Navigation

Inhaltsbereich

Sessiun: 12.06.2014
En la sessiun d'october 2013, cun tractar la petiziun «Abunament general grischun (BüGA) per tut ils giuvenils mez gratuit!», ha il president da la regenza Cavigelli remartgà ch'ina extensiun da la purschida chaschunass cumpensaziuns tar autras prestaziuns. Il president da la regenza ha menziunà ch'i possia vegnir spargnà il pli effizientamain tar l'uschenumnà traffic regiunal, che vegnia finanzià a 100 % dal chantun. En spezial èn vegnidas menziunadas las lingias da bus da Riein, da Pigniu, da St. Antönien, da la Muntogna da Schons, da Müstair e da Samignun sco er il bus da notg Surselva.

En il rapport davart la segunda consultaziun dal concept da spazi dal Grischun vul il chantun legraivlamain s'engaschar ch'i vegnia garantida en il traffic public ina chadaina da transport public nuninterrutta tranter ils centers chantunals e regiunals sco er ils lieus turistics cun funcziun da sustegn. Displaschaivlamain na menziunescha il rapport dentant insumma betg l'ulteriur servetsch cun il traffic public per la populaziun dals vitgs e da las valladas perifericas.

En vista als puncts enumerads e sin fundament d'ulteriuras remartgas ch'exponents dal traffic public han fatg en il cussegl grond ed a chaschun da differentas occurrenzas, vulessan las interpellantas ed ils interpellants gugent savair:

1. Ston ins quintar che la purschida tar il traffic regiunal, che vegn finanzià a 100 % dal chantun, vegnia reducida?

2. Ston ins a lunga vista schizunt far quint ch'il traffic public vegnia stritgà en la periferia?

Cuira, ils 12 da zercladur 2014

Michael (Donat), Steck-Rauch, Sax, Albertin, Baselgia-Brunner, Berther (Camischolas), Bleiker, Blumenthal, Bucher-Brini, Buchli-Mannhart, Casutt-Derungs Silvia, Clalüna, Clavadetscher, Darms-Landolt, Della Vedova, Dermont, Dosch, Fallet, Fasani, Furrer-Cabalzar, Gartmann-Albin, Geisseler, Giacomelli, Grass, Gunzinger, Hardegger, Heinz, Heiz, Jaag, Joos, Kappeler, Koch (Tumein), Kollegger (Cuira), Komminoth-Elmer, Locher Benguerel, Lorez-Meuli, Mani-Heldstab, Märchy-Caduff, Meyer-Grass, Michael (Castasegna), Montalta, Niggli-Mathis (Grüsch), Noi-Togni, Papa, Pedrini, Pfenninger, Pult, Stiffler (Cuira), Thöny, Tomaschett-Berther (Trun), Trepp, Vetsch (Claustra Vitg), Waidacher, Wieland, Berther (Segnas), Deplazes, Felix (Scuol), Hensel, Monigatti, Müller (Susch)

Resposta da la regenza

La purschida dal traffic regiunal è vegnida optimada ed extendida cuntinuadamain ils ultims onns er en las regiuns perifericas dal chantun. Questas meglieraziuns han chaschunà expensas supplementaras. La finanziaziun da la purschida dal traffic public è oz en general ina gronda sfida per il maun public (confederaziun e chantuns).

Tenor las prescripziuns dal cussegl grond dastga il preventiv dal quint economic prevair in deficit da maximalmain 50 milliuns francs. Quai ha per consequenza che la regenza sto ordinar als departaments restricziuns per la budgetaziun, e da quai è pertutgà decisivamain er il traffic public. Supplementarmain vegnan las finanzas chantunalas engrevgiadas pervia da l'introducziun dal tact da mes'ura sin las lingias principalas da la Viafier retica e da l'AutoDaPosta, ma er perquai che las entradas dals bigliets pauschals sa reduceschan e perquai che las indemnisaziuns en il traffic da rauba èn pli autas. Ultra da quai exequescha la confederaziun novissimamain en moda consequenta sias directivas areguard la dumonda. En spezial sin lingias regiunalas en territoris periferics ha quai per consequenza ch'il chantun sto finanziar ina gronda part dals curs a 100 pertschient e betg mo a 20 pertschient. Lingias che rendan accessibels lieus cun main che 100 abitantas ed abitants u che curseschan mo stagiunalmain (p.ex. pass dal Flüela, Val S-charl u pass dal Spleia) èn uschia u uschia exclusas d'indemnisaziuns federalas.

La regenza è conscienta da l'impurtanza d'ina avertura fundamentala dal territori rural cun il traffic public. En spezial per vischnancas pli pitschnas e per lieus da scola regiunalisads è la colliaziun cun la rait da traffic public in factur local fitg impurtant. A maun d'ina survista da tut las lingias da traffic public en il chantun Grischun examinescha il departament cumpetent actualmain la structura da las purschidas. En quest connex duain las purschidas vegnir concepidas en moda uschè economica sco pussaivel ed ils potenzials duain vegnir nizzegiads il meglier pussaivel. Eventualas purschidas memia grondas duain vegnir reducidas en quest connex.

Las dumondas pon vegnir respundidas sco suonda:

1. La regenza ha l'intenziun da mantegnair en il Grischun er las purschidas da traffic public che na vegnan betg cofinanziadas da la confederaziun, premess ch'ina dumonda correspundenta da la populaziun indigena resp. dal turissem saja avant maun e che la finanziaziun restia pussaivla en il rom da las prescripziuns dal cussegl grond areguard il preventiv. En connex cun fusiuns da vischnancas, ch'èn vegnidas suttamessas l'ultim temp e che vegnan suttamessas il proxim temp differentas giadas al cussegl grond per l'approvaziun, prenda la regenza dal rest mintgamai medemamain posiziun en quest senn. Ina reducziun generala da la purschida en il traffic regiunal na stat pia betg en discussiun per la regenza.

2. La regenza è conscienta da l'impurtanza d'ina purschida da traffic public che correspunda als basegns en tut las regiuns da noss chantun, ed ella sa stenta perquai tenor pussaivladad da mantegnair vinavant questa purschida, sche quella vegn coordinada cun ils basegns cumprovads.

28 d'avust 2014