Cuntegn da la pagina

Dumonda Salis concernent la protecziun da la populaziun grischuna

sessiun: 22.10.2014
En las vals dal Grischun dal sid, ma er en l'ulteriur chantun, han ins adina puspè stuì registrar l'ultim temp serias d'infracziuns e d'enguladitschs clandestins. La tendenza s'augmenta. Il proceder dals delinquents mussa ch'els n'han er naginas retegnientschas d'entrar en immobiglias, vul dir en abitaziuns, nua che las abitantas ed ils abitants sa trategnan il mument dals delicts. Che quai po chaschunar situaziuns dischagreablas e schizunt criticas, sa chapescha da sez. La consequenza è che la populaziun fa quitads per sia segirezza. Cunzunt en ils territoris damanaivel dal cunfin fan ins quitads pervia da quest svilup, perquai ch'i mancan oz las controllas al cunfin e perquai che la situaziun respectiva en l'exteriur vischin na po insumma betg vegnir designada sco stabila. Las burgaisas ed ils burgais èn pli che inquietads.

Jau menziunesch ch'il sutsegnader sco er la fracziun da la PPS na metta en nagin cas en dumonda la lavur da nossa polizia. Nus renconuschain e stimain l'engaschi che las polizistas e dals polizists demussan di per di. Per nus represchentantas e represchentants dal pievel sco er per la polizia e per las burgaisas ed ils burgais è la situaziun actuala tut auter che cuntentaivla.

En quest connex tschenta il sutsegnader las suandantas dumondas a la regenza:

1. Co giuditgescha la regenza la situaziun generala actuala en il sectur da la polizia criminala? Vegn la populaziun orientada suffizientamain sur las medias davart delicts, e vegn ella instruida, co ch'ella sto sa cumportar resp. tge mesiras preventivas ch'ella po prender? Èn planisadas campagnas d'infurmaziun en quest reguard?

2. Tge consequenzas ha l'augment da persunal planisà tar la polizia sin la prevenziun en il sectur da la polizia criminala? Vegnan messas prioritads en tschertas regiuns?

3. Tge tenuta ha la regenza envers la lavur administrativa enorma che la polizia sto prestar ozendi? Tras questas activitads mancan collavuraturas e collavuraturs a la front, vul dir en il mintgadi da la polizia (preschientscha da la polizia criminala / observaziuns e.u.v.) per proteger las burgaisas ed ils burgais. Po la regenza inditgar, quant gronda che la part procentuala da l'activitad administrativa è?

4. Dapi l'onn 2012 vegni lavurà vi d'ina revisiun da la lescha chantunala da polizia areguard la surveglianza da video. Sco ch'ins ha udì, po questa legislaziun dentant vegnir suttamessa al cussegl grond il pli baud l'onn 2015. Tge è il motiv da quest retard enorm?

Cuira, ils 22 d'october 2014

Salis, Felix (Haldenstein), Della Vedova, Albertin, Alig, Bleiker, Bondolfi, Brandenburger, Buchli-Mannhart, Caluori, Casanova (Glion), Casty, Clalüna, Fasani, Felix (Scuol), Giacomelli, Gunzinger, Hardegger, Hartmann, Heiz, Hug, Jeker, Joos, Koch (Igis), Kunfermann, Mani-Heldstab, Mathis, Michael (Donat), Michael (Castasegna), Nay, Niederer, Niggli (Samedan), Schutz, Steiger, Stiffler (Tavau Plaz), Thomann-Frank, Toutsch, Weber, Weidmann, Candrian, Geisseler, Sonder, Wellig

Resposta da la regenza

1. La situaziun da criminalitad en il chantun Grischun è dapi onns tut en tut stabila. Il dumber d'enguladitschs cun infracziun è dentant s'augmentà marcantamain dapi circa 3 onns, principalmain per lung da l'axa da la A13. La populaziun, las medias e las persunas che prendan las decisiuns politicas vegnan infurmadas regularmain davart la situaziun da criminalitad. La campagna "Suspect – dai in telefon! – Clom d'agid da la polizia 117" exista dapi 10 onns en tut la Svizra. Ella vegn rendida enconuschenta a la publicitad er tras la polizia chantunala dal Grichun. Questa campagna è concepida explicitamain per la situaziun dals enguladitschs cun infracziun.

2. Cun ils meds supplementars vegni ad esser pussaivel da metter accents intenziunads. Geograficamain na pon quests accents betg vegnir definids gia ordavant, mabain suondan las enconuschientschas specificas davart la situaziun. Per pudair mantegnair il squitsch da retschertga na ston perquai betg mo vegnir rinforzads ils meds preventivs, mabain er ils meds repressivs. Impurtanta è numnadamain er l'abilitad da la tecnica criminala da metter en segirezza e d'evaluar fastizs e cumprovas. Principalmain questas acziuns portan las enconuschientschas ch'èn relevantas per la situaziun e che permettan da far prescripziuns intenziunadas areguard la prevenziun ed areguard las investigaziuns.

3. La lavur administrativa per il singul polizist n'è betg extraordinariamain gronda. Da la lavur administrativa sto dentant vegnir differenziada la documentaziun da la lavur poliziala operativa, saja quai en chaussas criminalas, en chaussas da traffic u en chaussas da segirezza. Questa lavur vegn nudada en uschenumnads rapports da polizia. Mo l'onn 2013 ha la polizia chantunala scrit passa 20 000 rapports. Questa incumbensa da documentaziun è indispensabla en differents reguards. Per l'ina sa tracti da menziunar en las actas – per motivs dal stadi da dretg – l'agir polizial che cumpiglia savens mesiras repressivas. Tant per las persunas pertutgadas sco er per las autoritads èsi uschia pussaivel da chapir ed er da controllar las intervenziuns en ils dretgs fundamentals. Plinavant furman tut las enconuschientschas fatgas en ils cas singuls la basa per l'ulteriur agir operativ da la polizia en la lavur da retschertga e d'investigaziun: Senza las datas da la polizia na dessi naginas bancas da datas da la polizia e senza quellas na dessi nagina retschertga da delinquentas e delinquents nunenconuschents. Quest gener da retschertga pertutga circa 75 % da tut ils delicts. La finala è la documentaziun da retschertgas decisiva er per la lavur da las dretgiras penalas, cunquai ch'il rapport da polizia è per regla il punct da partenza e la basa d'ina procedura penala.

En quest senn n'è il rapport da polizia betg lavur administrativa, mabain ina part da la lavur poliziala ed ha in cler intent. L'onn passà ha ina gruppa da lavur examinà detagliadamain las pussaivladads d'optimar e da simplifitgar ils rapports, ha dentant constatà mo in fitg pitschen basegn d'agir.

In augment da l'effizienza ed uschia ina distgargia da la lavur poliziala s'empermetta la polizia chantunala dentant tras la realisaziun da la strategia da computers mobils ch'è vegnida concludida l'onn 2014. Cun ils apparats mobils pon per exempel tschertas datas vegnir endatadas directamain a la front. Plinavant vegni ad esser pussaivel d'acceder – independentamain dal lieu – directamain als sistems da polizia.

4. Il departament da giustia, segirezza e sanadad prepara actualmain ina revisiun parziala da la lescha chantunala da polizia. Per motivs d'effizienza duain tut ils puncts ch'èn da reglar da nov, pia er l'incumbensa Felix concernent la surveglianza dal spazi public, vegnir tractads cuminaivlamain en in project. En consequenza dal rapport da polizia 2010 vegnan examinadas en quest connex er differentas furmas organisatoricas da la polizia chantunala.
 
14 da schaner 2015