Navigaziun principala

Cuntegn da la pagina

Incumbensa Bucher-Brini concernent l'extensiun dal program "Capricorn"

sessiun: 09.12.2014
Er en il Grischun crescha la mancanza da medias e medis da chasa marcantamain tant en la periferia sco er en ils centers. Perquai èsi difficil da chattar ina successiun er per praticas attractivas. Ils motivs èn multifars e bain enconuschents.

In dals paucs instruments efficazis per dar in pau cuntrapaisa è l'uschenumnada assistenza da pratica.

Grazia al program "Capricorn", ch'il chantun sustegna dapi l'onn 2009 e che ha l'intent da scolar futuras medias e futurs medis da chasa, èn gia vegnids cuntanschids buns resultats. Il project "Capricorn" pussibilitescha a medias ed a medis d'assistenza, ch'èn emploiads en in ospital e che vulessan lavurar sin il sectur da la medischina dal provediment da basa, da far in praticum en ina pratica d'ina media u d'in medi da chasa. Il dumber da plazzas da praticum è displaschaivlamain limità, cumbain che la regenza ha auzà la purschida da quatter a sis plazzas per onn. L'interess è grond, pertge che las plazzas da praticum per l'onn 2015 èn gia surdadas ed ulteriurs 240 pertschients da plazzas han gia stuì vegnir refusads.

Impurtant, gea, decisiv è che las medias ed ils medis d'assistenza che vulessan lavurar sin il sectur da la medischina dal provediment da basa possian emprender lur futur "mastergn" en las praticas da noss chantun gia baud durant lur scolaziun. Quai, avant ch'ellas ed els vegnan tratgs davent tras las disciplinas spezialas. Il project "Capricorn" è ina da las paucas schanzas per che medias e medis sa domicilieschian en il chantun Grischun sco provedidras e provediders da basa.

Las sutsegnadras ed ils sutsegnaders supplitgeschan la regenza d'extender la purschida dal program "Capricorn" per candidatas e candidats adattads, sch'igl èn avant maun praticas qualifitgadas, e d'abolir la limitaziun da las plazzas sustegnidas per il 1. da schaner 2015.

Cuira, ils 9 da december 2014

Bucher-Brini, Holzinger-Loretz, Geisseler, Albertin, Alig, Atanes, Baselgia-Brunner, Blumenthal, Burkhardt, Caduff, Cahenzli-Philipp (Vaz sut), Casanova (Glion), Casty, Caviezel (Cuira), Clalüna, Crameri, Darms-Landolt, Della Vedova, Deplazes, Dosch, Engler, Epp, Florin-Caluori, Foffa, Gartmann-Albin, Grass, Gunzinger, Hardegger, Hitz-Rusch, Jaag, Jeker, Jenny, Kasper, Koch (Igis), Kunfermann, Locher Benguerel, Lorez-Meuli, Michael (Castasegna), Monigatti, Müller, Niederer, Niggli (Samedan), Noi-Togni, Paterlini, Perl, Peyer, Pfenninger, Pult, Sax, Schneider, Steck-Rauch, Steiger, Thomann-Frank, Thöny, Tomaschett-Berther (Trun), Toutsch, Troncana-Sauer, Valär, Vetsch (Pragg-Jenaz), Waidacher, Widmer-Spreiter, Cajacob, Tuor

Resposta da la regenza

Er en il chantun Grischun daventa la mancanza da medias e medis da chasa qualifitgads adina pli gronda – in fatg ch'è bain enconuschent a la regenza. Ina mesira per cumbatter quest svilup pauc allegraivel è l'uschenumnà program "Capricorn – assistenza da pratica en il chantun Grischun". Dapi l'onn 2010 surpiglia il chantun 75% dals custs da salari per in'assistenza da pratica d'in mez onn che stat a disposiziun a quatter futuras medias u medis da chasa. Sin fundament dal success evident ha la regenza augmentà per il 1. da schaner 2015 il volumen sin sis plazzas d'assistenza da pratica (quai che correspunda a trais plazzas a temp cumplain).

Sco menziunà en l'incumbensa han candidatas e candidats stuì vegnir refusads per l'onn 2015, malgrà l'augment sin sis plazzas. Per che naginas candidaturas na stoppian pli vegnir refusadas en l'avegnir, vegni pretendì en l'incumbensa d'abolir a partir dal 1. da schaner 2015 la limita da sis plazzas.

En renconuschientscha da l'augment da la dumonda ha la regenza concludì – a chaschun da sia sesida dals 3 da favrer 2015 – d'extender il program "Capricorn" da sis sin otg plazzas da praticum (quai che correspunda a 400 pertschients da plazzas). Per ch'ins possia reagir en l'avegnir pli svelt ed en moda pli flexibla sin in ulteriur augment da candidaturas – in svilup ch'è en sasez giavischà –, sto la direcziun dal program rediger da nov mintga onn fin la fin da zercladur in rapport davart l'andament dal program per mauns dal departament da giustia, segirezza e sanadad. Uschia poi vegnir garantì ch'ins po metter a disposiziun mintga onn in dumber da plazzas che correspunda al dumber da candidaturas.

Sin fundament da las explicaziuns qua survart propona la regenza d'acceptar l'incumbensa e da la stritgar sco liquidada.

11 da favrer 2015