Navigation

Inhaltsbereich

Sessiun: 23.04.2014
Sco ch'igl è vegnì publitgà da curt è vegnida surdada da l'uffizi chantunal da sanadad a la crusch cotschna dal Grischun ina incumbensa davart la cussegliaziun e l'accumpagnament da confamigliaras e confamigliars che tgiran resp. è vegnida concludida sia cofinanziaziun. Che l'accumpagnament da confamigliaras e confamigliars che tgiran è in basegn ed ina contribuziun impurtanta è bain incontestà da tuttas varts. L'appreziaziun e la renconuschientscha ed uschia er il sustegn da questas prestaziuns da las confamigliaras e dals confamigliars èn pli che giustifitgads. Tant pli ha il proceder e la communicaziun da l'uffizi da sanadad fatg surstar, perquai che organisaziuns ch'èn oz gia activas sin quest champ (pro senectute) u che han questa incumbensa en lur incarica da prestaziun (spitex) n'èn ni vegnidas salidadas ni infurmadas. Da quai resultan er tschertas dumondas da cumpetenza che n'èn fin ussa anc betg scleridas: Per quest motiv dumondan las sutsegnadras ed ils sutsegnaders da respunder las suandantas dumondas:

1. Pertge è quest project vegnì surdà a la crusch cotschna dal Grischun che n'è fin ussa strusch stada activa en quest champ, abstrahà dal servetsch da transport e da singulas purschidas da furmaziun supplementara?

2. Pertge n'èn organisaziuns sco la pro senectute u la spitex che han gia lavurà directamain u indirectamain sin quest champ betg vegnidas integradas en l'evaluaziun?

3. Co accorda la regenza la surdada da questa purschida da cussegliaziun ad ina nova instituziun en quest sectur cun sia strategia da concentraziun e da collavuraziun en il sectur da la sanadad ch'ella propaghescha adina puspè?

4. Pertge n'èn las organisaziuns dals fatgs da sanadad pertutgadas, particularmain la spitex u er la pro senectute, betg vegnidas infurmadas ordavant ed han stuì leger en las medias davart la surdada dal project resp. davart la contribuziun finanziala dal chantun?

5. Co è planisà il barat d'infurmaziuns tranter las differentas organisaziuns dals fatgs da sanadad ed il post da cussegliaziun da la crusch cotschna dal Grischun e co vegnan regladas las dumondas da cumpetenza?

6. Co vegn garantida la qualitad resp. l'orientaziun a la clientella da quest post da cussegliaziun nov?

Cuira, ils 23 d'avrigl 2014

Pfenninger, Hensel, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Müller (Tavau Plaz), Peyer, Pult, Thöny, Trepp, Deplazes, Michel (Cuira), Monigatti

Resposta da la regenza

Pervia dal svilup demografic è la garanzia da la tgira e da l'assistenza da persunas pli veglias e pli giuvnas ina gronda sfida per il provediment da la sanadad dals proxims 30 onns. La rait formala da prestaziuns da tgira na po betg garantir ch'il basegn da tgira ed assistenza, che crescha ad in crescher, vegnia adempli en moda suffizienta a lunga vista. Il sustegn tras la rait informala da las confamigliaras e dals confamigliars sco er da voluntarias e voluntaris vegn a stuair avair dapli impurtanza en l'avegnir. Gia oz vegn var in terz da las prestaziuns da tgira e d'assistenza surpiglià da confamigliaras e confamigliars che tgiran.

Il mars 2013 ha la crusch cotschna dal Grischun dumandà il departament da giustia, segirezza e sanadad da la conceder ina incarica da prestaziun per metter en pe e per manar in post d'infurmaziun e da cussegliaziun per confamigliaras e confamigliars che tgiran en il Grischun. L'incumbensa dal post d'infurmaziun e da cussegliaziun saja per l'ina d'infurmar e da cussegliar confamigliaras e confamigliars che tgiran davart la purschida dals differents furniturs da prestaziuns dals secturs da la tgira e da l'assistenza e per l'autra d'intermediar collavuraturas e collavuraturs voluntaris che visitan a chasa confamigliaras e confamigliars che tgiran e che accumpognan quels en il senn da l'agid per gidar sasez, sch'els han dumondas en connex cun lur incumbensas da tgira. Igl exista il privel che confamigliaras e confamigliars che tgiran arrivan a lur cunfins organisatorics, fisics e psichics, sch'els n'han betg ina persuna da contact externa. Ils servetschs dal post d'infurmaziun e da cussegliaziun sco er las accumpagnadras ed ils accumpagnaders da tgira duain star a disposiziun gratuitamain – en furma da purschidas simplas – a tut ils umans pertutgads.

En sia sesida dals 8 d'october 2013 ha la regenza considerà ch'il basegn per la purschida da la crusch cotschna dal Grischun en dumonda saja cumprovà ed ha approvà la proposta dal departament da giustia, segirezza e sanadad da conceder l'incarica da prestaziun dal chantun a la crusch cotschna dal Grischun per metter en pe e per manar in post d'infurmaziun e da cussegliaziun per confamigliaras e confamigliars che tgiran sco er per realisar il project "Accumpagnadras ed accumpagnaders da tgira".

La regenza respunda las dumondas concretas sco suonda:

1. Sco preschentà qua survart è il basegn per metter en pe e per manar in post d'infurmaziun e da cussegliaziun per confamigliaras e confamigliars che tgiran avant maun. La crusch cotschna dal Grischun è stada l'unica organisaziun che ha vulì surpigliar questa sfida e ch'è s'annunziada per survegnir ina incarica da prestaziun correspundenta.

2. Ni da las organisaziuns da la spitex, ni da la pro senectute n'èn stads enconuschents plans da metter a disposiziun purschidas correspundentas. Pervia da quai n'existiva nagin motiv da far in'ulteriura evaluaziun da circuls eventualmain interessads.

3. La concentraziun prendida en mira da la regenza pertutga ils furniturs da prestaziuns. Che confamigliaras e confamigliars che tgiran vegnan cussegliads, accumpagnads ed infurmads d'ina instituziun independenta na resguarda perquai la regenza betg sco cuntradicziun a sia strategia.

4. Ils adressats da la purschida n'èn betg las organisaziuns, mabain las confamigliaras ed ils confamigliars che tgiran. Pervia da quai n'existiva nagin motiv d'infurmar ils furniturs da prestaziuns avant las confamigliaras ed ils confamigliars che tgiran.

5. Tenor l'incarica da prestaziun ston vegnir definidas las cumpetenzas tranter ils servetschs ambulants e staziunars, cun ils posts spezialisads e da cussegliaziun e cun benevol. Questa incumbensa vegn ademplida da la crusch cotschna dal Grischun en il rom da la realisaziun da l'incarica da prestaziun.

6. La garanzia da la qualitad e l'orientaziun a la clientella vegnan garantidas tras in rapport a l'uffizi da sanadad ch'è definì en l'incarica da prestaziun e che vegn fatg mintga onn.

28 da matg 2014