Cuntegn da la pagina

Dumonda Cavegn concernent la fixaziun da las premias decisivas per la reducziun da las premias

sessiun: 22.10.2014
En la lescha chantunala davart l'assicuranza da malsauns e la reducziun da las premias (LARP) vegnan regladas las premissas per la reducziun individuala da las premias. Tenor l'art. 7 LARP fixescha la regenza las premias decisivas. Ella s'orientescha da princip vi da las premias medias per l'assicuranza obligatorica per la tgira da persunas malsaunas. Quellas vegnan reducidas tenor l'art. 8 LARP confurm a las entradas. En cas ch'ina persuna obtegna in sustegn public, vegnan las premias decisivas da princip reducidas dal tuttafatg. I na vegn betg pretendida ina resalva persunala (art. 9 al. 1 lit. b LARP).

La reducziun da las premias vegn pajada tras l'institut d'assicuranza sociala. Las vischnancas na ston betg star bunas, e quai er betg là, nua che las premias vegnan reducidas dal tuttafatg pervia d'in sustegn public.

La regenza ha relaschà en l'art. 17 da l'ordinaziun tar la lescha davart l'assicuranza da malsauns e la reducziun da las premias (OEtLARP) regulaziuns per fixar las premias decisivas. Questas regulaziuns èn entradas en vigur il 1. da schaner 2013. Tenor quellas vegnan las premias medias mensilas per l'assicuranza obligatorica per la tgira da persunas malsaunas, che la confederaziun ha fixà per categoria da persunas e per regiun, reducidas per 10 pertschient. Questa fixaziun è memia bassa. La consequenza è quella che las premias che la regenza ha fixà sco decisivas na correspundan en il cas singul savens betg pli a las premias effectivas da l'assicuranza da basa da las persunas assicuradas. Questas premias pon esser differentas tut tenor la cassa da malsauns. In'autra consequenza è quella che las premias da l'assicuranza da basa, er en cas d'in sustegn public, na vegnan betg pli cuvridas tras la reducziun da las premias.

Cun la brev dals 6 d'october 2014 a las vischnancas han l'institut d'assicuranza sociala dal chantun Grischun, l'uffizi da sanadad dal Grischun e l'uffizi dal servetsch social dal Grischun constatà che las premias, en cas d'in sustegn public, che na vegnan betg cuvridas tras la reducziun da las premias e las participaziuns als custs (resalvas persunalas e.u.v.) sajan ina part integrala da l'agid social, uschia ch'ellas stoppian la finala vegnir surpigliadas da las vischnancas. Quai cuntrafa però al senn ed a l'intent da la reducziun da las premias reglada en la lescha. Quella considerescha gist betg las vischnancas sco cumpetentas per pajar premias betg pajadas.

Pervia da questa brev designada sco "precisaziun concernent las premias e las participaziuns als custs betg pajadas tenor l'art. 64a LAMal" stuessan tut tenor vischnanca vegnir pajads annualmain or da meds publics plirs millis francs supplementarmain a las ulteriuras expensas da l'agid social. Quai avess per consequenza che la ristga da las assicuranzas da malsauns vegniss la finala transferida sin las vischnancas. Quai n'è però mai stà l'intenziun dal legislatur.

Las sutsegnadras ed ils sutsegnaders dumondan perquai la regenza, sch'ella è pronta da curreger l'art. 17 da la OEtLARP, tegnend quint dal senn e dal spiert dal legislatur. Las premias decisivas ston vegnir fixadas uschia, ch'ils custs effectivs da las assicuranzas da basa vegnan cuvrids – er en cas da sustegns publics en il senn da l'art. 9 lit. b LARP – tras las prestaziuns da la reducziun da las premias. Uschia na stuessan las vischnancas – confurm a la voluntad dal legislatur – a priori betg pli vegnir duvradas per cuvrir premias d'assicuranza.

Cuira, ils 22 d'october 2014

Cavegn, Niederer, Caluori, Berther, Blumenthal, Bondolfi, Caduff, Casutt-Derungs, Della Vedova, Fasani, Florin-Caluori, Tenchio, Tomaschett (Breil), Geisseler, Sgier

Resposta da la regenza

En il rom da la revisiun parziala da la lescha davart l'assicuranza da malsauns e la reducziun da las premias (LARP; DG 542.100) dal 1. da settember 2006 ha il cussegl grond autorisà la regenza en l'art. 7 al. 1 LARP da reducir las premias decisivas per calcular la reducziun da las premias fin a 15 pertschient envers las premias medias che la confederaziun ha fixà. En sia missiva respectiva al cussegl grond (carnet 4/2006-2007) ha la regenza explitgà sin las paginas 301 s. e 306 che las persunas che retiran ina reducziun da las premias hajan la pussaivladad da cumpensar la reducziun cun ina midada ad in auter model d'assicuranza (HMO, model da medis da chasa, managed care e.u.v.). 

En l'art. 17 al. 1 da l'ordinaziun tar la lescha davart l'assicuranza da malsauns e la reducziun da las premias (OEtLARP; DG 542.120) ha la regenza prescrit che las premias medias fixadas da la confederaziun per categoria da persunas e per regiun per l'assicuranza obligatorica per la tgira da persunas malsaunas vegnian reducidas per 10 pertschient. Questas premias vegnan duvradas per fixar las premias decisivas.

Per l'onn 2014 resultan uschia las suandantas premias decisivas per la reducziun da las premias:



Tenor las explicaziuns fatgas en la dumonda na duain las persunas che retiran ina reducziun cumpletta da las premias betg esser ablas da pajar las premias che las vegnan messas a quint cun las premias decisivas per la reducziun da las premias. Quai n'è dentant betg correct. Sch'ins considerescha sco exempel las premias da la cassa da malsauns publica, l'assicuranza cun las pli bleras persunas assicuradas dal Grischun, cun il model managed care, vegnan debitadas cun ina franschisa minimala e cun garanzia dals custs d'accident las suandantas premias mensilas:



I sa mussa che tut las premias èn gia en quest model pli bassas che las premias decisivas. Ultra da quai datti purschidas anc pli bassas da differentas assicuranzas. Plinavant èn pussaivlas ulteriuras reducziuns, sch'ins tscherna franschisas pli autas.

Igl è pia garantì che las premias vegnan reducidas dal tuttafatg per las gruppas da persunas ch'èn menziunadas en l'art. 9 al. 1 LARP cun las premias decisivas reducidas, sche las persunas che retiran la reducziun da las premias e ch'èn assicuradas tar in'assicuranza da malsauns favuraivla han tschernì in model d'assicuranza alternativ. Sche quai n'è betg il cas, pon las vischnancas pretender da las persunas che vegnan sustegnidas da midar ad in'assicuranza da malsauns pli favuraivla respectivamain ad in model d'assicuranza pli favuraivel. Tenor LAMal è ina tala midada pussaivla mintgamai per la fin da zercladur e per la fin da l'onn. Sch'ina persuna che vegn sustegnida da la vischnanca na fa betg questa midada, e quai malgrà l'ordinaziun communala, po la vischnanca reducir ils meds finanzials libers che stattan a disposiziun a la persuna pertutgada en la dimensiun da la differenza tranter la premia effectiva e la premia decisiva.

Sch'i vegnissan duvradas las premias effectivas per calcular la reducziun da las premias, mancass il stimul per las persunas che retiran la reducziun da las premias da midar a models d'assicuranza pli favuraivels. Quai pudess chaschunar grevezzas considerablamain pli autas per il chantun. Ultra da quai fiss la lavur administrativa bler pli gronda, damai ch'i stuess vegnir resguardada tar la calculaziun da la reducziun da las premias per mintga cas singul anc la premia effectiva.

Sin basa da las explicaziuns precedentas na vesa la regenza nagina necessitad da midar l'OEtLARP en il senn da la dumonda.

14 da schaner 2015