las vischnancas, mabain è mo in'alternativa a las taxas existentas (taxa da cura e taxa per promover il turissem). Uschia poi vegnir tegnì quint dals puncts principals ch'eran vegnids crititgads en connex cun la taxa turistica chantunala refusada, e la voluntad dal suveran po vegnir respectada.
En l'incumbensa vegni er pretendì ch'i vegnia mess a disposiziun a las vischnancas in agid d'execuziun en furma d'ina lescha da model cun explicaziuns. Uschia duain vegnir facilitadas las lavurs legislativas da las vischnancas e vegnir prendida en mira in'unificaziun da la nova taxa.
La regenza è pronta d'acceptar questa incumbensa.
12 da mars 2014