L'onn 2006 è vegnida prendida en funcziun ina soluziun provisorica per transtgargiar containers ACTS a Glion vest cun la finamira da pudair preschentar entaifer 2 onns ina pussaivladad da transtgargiar definitiva en il territori da Glion. Igl è passà temp custaivel, la planisaziun è sa tratga a la lunga e malgrà pliras empermischuns da las persunas responsablas ha pir l'onn 2013 pudì vegnir prendì en funcziun il center da transtgargiada Schnaus en ina furma redimensiunada senza binaris da furmaziun per ils trens da martganzia. La consequenza da quests fatgs è quella ch'il chau da la punt a Glion n'è betg vegnì distgargià sco empermess, anzi, las frequenzas en il traffic da manevrar èn s'augmentadas cleramain malgrà la dischlocaziun.
La barriera a Glion sa serra tranter las 13:00 e las 13:23 fin 6 giadas, quai che chaschuna mintga di impediments massivs per il traffic sin via, e quai notabene pliras giadas il di en la medema furma.
Differentas intervenziuns tar las persunas responsablas durant ils ultims onns n'han betg gidà a meglierar la situaziun precara. Il president da la regenza Mario Cavigelli (sco dal rest er la Viafier retica) renviescha a l'avertura dal sviament da Glion l'onn 2016 che vegnia segir a meglierar la situaziun. Quai po bain esser il cas per il traffic en direcziun da Sursaissa e da Lumnezia, però betg per la via sursilvana da la vart dretga dal Rain sco er per il traffic local. Perquai che Glion è il center da la Surselva, porscha var 2 300 plazzas da lavur en las branschas las pli differentas ed è in lieu impurtant per il commerzi e per il mastergn en la regiun sto vegnir chattada ina soluziun.
1. Tge quinta la regenza da far per che la situaziun da traffic a Glion tar il chau da la punt/barriera daventa essenzialmain meglra?
2. È la regenza pronta da contactar la Viafier retica en quest senn per che las mesiras necessarias possian vegnir realisadas a temp util?
Cuira, ils 12 da zercladur 2014
Montalta, Blumenthal, Buchli-Mannhart, Aebli, Bleiker, Casty, Casutt-Derungs Silvia, Clalüna, Conrad, Darms-Landolt, Dermont, Felix (Haldenstein), Furrer-Cabalzar, Geisseler, Giacomelli, Grass, Hardegger, Jenny, Koch (Tumein), Kollegger (Cuira), Komminoth-Elmer, Kunz (Fläsch), Lorez-Meuli, Mani-Heldstab, Michael (Donat), Niggli-Mathis (Grüsch), Papa, Pedrini, Sax, Stiffler (Tavau Plaz), Vetsch (Claustra Vitg), Wieland, Berther (Segnas), Deplazes, Müller (Susch), Patt
Resposta da la regenza
La situaziun da traffic actuala problematica tar la staziun da Glion, en spezial tar la barriera da la Viafier retica avant la punt sur il Rain anteriur, è enconuschenta. Las parts participadas sa stentan gia dapi in temp pli lung da cuntanscher meglieraziuns. La Viafier retica (VR) stat dapi l'onn 2008 en in contact intensiv cun la citad da Glion. Sco emprima mesira ha la VR spustà a Rueun la transtgargiada da laina (2009). Uschia ha la via da la staziun a Glion pudì vegnir distgargiada. Ultra da quai ha la VR pussibilità a la citad da Glion da metter a disposiziun plazzas da parcar là.
Sco ulteriura mesira è vegnì installà a Schnaus il nov center da transtgargiada Surselva (settember 2013). Qua vegnan transtgargiads en emprima lingia recipients polivalents e containers da la via sin la viafier. En il rom da la procedura per la permissiun da construcziun èn vegnidas inoltradas numerusas protestas, quai che ha chaschunà ch'il project ha stuì vegnir midà sco er gronds retards.
Per Coca-Cola transporta la VR per onn ca. 5000 vaguns cun paraids moviblas da Glion en il center da transtgargiada Vaz sut, quai che chaschuna ils viadis da manevra sin la via chantunala crititgads. Gia oz vegnan transtgargiads supplementarmain stgars 1000 recipients polivalents tar la transtgargiada da containers a Schnaus. La midada da sistem dals transports cun vaguns cun paraids moviblas als recipients polivalents chaschuna per Coca-Cola grondas adattaziuns en la logistica. Pervia da las quantitads da transport uschè grondas ston questas midadas vegnir realisadas en etappas. A media vista duain er quests transports da bavrondas vegnir realisads davent dal nov center da transtgargiada.
In'ulteriura clera meglieraziun al chau da la punt a Glion vegn cuntanschida cun il sviament al vest da Glion. Sche quel vegn mess en funcziun (probablamain l'onn 2016), vegn il squitsch sin la barriera a Glion a sa reducir cleramain. Il sviament po er vegnir duvrà per il traffic da Schluein a la via sursilvana da la vart dretga dal Rain, cunquai ch'il detur che resulta da quai è modest. Cun construir in access tar la mesadad dal sviament vegn meglierà cleramain il niz per il sectur d'industria e da mastergn sco er per il distributur grond ch'è domicilià là. Grazia al sviament al vest vegn il surpassadi da viafier actual distgargià dal traffic da la part sura da la Surselva e da las fracziuns da la vart sanestra dal Rain da la nova vischnanca da Glion sco er dal traffic da transit en direcziun da Val S. Pieder, da la Val Lumnezia e da Sursaissa.
Concernent la restructuraziun da la staziun da Glion (augment da la valur sco center da traffic viafier/bus per la Surselva, novs perruns per ademplir la lescha davart l'egualitad da persunas cun impediments [LImp]) ha la VR registrà ils giavischs da la vischnanca, da l'AutoDaPosta dal Grischun e d'ina gruppa d'investiders (center da cumpra). La coordinaziun pretensiusa dals differents interess ha chaschunà retards dal project. En enclegientscha cun las partidas participadas ha la VR separà la planisaziun da las ulteriuras ideas da project ed ha ussa oravant tut l'intenziun da restructurar la staziun uschia ch'ella tegna quint da las persunas cun impediments. Actualmain vegnan examinadas differentas variantas. Igl è planisà d'inoltrar il project fin la fin da l'onn 2015 a la confederaziun ed al chantun per l'approvaziun, uschia ch'i pudess vegnir cumenzà cun las lavurs da construcziun l'onn 2017.
Las dumondas pon vegnir respundidas sco suonda:
1. La regenza è persvadida che la situaziun al chau da la punt sur il Rain anteriur a Glion vegn a sa meglierar cleramain, suenter ch'il sviament al vest da Glion, che vegn realisà dal chantun, e suenter che la nova staziun a Glion, a la realisaziun da la quala il chantun paja ina contribuziun commensurada, èn entrads en funcziun.
2. La regenza tgira gia dapi in temp pli lung in contact stretg cun la VR e cun las ulteriuras parts participadas per cuntanscher che la renovaziun da la staziun a Glion vegnia realisada uschè svelt sco pussaivel.
28 d'avust 2014