En il rom dal program naziunal da perscrutaziun PNP 61 vegnan tschentadas dumondas davart ina guvernanza persistenta da l'aua ed i vegn elavurada la basa per ina strategia per il futur, e quai per segirar l'aua sco resursa e l'economia d'aua da la Svizra.
En il rapport vegni constatà che la dumonda dal provediment d'aua è fragmentada fermamain. Da quai resultian numerusas interfatschas, blers conflicts d'interess ed in grond basegn da coordinaziun cun gronds custs ch'èn colliads cun quai. Supplementarmain gioghian ina rolla er princips giuridics spezials. Ultra da la politica publica da protecziun e d'utilisaziun che saja francada en la constituziun federala ed en basas legalas reglian er dretgs privats da las auas il tractament da l'aua sco resursa.
La gronda stabilitad dals dretgs d'utilisaziun concedids augmentia però la segirezza giuridica per investiders resp. per ils utilisaders privats da l'aua, ma difficulteschia l'adattaziun a situaziuns midadas. Al lieu funcziunia la concordanza en il sistem cumplex dals dretgs da las auas per gronda part bain. Pervia d'interess differents, per part cuntradictorics saja in agir cuminaivel en direcziun d'in svilup persistent però difficil.
En il rapport vegni ultra da quai constatà che la coordinaziun en cas da conflicts e che la soluziun da conflicts per lung d'ina aua currenta u tranter las partidas che sa chattan en la part sura d'ina aua e las partidas che sa chattan en la part sut d'ina aua survegnia ina impurtanza adina pli centrala. Er auters champs da tensiun s'accentueschian, sco p.ex. quels tranter la producziun d'aua da baiver e l'agricultura u l'utilisaziun da la forza idraulica ed il turissem.
En il program annual 2015 menziunescha la regenza grischuna ch'ella veglia cumplettar l'atlas dal provediment d'aua per in terz da las vischnancas. Il stadi actual dal provediment d'aua en situaziuns d'urgenza saja vegnì eruì en il rom da las retschertgas concernent il basegn da cumplettaziun ed i saja vegnida fatga ina survista en chaussa.
Las sutsegnadras ed ils sutsegnaders fan las suandantas dumondas:
1. A tge resultat vegnan las retschertgas concernent il provediment d'aua en situaziuns d'urgenza en il Grischun?
2. Co giuditgescha la regenza la situaziun?
3. Constattan las constataziuns dal PNP 61 numnadas qua survart er per il Grischun?
4. Cura pon ins far quint cun l'atlas dal provediment d'aua cumplettà dal tuttafatg?
Cuira, ils 10 da favrer 2015
Thöny, Zanetti, Atanes, Baselgia-Brunner, Bucher-Brini, Caduff, Cahenzli-Philipp, Casanova (Glion), Caviezel (Cuira), Deplazes, Dosch, Felix (Scuol), Gartmann-Albin, Hardegger, Jaag, Locher Benguerel, Mathis, Monigatti, Niederer, Noi-Togni, Perl, Peyer, Pfenninger, Pult
Resposta da la regenza
Il provediment d'aua è ina part da l'avertura ed uschia ina incumbensa publica che vegn ademplida en il Grischun da las vischnancas sin basa da la legislaziun chantunala davart la planisaziun dal territori. En il sectur da l'avertura èn las vischnancas obligadas da relaschar agens reglaments che na ston betg vegnir approvads dal chantun. Pervia da questas cumpetenzas n'aveva la regenza ditg nagina survista da la situaziun tar ils provediments communals d'aua. Tuttina datti en il sectur dals provediments d'aua differentas interfatschas cun incumbensas dal chantun. Uschia procura il chantun per reservas d'aua da stizzar fieu e per contribuziuns a projects da provediment d'aua per vitgs che han ina interessenza agricula considerabla sco er per alps e bains isolads. Plinavant è el cumpetent per survegliar l'autocontrolla dals provediments d'aua da baiver en il rom da la legislaziun da victualias sco er per garantir il provediment d'aua en situaziuns d'urgenza ch'èn regladas en l'ordinaziun davart la garanzia dal provediment cun aua da baiver en situaziuns d'urgenza tras la confederaziun. Per la realisaziun da questa ordinaziun è cumpetent l'uffizi per la natira e l'ambient (UNA). L'incumbensa pretenda però ina collavuraziun interdepartamentala da differents uffizis ed è actualmain er l'object da l'analisa currenta da las periclitaziuns (KATAPLAN). En il punct central da svilup nr. 16 dal program da la regenza 2013–2016 vegn concretisada la planisaziun dal provediment d'aua da baiver en situaziuns d'urgenza. En il rom da questas lavurs è vegnì evaluà il stadi da la documentaziun ch'exista tar las vischnancas per garantir il provediment d'aua da baiver en situaziuns d'urgenza (PABSU) sco part integrala dals manuals davart la garanzia da la qualitad.
1. Da las 146 vischnancas ch'existan l'onn 2014 han 86 in manual davart la garanzia da la qualitad da l'aua da baiver. En 23 manuals vegn tematisada la dumonda dal provediment d'aua da baiver en situaziuns d'urgenza. Las documentaziuns tar la PABSU èn en quest connex, cun paucas excepziuns, però fitg curtas.
2. Almain il stadi da la documentaziun dals provediments d'aua mussa in basegn d'agir. En il rom dal program da la regenza 2013–2016 vegn perquai elavurà in concept per realisar l'ordinaziun davart la garanzia dal provediment cun aua da baiver en situaziuns d'urgenza tras la confederaziun. Quest concept duai mussar cun tge standards minimals organisatorics ed architectonics che la segirezza dal provediment po vegnir mantegnida en ina situaziun d'urgenza. Cur che la regenza ha approvà quest concept, sto el vegnir realisà da las vischnancas. Ultra da quai duai la regenza survegnir la pussaivladad da far prescripziuns concretas en il cas singul.
3. Ins sto far quint che las constataziuns fatgas en il PNP 61 valan er per il Grischun, però cun grondas differenzas tranter ils var 300 provediments d'aua. Perquai stoi l'emprim vegnir eruì tge deficits ch'existan tar ils singuls provediments d'aua en quai che concerna las pretensiuns al provediment d'aua da baiver en situaziuns d'urgenza e – sa basond sin quai – ston vegnir deducidas las mesiras ch'èn necessarias, graduadas tenor l'impurtanza dal provediment d'aua.
4. Il basegn d'actualisar ils atlas dal provediment d'aua (APA) è vegnì eruì ils onns 2013 e 2014. Cun l'actualisaziun èsi vegnì cumenzà la fin da l'onn 2013. Quella vegn fatga – dividida en 10 regiuns d'elavuraziun – sin basa dals meds finanzials avant maun en moda graduada ils onns 2013 fin 2015. Las incumbensa èn vegnidas surdadas en la procedura da surdada directa a differents biros da planisaziun ed a divers geomatichers grischuns. Fin ussa han pudì vegnir actualisadas 2 regiuns ch'il UNA ha controllà ch'ellas sajan cumplettas. Sch'i na dat nagins retards tar ils biros da planisaziun incumbensads, vegn l'actualisaziun dal APA ad esser terminada la fin da l'onn 2015.
16 d'avrigl 2015