„L'electromobilitad presta ina contribuziun impurtanta a favur d'ina flotta da vehichels resp. d'ina mobilitad cun dapli effizienza energetica“, uschia la posiziun dal cussegl federal dals 22 d'avust 2012 tar ina moziun da la cumissiun per ambient, planisaziun dal territori ed energia (CAPTE) ch'è vegnida acceptada.
Tut tenor l'intent previs ed il champ d'applicaziun han vehichels a tracziun electrica clers avantatgs en cumparegliaziun cun vehichels cun motors da combustiun. Numerus pajais, sco p.ex. la Norvegia cun ina fitg gronda quota d'electricitad producida tras forza idraulica, promovan intensivamain l'electromobilitad tras mesiras fitg differentas.
Las sutsegnadras ed ils sutsegnaders incumbenseschan la regenza da sclerir las schanzas d'in diever e d'ina promoziun da l'electromobilitad en il chantun Grischun.
En spezial duain vegnir sclerids en quest connex ils suandants aspects areguard la durabilitad:
• duvrar electricitad producida tras forza idraulica indigena empè d'importar diesel e benzin, en spezial sut l'aspect dal svilup actual dals pretschs d'electricitad;
• effizienza da l'energia, emissiuns e consequenzas per la bilantscha da CO2;
• contribuziun a l'accumulaziun futura d'energia per integrar meglier l'energia solara e l'energia dal vent sco er per optimar l'utilisaziun da la rait;
• pussaivladads d'integrar l'electromobilitad en concepts da mobilitad e da traffic innovativs resguardond soluziuns cun vehichels a duas rodas ed il traffic public;
• basegn d'agir e premissas per ina promoziun efficazia;
• potenzials per il Grischun sco lieu da perscrutaziun.
Cuira, ils 5 da december 2013
Joos, Kappeler, Fontana, Baselgia-Brunner, Blumenthal, Bondolfi, Brandenburger, Bucher-Brini, Buchli-Mannhart, Caduff, Casty, Casutt Renatus, Casutt-Derungs Silvia, Cavegn, Clavadetscher, Darms-Landolt, Davaz, Della Vedova, Dermont, Dosch, Fallet, Fasani, Florin-Caluori, Frigg-Walt, Geisseler, Hardegger, Jaag, Kleis-Kümin, Koch (Tumein), Kollegger (Cuira), Kollegger (Malix), Locher Benguerel, Lorez-Meuli, Märchy-Caduff, Michael (Donat), Niederer, Parolini, Peyer, Pfenninger, Pult, Righetti, Sax, Stiffler (Tavau Plaz), Thöny, Tomaschett (Breil), Tomaschett-Berther (Trun), Trepp, Zanetti, Deplazes, Michel (Igis)
Resposta da la regenza
L'incumbensa Joos sa referescha ad ina moziun dal cussegl naziunal (12.3652; cumissiun per ambient, planisaziun dal territori ed energia CAPTE) cun il titel „Electromobilitad. Masterplan per in svilup intelligent“ sco er a la posiziun dal cussegl federal dals 22 d'avust 2012. Il cussegl federal è vegnì incumbensà d'elavurar in masterplan per pussibilitar al traffic individual electric da s'etablir pli svelt sin il martgà. En sia posiziun ha il cussegl federal menziunà che l'administraziun promovia gia oz che l'electromobilitad possia s'etablir sin il martgà, p.ex. cun favurisar vehichels effizients areguard l'energia u cun sustegnair projects da pilot e da demonstraziun. La moziun portia in sustegn politic supplementar per cuntinuar cun las activitads actualas a favur da la promoziun da l'electromobilitad. Perquai ha il cussegl federal proponì d'acceptar la moziun.
Las sutsegnadras ed ils sutsegnaders da l'incumbensa Joos spetgan da la regenza ch'ella sclereschia las schanzas che pudessan resultar tras il diever e tras la promoziun da l'electromobilitad en il chantun Grischun. En spezial duain vegnir sclerids en quest connex ils aspects areguard la durabilitad.
Ils scleriments da l'uffizi d'energia e da traffic han mussà che vehichels electrics dovran circa 50 pertschient damain energia che vehichels effizients cumparegliabels cun motors da diesel. Quest puntg da vista è dentant mo admissibel, sche l'electricitad, che vegn duvrada per la tracziun dals vehichels electrics, deriva da funtaunas regenerablas. Sco descrit en l'incumbensa Joos dessi la pussaivladad da duvrar electricitad producida tras forza idraulica indigena empè da carburants fossils (benzin e diesel). Resguardond las cundiziuns generalas qua survart han vehichels electrics ina bilantscha positiva per l'ambient areguard l'effizienza ed areguard l'emissiun da CO2 en cumparegliaziun cun vehichels cun motors da carburants fossils.
La capacitad da las battarias ha fatg progress considerabels ils ultims onns. Tuttina è la battaria d'in vehichel electric anc adina il punct critic areguard la distanza pussaivla, ils ciclus da chargiar, la durada da vita e la bilantscha per l'ambient. Il diever evident sco accumulaturs d'energia per ils novs purtaders d'energia regenerabla, che vegnan producids en moda volatila, è pauc sviluppada cun la tecnologia da battarias actuala, perquai ch'ils ciclus da chargiar las battarias èn limitads e perquai che las tecnologias necessarias na vegnan betg anc applitgadas en furma da raits electricas intelligentas. Per l'avegnir èsi imaginabel che l'electromobilitad po esser in agid per regular la rait.
Ils vehichels electrics vendids oz èn adattads primarmain per trajects curts e per champs d'acziun determinads. Per che l'electromobilitad possia s'etablir vinavant sin il martgà, na dovri betg mo in ulteriur svilup tecnic da tut las cumponentas, mabain cunzunt er infrastructuras per chargiar ils vehichels.
L'electromobilitad po esser gia oz ina cumponenta d'in concept da traffic innovativ. In potenzial vesa la regenza en in emprim pass cunzunt tar trajects curts (pendularis) e/u tar purschidas da park and ride. Qua stoi dentant vegnir guardà che la buna purschida actuala dal traffic public na vegnia betg concurrenzada.
L'electromobilitad na sa lascha betg promover en territoris pitschens resp. è in svilup tecnic che vegn actualmain stabilì e sviluppà sin l'entir mund. Plinavant è ina promoziun mo giustifitgabla oz ord vista da la regenza grischuna, sche l'energia necessaria per charrar deriva a 100 pertschient da funtaunas regenerablas.
La regenza è persvadida che l'electromobilitad po furnir en l'avegnir ina contribuziun considerabla a favur d'ina flotta da vehichels resp. d'ina mobilitad effizienta areguard l'energia. En coordinaziun cun las activitads sin plaun federal è ella perquai pronta d'examinar pli detagliadamain las schanzas da l'electromobilitad per il chantun Grischun. En quest senn vegn l'incumbensa acceptada.
6 da favrer 2014