Displaschaivlamain èsi uschia ch'i dat adina dapli violenza fisica e psichica envers uffants. La statistica mussa che passa 50 uffants moran mintga onn en Svizra en consequenza da violenza. L'onn 2009 èn vegnids registrads 785 cas da maltractament d'uffants. Las statisticas dal chantun Turitg per ils onns 2012/13 mussan in ulteriur augment da la problematica. En il chantun Tessin sto vegnir ospitalisà mintga emna in uffant pervia da maltractaments. Er vegnan constatads adina dapli cas da negligientscha d'uffants. Questas situaziuns engrevgeschan fermamain ils servetschs socials, las autoritads per la protecziun d'uffants ed ils fatgs da sanadad. Ed il mender: Uffants che han stuì far talas experientschas pateschan savens lur vita entira da las consequenzas traumaticas.
Ins po pia sa dumandar sch'ils chantuns interprendan avunda per evitar las suffrientschas da quests uffants e per distgargiar correspundentamain ils posts d'agid. Quai para mo pussaivel, sch'i po vegnir realisada ina prevenziun seriusa. Tenor las infurmaziuns eruidas para la prevenziun en quest sectur effectivamain dad esser in punct debel en noss chantun. Quai è er sa mussà tar la deliberaziun dal preventiv 2015: Quel prevesa mo contribuziuns per la cussegliaziun e per l'agid immediat a victimas da violenza sco er l'indemnisaziun da persunas pertutgadas e da lur famiglias – la prevenziun n'è dentant betg cumpigliada. Er il credit posteriur, che la cumissiun da gestiun ha concedì ils 18 da november 2014 per l'agid a victimas, figurescha sut questa designaziun. Il credit posteriur conferma dal rest ch'i dovra mesiras en quest sectur.
Sa basond sin questas infurmaziuns e siond da l'avis ch'ina buna prevenziun – che po vegnir realisada dal post d'agid a victimas – gida ad evitar suffrientschas ed a spargnar daners, incumbensain nus la regenza da deditgar sia attenziun a questa tematica, d'instradar mesiras da prevenziun e da metter a disposiziun ils meds finanzials correspundents.
Cuira, ils 11 da december 2014
Noi-Togni, Bucher-Brini, Deplazes, Atanes, Cahenzli-Philipp (Vaz sut), Casanova-Maron (Domat), Casty, Caviezel (Cuira), Darms-Landolt, Della Vedova, Epp, Fasani, Florin-Caluori, Gartmann-Albin, Hardegger, Hitz-Rusch, Holzinger-Loretz, Jaag, Locher Benguerel, Mani-Heldstab, Michael (Castasegna), Monigatti, Müller, Niggli (Samedan), Papa, Pedrini, Perl, Peyer, Pfenninger, Pult, Rosa, Steck-Rauch, Thomann-Frank, Thöny, Widmer-Spreiter
Resposta da la regenza
Il post da cussegliaziun per l'agid a victimas dal chantun Grischun è responsabel per exequir la lescha federala davart l'agid a victimas da delicts (lescha davart l'agid a victimas). En quest rom ha mintga persuna ch'è vegnida donnegiada directamain en sia integritad corporala, psichica u sexuala tras in malfatg, il dretg da survegnir sustegn tenor questa lescha. Quest dretg po vegnir fatg valair er da confamigliars e da proxims parents da la victima. L'agid a victimas cumpiglia la cussegliaziun e l'agid immediat sco er l'agid a vista pli lunga dals posts da cussegliaziun u contribuziuns als custs per l'agid a vista pli lunga da terzas persunas, l'indemnisaziun, la satisfacziun sco er la dispensaziun dals custs da procedura. Mesiras preventivas n'èn betg previsas en la lescha davart l'agid a victimas. En quest reguard èsi fauss da trair in connex tranter il preventiv resp. tranter in credit posteriur dal post da cussegliaziun per l'agid a victimas d'ina vart e las mesiras preventivas da la protecziun d'uffants da l'autra vart. Il credit posteriur è daventà necessari per indemnisar custs supplementars per l'agid immediat.
La protecziun d'uffants e da giuvenils cunter maltractaments ha ina gronda prioritad per la regenza. Perquai prendan ils posts spezialisads correspundents mesiras preventivas en differents secturs. Intgins exempels:
Sectur da l'educaziun e da la furmaziun
La finamira da furmaziun da la scola populara da promover e da sustegnair ils uffants ed ils giuvenils en il svilup da lur persunalitad cumpiglia er la prevenziun da maltractaments e da violenza. La prevenziun è francada en differents secturs spezials dals plans d'instrucziun. Il servetsch psicologic da scola (SPS) è collià sin plaun regiunal cun las autoritads per la protecziun d'uffants e da creschids (APUC) e cun autras organisaziuns spezialisadas er areguard las dumondas da la prevenziun, ed el porscha divers referats e curs. Er en il sectur da Giuventetgna+sport (G+S) vegn prestada lavur da prevenziun cun agid da differentas mesiras, ed i vegn infurmà, co ch'ins duai proceder en cas da suspects. L'ambassadura chantunala da cool&clean renda enconuschent a las uniuns ed a las federaziuns grischunas il program naziunal da prevenziun sco er ils programs d'etica da Swiss olympic. En curs per furmaturas e furmaturs da la professiun vegni infurmà davart l'obligaziun d'assistenza da las patrunas e dals patruns, en spezial en connex cun mulestas sexualas, mobing e rassissem. En il rom da cussegliaziuns da manaschis d'emprendissadi vegni rendì attent ch'i stoppian vegnir prendidas mesiras per proteger l'integritad persunala da las emprendistas e dals emprendists (ed er da las lavurantas e dals lavurants).
Sectur social
Cun il telefon 147 da la Pro juventute, cun il clom d'urgenza per geniturs (tel. 0848 35 45 55) e cun il Maun offert (tel. 143) sustegna e promova la regenza projects impurtants ch'èn fitg simpels e nunbirocratics e che cuntanschan explicitamain in effect preventiv. Intginas da questas purschidas sa drizzan sapientivamain ad uffants ed a giuvenils. Cun il conclus dal 1. da fanadur 2014 (protocol nr. 655) ha la regenza plinavant designà il post da cussegliaziun per l'agid a victimas sco post da coordinaziun per la violenza a chasa.
Sectur da la sanadad
En il sectur da la sanadad surpiglia la cussegliaziun per mammas e per babs incumbensas per la prevenziun da maltractaments d'uffants. Plinavant realisescha l'uffizi da sanadad curs da furmaziun per geniturs e programs chantunals da prevenziun.
Sectur da la giustia e da la polizia
En la protecziun d'uffants lavura la polizia chantunala cunzunt en il sectur da la violenza a chasa en moda preventiva ed infurmescha ils geniturs e las persunas responsablas per l'educaziun, cunquai ch'ils uffants èn savens pertutgads directamain u indirectamain da la violenza a chasa. Infurmaziuns utilas en chaussa survegn la populaziun er sin la pagina d'internet da la Prevenziun svizra da la criminalitad (www.skppsc.ch).
Per la regenza è ina prevenziun d'auta qualitad fitg impurtanta. Perquai metta ella a disposiziun meds finanzials en differents secturs. En il preventiv na figureschan quests meds finanzials betg adina separadamain, perquai ch'els vegnan savens concedids sco part da differentas posiziuns dal preventiv e betg sco credits individuals per projects u per purschidas specificas. La regenza è da l'avis ch'ils interess da las sutsegnadras e dals sutsegnaders sajan resguardads suffizientamain tras las numerusas mesiras preventivas existentas, ed ella propona al cussegl grond da refusar l'incumbensa.
4 da mars 2015