Ils proxims dis vegn il cussegl federal a publitgar la missiva tar il nov concept da staziunament. En quel vegn fixada l'orientaziun futura da l'armada. Cumpareglià cun auters chantuns cun ina topografia militara cumparegliabla è il dumber d'indrizs d'infrastructura, da commandos e da plazzas d'armas lunsch sut la media en il chantun Grischun. En il chantun datti investiziuns da circa 130 milliuns francs. Las plazzas d'armas a Cuira, al Luziensteig, a Valragn ed a S-chanf duain vegnir duvradas er vinavant dal militar. Tras quai che las plazzas d'armas en il chantun vegnan duvradas er vinavant, na vegnan betg mo segiradas las 150 plazzas da lavur restantas da l'armada en il chantun Grischun, mabain vegn er rinforzada en general l'economia publica en las regiuns respectivas grazia a las investiziuns essenzialas ed a las expensas periodicas.
Tras la reorganisaziun da l'armada n'èn las persunas da contact per ils represchentants regiunals betg pli definidas cleramain da vart da l'armada. Uschia vegnan cunzunt las regiuns perifericas savens da far valair memia tard lur interess. En tscherts cas na vegnan contracts existents tranter l'armada e las vischnancas betg pli actualisads, ed ils cuntegns dals contracts na vegnan betg pli observads. Uschia èn contracts d'electricitad da lungs onns, ch'eran ina part integrala dals contracts collectivs, vegnids desditgs pervia da la liberalisaziun dal martgà d'electricitad. En connex cun investiziuns en chantunaments duessan en mintga cas vegnir examinadas sinergias cun in'eventuala utilisaziun turistica. Quai en spezial en las regiuns perifericas, nua ch'i stattan a disposiziun paucs letgs libers.
Per quest motiv incumbensain nus la regenza da contactar activamain il DDPS / armasuisse, e quai cun las suandantas finamiras:
• far valair en la discussiun a temp ils interess da las vischnancas da staziunament (p.ex. investiziuns en stabiliments d'infrastructura per l'utilisaziun turistica);
• repassar ils contracts existents en collavuraziun cun las vischnancas da staziunament;
• mantegnair las plazzas da lavur existentas e sche pussaivel crear novas.
Cuira, ils 29 d'avust 2014
Lorez-Meuli, Marti, Komminoth-Elmer, Alig, Berther, Bleiker, Bondolfi, Brandenburger, Bucher-Brini, Buchli-Mannhart, Burkhardt, Casty, Casutt-Derungs, Caviezel (Tavau Clavadel), Clalüna, Clavadetscher, Danuser, Darms-Landolt, Deplazes, Engler, Felix (Scuol), Geisseler, Giacomelli, Gunzinger, Hardegger, Hartmann, Heiz, Hitz-Rusch, Holzinger-Loretz, Hug, Jenny, Joos, Koch (Tumein), Kollegger, Kunz (Fläsch), Kunz (Cuira), Mani-Heldstab, Michael (Donat), Michael (Castasegna), Müller, Nay, Niggli-Mathis (Grüsch), Noi-Togni, Pedrini, Rosa, Salis, Sax, Schutz, Steck-Rauch, Steiger, Stiffler (Tavau Plaz), Thomann-Frank, Tomaschett (Breil), Tomaschett-Berther (Trun), Toutsch, Troncana-Sauer, Vetsch (Pragg-Jenaz), Weber, Widmer-Spreiter, Wieland
Resposta da la regenza
Ils 3 da settember 2014 ha il cussegl federal deliberà la missiva tar la lescha militara e suttamess quella a las chombras federalas. Ultra da las explicaziuns tar la revisiun da la lescha militara cuntegna la missiva er ils resultats da la consultaziun preliminara dals chantuns davart il concept da staziunament planisà sco er las opiniuns davart il futur concept da staziunament che resulta tras la nova lescha militara.
Tenor l'infurmaziun dal DDPS vegn la procedura davart il plan secturial lantschada previsiblamain la fin da l'onn 2014 u durant l'emprim quartal 2015. Il plan secturial rectifitgà furma la basa per repassar la planisaziun d'utilisaziun. La planisaziun d'utilisaziun da sia vart mussa, nua che las truppas vegnan staziunadas, e furma la basa per las investiziuns futuras dad armasuisse en las infrastructuras duvradas da l'armada. Il DDPS suppona che las utilisaziuns futuras da las infrastructuras daventian pli cleras il pli baud vers la fin da l'onn 2015. In termin per prender per mauns il repassament da la planisaziun d'utilisaziun da las singulas plazzas d'armas na numna il DDPS natiralmain betg anc per il mument. Almain ha armasuisse empermess che la planisaziun d'utilisaziun repassada vegnia suttamessa a las vischnancas cun plazzas d'armas per laschar prender posiziun, cur ch'igl è uschè lunsch.
Actualmain na po il DDPS far naginas indicaziuns areguard ils lieus da staziunament definitivs da las truppas, areguard l'occupaziun ed areguard las investiziuns. Quai, perquai che las chombras federalas ston l'emprim tractar la midada da la lescha militara. Sche, en tge dimensiun e nua ch'il DDPS po far investiziuns, dependa la finala da la decisiun da las parlamentarias e dals parlamentaris a Berna. Sch'il parlament restrenscha vinavant las pussaivladads finanzialas da l'armada, sto quella spustar u schizunt stritgar dal tuttafatg eventuals projects. Pervia dals meds finanzials limitads han armasuisse e l'armada stuì far gia en il passà spustaments en consequenza da la midada da las prioritads tar las investiziuns. Ellas han pia stuì spustar tschertas investiziuns ubain cumprar rauba tar offerents pli favuraivels. Quai ha per exempel la vischnanca da Valragn sentì tras la desditga dal contract da furniziun da forza electrica.
Davart las finamiras persequitadas cun l'incumbensa poi vegnir menziunà il suandant:
1. Il departament da giustia, segirezza e sanadad è pront da trametter vinavant a l'armada u ad armasuisse en il senn sustegnent ils interess da las vischnancas da staziunament. El è en contact regular cun represchentants dad armasuisse e da l'armada. Fin ussa è quai vegnì fatg principalmain en cas da la plazza d'armas a Cuira, perquai ch'ils represchentants da las vischnancas da staziunament Cuira, Favugn e Haldenstein han giavischà in barat annual cun represchentants da la plazza d'armas. Las ulteriuras vischnancas che han ina plazza d'armas (u parts d'ina tala) sin lur territori, n'han betg annunzià in basegn correspundent. Sin dumonda èn però vegnidas intermediadas a las vischnancas las persunas da contact respectivas tar l'armada u tar armasuisse. Uschia èn ils scleriments necessaris vegnids fatgs er per l'emprima sutsegnadra da l'incumbensa, ma pervia da l'intschertezza politica menziunada al cumenzament n'ha armasuisse pudì far naginas empermischuns. Almain ha armasuisse empermess d'entrar en contact, suenter che las tractativas politicas èn terminadas. En quest connex pon las vischnancas far valair lur interess (incl. investiziuns en stabiliments d'infrastructura per l'utilisaziun turistica).
2. In repassament dals contracts existents concernent las plazzas d'armas è chaussa da las parts contractantas. En il connex qua avant maun èn per regla armasuisse (sco societad d'immobiglias da la confederaziun) e la vischnanca da staziunament las parts contractantas. Il chantun na po betg midar in contract ensemen cun la vischnanca da staziunament sin donn e cust dad armasuisse. Armasuisse ha empermess ch'ils contracts da las plazzas d'armas vegnian repassads da vart dad armasuisse ensemen cun las vischnancas da staziunament. In termin concret per ils contracts da las vischnancas grischunas cun plazzas d'armas n'èn ins dentant betg vegnì a savair.
3. Ch'il chantun ha ina tenuta positiva envers il mantegniment u schizunt envers in augment da las plazzas da lavur dal DDPS, ha el confermà differentas giadas (discurs, conferenzas da medias, consultaziuns e.u.v.). Ina influenza directa n'ha el dentant ni sin la creaziun resp. sin il mantegniment da las plazzas da lavur ni sin la domiciliaziun da las forzas da lavur. Ils interess dal chantun èn vegnids resguardads optimalmain en il rom dal concept da staziunament.
Sco explitgà qua survart ha il chantun intermedià en il rom da sias resursas persunalas fin oz gia ils contacts necessaris a las vischnancas da staziunament ed ha sustegnì e cusseglià questas vischnancas. Medemamain è el gia sa stentà activamain e cun success per il mantegniment da las plazzas da lavur.
La regenza propona perquai d'acceptar l'incumbensa e da la stritgar sco liquidada.
23 d’october 2014