Sco post spezialisà e d'intermediaziun per la lavur voluntara en il Grischun ha Benevol fatg bler ils ultims onns per sensibilisar la populaziun per la lavur voluntara.
Quest onn è cumparì in mussavia davart la lavur voluntara en las vischnancas. Quest mussavia è vegnì elavurà da la scola auta da tecnica ed economia SATE Cuira en collavuraziun cun l'academia europeica Bulsaun (EURAC research) e cun Apollis – institut per perscrutaziun sociala e demoscopia Bulsaun. El duai sensibilisar vinavant per il tema da la lavur voluntara e metter il plaun communal en il center.
Tenor il mussavia duai il chantun stgaffir las cundiziuns generalas idealas per la lavur voluntara cun sensibilisar, renconuscher e sustegnair la lavur voluntara sco er cun francar tala en la lescha. Las vischnancas da lur vart èn las acturas centralas cunzunt per coordinar e per activar la lavur voluntara. Las suandantas recumandaziuns d'agir vegnan menziunadas en il mussavia: Las vischnancas duain render visibel il tema da la lavur voluntara, renconuscher la lavur voluntara, engaschar ed entretschar las acturas ed ils acturs, sustegnair persunas voluntaras ed organisaziuns, prestar lavur da publicitad, iniziar agens projects e crear ina politica da persunal a favur da la lavur voluntara. I fiss interessant da vegnir a savair, sche questa conscienza è avant maun en las vischnancas grischunas en la dimensiun giavischada. Sch'ins prenda – sco indicatur – il dumber da vischnancas ch'èn commembras da Benevol, lura exista in basegn d'agir, perquai che mo ina vischnanca è actualmain commembra da Benevol.
Las sutsegnadras ed ils sutsegnaders tschentan las suandantas dumondas a la regenza:
1. Tge dovri, per che las vischnancas daventian pli conscientas da l'impurtanza sociala, sportiva e culturala da la lavur voluntara e per ch'ellas daventian pli activas?
2. È la regenza pronta da far – sco proponì en il mussavia – ina inventarisaziun da las vischnancas che mussa, co che la concepziun activa da la lavur voluntara guarda or en las vischnancas?
3. Vesa la regenza en singuls champs d'acziun gia oz in basegn d'agir spezial per promover la lavur voluntara?
Cuira, ils 22 d'october 2014
Thöny, Hardegger, Cavegn, Atanes, Baselgia-Brunner, Berther, Blumenthal, Brandenburger, Bucher-Brini, Buchli-Mannhart, Caduff, Cahenzli-Philipp, Caviezel (Cuira), Danuser, Darms-Landolt, Deplazes, Fasani, Felix (Scuol), Gartmann-Albin, Grass, Gunzinger, Hitz-Rusch, Holzinger-Loretz, Jaag, Kollegger, Kunfermann, Locher Benguerel, Lorez-Meuli, Mani-Heldstab, Mathis, Monigatti, Müller, Nay, Niederer, Niggli-Mathis (Grüsch), Noi-Togni, Papa, Pedrini, Perl, Peyer, Steck-Rauch, Thomann-Frank, von Ballmoos, Widmer-Spreiter, Candrian, Geisseler
Resposta da la regenza
Sco resultat dal project Interreg Italia-Svizra 2007-2013 "Uffizi d'onur innovativ per sviluppar vinavant l'ierta sociala e culturala", ch'il chantun Grischun ha sustegnì finanzialmain, è cumparì mez da l'onn 2014 in mussavia davart la lavur voluntara en las vischnancas. Il mussavia sa drizza a las gruppas d'interess ed als acturs ils pli impurtants en il sectur da la lavur voluntara sin il plaun local. Persunas voluntaras gidan a mantegnair ed a sviluppar vinavant l'ierta sociala e culturala sco er ad augmentar la qualitad da viver en las vischnancas. Ellas promovan l'integraziun e l'identificaziun cun la vischnanca ed èn savens in factur decisiv per il svilup duraivel d'in vitg. Ellas furneschan e garanteschan prestaziuns socialas multifaras en ina dimensiun ch'ils organs publics u statals na fissan mai en cas da cuntanscher. Ord vista politica ha l'uffizi d'onur ina relevanza speziala gist en il model communal ch'è caracterisà dal princip da milissa. La lavur voluntara è er da gronda impurtanza en il sectur da las structuras da las baselgias chantunalas. Dapi il 1. da schaner 2011 è en vigur ina cunvegna da prestaziun tranter l'uffizi dal servetsch social chantunal dal Grischun e la fundaziun Benevol Grischun. Benevol Grischun ha la finamira da sensibilisar la societad e las organisaziuns per la lavur voluntara e da demussar stima envers las persunas che prestan lavur voluntara.
En la sessiun d'avrigl 2012 ha il cussegl grond refusà l'incumbensa Kollegger (Cuira) che pretendeva in program da renconuschientscha per la lavur voluntara. Ina pretensiun praticamain identica era gia vegnida fatga l'onn 2004 cun la "incumbensa Feltscher concernent l'undraziun da la lavur voluntara" e refusada dal cussegl grond en la sessiun d'october 2004. Da quel temp eri vegnì pretendì che la lavur voluntara vegnia renconuschida tras in document suttascrit da la regenza e tras ina gluva correspundenta dal chantun. En la resposta a l'intervenziun ha la regenza rendì attent al fatg ch'i saja vegnì inizià gia bler en il sectur da la lavur voluntara.
En ils votums da las duas intervenziuns èsi vegnì menziunà ch'ins na veglia betg extender l'administraziun e pia er betg augmentar ils custs, ch'i saja difficil da definir la lavur voluntara e che la lavur voluntara saja chaussa da las uniuns e betg l'incumbensa dals uffizis. Tenor la regenza valan quests arguments anc adina.
La regenza respunda las dumondas sco suonda:
1. Sco ch'il mussavia constatescha cun raschun, èn bleras vischnancas gia fitg activas e sustegnan la lavur voluntara en blers reguards. Mesiras da coordinaziun e da sensibilisaziun pon augmentar la conscienza davart la valur da la lavur voluntara. Il mussavia po esser qua in bun agid. L'uffizi da vischnancas vegn a publitgar sin sia pagina d'internet ed en la Ginfo 2/2014 in renviament a la pussaivladad da retrair il mussavia tar la scola auta da tecnica ed economia SATE Cuira.
2. Ina mesira raschunaivla per promover l'engaschament voluntar è quella da tematisar la lavur voluntara en la politica en il rom da programs da partida u da chaussas sumegliantas. En la descripziun da las prestaziuns cun la fundaziun Benevol èsi menziunà explicitamain che la cunvegna cumpiglia er la promoziun e la renconuschientscha da la lavur voluntara en il chantun Grischun. Tenor il contract da prestaziuns vegnan plinavant definidas finamiras sco intermediaziun e coordinaziun, furmaziun, infurmaziun e post da consultaziun, cussegliaziuns e colliaziun. Damai che l'organisaziun spezialisada Benevol Grischun ha survegnì ina tala incarica da prestaziun, èsi tenor la regenza pauc cunvegnent, sche l'administraziun chantunala sviluppa sezza novas activitads en quest sectur. Igl è en l'interess prioritar da la fundaziun Benevol da tematisar ina vasta basa da finanziaziun che cumpiglia – ultra da las vischnancas politicas – p.ex. ils secturs sport, ambient/natira, cultura u baselgia.
3. Na.
18 da december 2014