Navigaziun principala

Cuntegn da la pagina

Dumonda Holzinger-Loretz concernent la bilantscha da la realisaziun dal nov dretg da la protecziun d'uffants e da creschids

Sessiun: 23.04.2014
Il 1. da schaner 2013 è entrà en vigur il nov dretg da la protecziun d'uffants e da creschids. Las tschintg autoritads per la protecziun d'uffants e da creschids (APUC) han surpiglià las incumbensas da las anteriuras autoritads tutelaras. Ultra da quai èn las anteriuras avugadias uffizialas vegnidas remplazzadas da las curatellas professiunalas.

Perquai ch'igl è passà in zic dapli ch'in onn dapi l'introducziun da las APUC, fatsch jau las suandantas dumondas a la regenza:

1. Co giuditgescha la regenza il stadi da la realisaziun dal dretg nov?

2. Èn las organisaziuns novas e las structuras novas sa cumprovadas?

3. En tge secturs exista anc in basegn d'agir e tge mesiras èn gia vegnidas prendidas?

4. Co statti cun las pretensiuns envers las mandatarias ed ils mandataris privats?

5. Co è la collavuraziun tranter las APUC e las curatellas professiunalas?

6. Co vegn garantida la pratica giuridica unitara respectivamain l'armonisaziun da las proceduras tar las tschintg APUC?

7. Han las APUC meds finanzialas avunda per ademplir lur incumbensas e co sa preschenta la situaziun dal persunal?

Cuira, ils 23 d'avrigl 2014

Holzinger-Loretz, Geisseler, Buchli-Mannhart (Stussavgia Plaz), Albertin, Baselgia-Brunner, Bezzola (Zernez), Blumenthal, Brandenburger, Bucher-Brini, Burkhardt, Casanova-Maron, Casutt Renatus, Casutt-Derungs Silvia, Cavegn, Conrad, Davaz, Dermont, Dosch, Engler, Fasani, Fontana, Frigg-Walt, Furrer-Cabalzar, Giacomelli, Gunzinger, Hardegger, Hartmann (Champfèr), Heiz, Hitz-Rusch, Jeker, Jenny (Arosa), Kasper, Kleis-Kümin, Kollegger (Cuira), Komminoth-Elmer, Krättli-Lori, Kunz (Fläsch), Kunz (Cuira), Lorez-Meuli, Mani-Heldstab, Märchy-Caduff, Marti, Michael (Donat), Müller (Tavau Plaz), Niederer, Papa, Parpan, Pedrini, Perl, Peyer, Pfäffli, Pfenninger, Rosa, Steck-Rauch, Stiffler (Tavau Plaz), Troncana-Sauer, Waidacher, Wieland, Zanetti, Baetschi, Berther (Segnas), Jenny-Marugg (Claustra Vitg), Müller (Haldenstein), Spreiter

Resposta da la regenza

1. Ils cas da las autoritads tutelaras èn vegnids surpigliads tuts. Las APUC èn actualmain intensivamain vidlonder da transferir las mesiras dal dretg vegl da la protecziun da creschids en il dretg nov. Per quest intent exista in termin transitoric legal fin la fin da l'onn 2015. Sin fundament da las numerusas sfidas durant la fasa d'installaziun datti in tschert retard tar quests transferiments. Per il 1. da fanadur 2014 entra gia en vigur la proxima revisiun da la lescha (midada dal CCS en il sectur da la tgira genituriala) che vegn supplementarmain a pretender bler da las APUC. Fin ch'il dretg nov è realisà e fin ch'ina pratica applitgabla è s'etablida, fin che las proceduras èn optimadas e fin che tut ils puncts cuminaivels cun ils numerus partenaris da collavuraziun funcziunan en moda irreproschabla, ston las APUC survegnir er vinavant dapli temp.

2. L'introducziun dal nov dretg da la protecziun d'uffants e da creschids è ina refurma cun dimensiuns istoricas, ch'è vegnida designada da differentas varts sco "project dal tschientaner". La valitaziun po pia vegnir fatga, sch'ins prenda serius la chaussa, pir suenter 3 fin 5 onns. Ma las emprimas experientschas suenter bunamain 1 onn e mez han mussà che nus dal chantun Grischun essan sin ina buna via.

3. Il basegn da persunal è vegnì sutvalità en general – sco en l'entira Svizra – cunzunt er areguard la lavur supplementara ch'è resultada pervia dal transferiment da las mesiras da la protecziun da creschids en il dretg nov, dentant er pervia da las lavurs d'installaziun ch'èn stadas cumplessivas. Las tschintg APUC han pia survegnì per il schaner 2014 en tut 500 pertschients da plazzas supplementaras ch'èn limitadas fin mez 2016.

En quai che pertutga las proceduras èsi vegnì constatà en spezial che la procedura da rendaquint per ils custs da la gestiun dals mandats dovra bler temp – qua vegn examinada ina simplificaziun tenor l'incumbensa KleisKümin al cussegl grond ch'è vegnida acceptada ils 13 da zercladur 2014 en il senn da la regenza.

4. Las pretensiuns envers las mandatarias ed ils mandataris professiunals e privats (Primas) èn s'augmentadas en general, quai che ha dentant mo per part in connex cun il dretg nov. Sin il champ da las assicuranzas socialas, dal traffic bancar, dals uffizis e da las autoritads s'augmentan las pretensiuns formalas en general. Il CCS statuescha en cas da donns da la facultad da nov ina responsabladad directa dal chantun. L'ordinaziun dal cussegl federal davart l'administraziun da la facultad en il rom d'ina curatella u avugadia (OAFCT) ha chaschunà gronda lavur supplementara en l'administraziun ed en las formalitads.

Las APUC scoleschan e cusseglian las mandatarias ed ils mandataris privats uschenavant sco pussaivel ed han edì in mussavia detaglià per la gestiun d'in mandat (cf. www.kesb.gr.ch). Quest mussavia serva sco ovra da consultaziun. Là nua ch'igl è pussaivel vegni tschertgà il discurs direct, sch'i dat problems.

Ord vista da singuls Primas pon las pretensiuns bain esser s'augmentadas fermamain, ma quai sto er vegnir considerà en connex cun las per part fitg differentas praticas da las autoritads tutelaras anteriuras (p.ex. rendaquints a bucca u rendaquints senza l'inoltraziun da quittanzas e.u.v.).

5. La collavuraziun cun las curatellas professiunalas sco partenaris ils pli impurtants è l'incumbensa da las singulas APUC ch'èn er lur organs da surveglianza. Actualmain è centrala l'instrucziun da las curatellas professiunalas davart ils novs andaments da procedura e davart las implicaziuns dal dretg nov (p.ex. mantegniment e promoziun da l'autodeterminaziun, mesiras specificas, administraziun da la facultad [OAFCT], adattaziun da las mesiras existentas dal dretg vegl).

Abstrahà da las sfidas specificas per la regiun funcziuna la collavuraziun – tenor la valitaziun dals manaders da las APUC – bain fin fitg bain. Las curatellas professiunalas han fundà en il chantun Grischun il settember 2012 la federaziun grischuna da las procuraturas professiunalas e dals procuraturs professiunals (FGPP), ch'è anc en la fasa da constituziun.

6. La furmaziun d'ina pratica unitara è en emprima lingia l'incumbensa da la direcziun generala da la APUC che sa cumpona dals tschintg directurs da las APUC. La direcziun generala sa raduna mintga mais ed ha gia relaschà differentas directivas (incassament dals custs, revisiun, contracts da mantegniment e d'assistenza, represchentanza legala gratuita). En l'applicaziun dal dretg èn las singulas APUC independentas (art. 39 LItCCS). In'armonisaziun cumplessiva da la pratica giuridica premetta dentant ina pratica da las dretgiras segirada. Quai vegn a durar anc intgins onns.

Percunter servan ils models da decisiun che vegnan adattads permanentamain a la pratica sco elements impurtants per fixar la pratica e per armonisar las proceduras. La finala vegn elavura fin la fin da l'onn 2016 in "Manual per las APUC" che vegn a servir sco ovra da consultaziun.

7. Cf. las respostas a las dumondas 2 e 3.

1. da fanadur 2014