Navigaziun principala

Cuntegn da la pagina

Incumbensa Blumenthal concernent mesiras supplementaras per reducir ils dis ch'il pass dal Lucmagn è serrà

Sessiun: 21.04.2015
L'enviern 2014/2015 è il pass dal Lucmagn stà avert per la 15avla giada durant l'enviern. Ina cunvegna davart l'avertura dal pass dal Lucmagn durant l'enviern tranter ils chantuns Grischun e Tessin sco er l'uniun Pro Lucmagn, ch'è responsabla per il mantegniment da la via, regla per in temp illimità il manaschi dal pass durant l'enviern.

L'avertura dal pass durant l'enviern porta a la Surselva ed a la Val dal Blegn tant avantatgs economics sco er socioculturals. Plinavant ha il pass dal Lucmagn ina impurtanza immensa ord vista topografica sco er per la cuntanschibladad da la Surselva e da ses territoris turistics (cunzunt Sedrun-Andermatt / Mustér / Breil-Vuorz / Sursaissa-Mundaun). Durant ils lungs mais d'enviern è il pass dal Lucmagn l'unica colliaziun da la Surselva cun il Tessin e cun l'Italia dal nord.

L'activitad da lavinas al pass dal Lucmagn è ordvart gronda. L'enviern 2013/2014 èn per exempel vegnidas giu 71 lavinas fin sin la via dal pass (57 lavinas spontanas, 14 siglientadas). Dal cumenzament da november 2013 fin la fin d'avrigl 2014 è la via dal pass stada averta durant 131 dis e serrada durant 50 dis. L'incalculabladad da la natira chaschuna malsegirezzas tar ils giasts, uschia che quels desistan per part da viagiar en Surselva. Betg mo cun mesiras architectonicas, mabain gia cun investiziuns modestas en siglientadas permanentas da lavinas pudess la segirezza vegnir augmentada immediatamain e marcantamain er da la vart tessinaisa.

Pervia da la gronda impurtanza da questa colliaziun supplitgeschan las sutsegnadras ed ils sutsegnaders la regenza (sche necessari ensemen cun il chantun Tessin) d'instradar ulteriuras mesiras per pudair reducir marcantamain ed immediatamain ils dis ch'il pass dal Lucmagn è serrà.

La regenza vegn incumbensada da fixar – ensemen cun la regenza tessinaisa – la strategia futura dal stadi da la via dal pass dal Lucmagn e d'integrar questa strategia en il program da construcziun da vias 2017/2020 sco er d'instradar ulteriuras mesiras effizientas.


Cuira, ils 21 d'avrigl 2015

Blumenthal, Cajacob, Tomaschett (Breil), Albertin, Alig, Buchli-Mannhart, Caduff, Casutt-Derungs, Crameri, Darms-Landolt, Dosch, Epp, Fasani, Felix (Haldenstein), Geisseler, Kunfermann, Märchy-Caduff, Niederer, Sax, Tenchio, Tomaschett-Berther (Trun), Cantieni, Heini

Resposta da la regenza

Il pass dal Lucmagn vegn tegnì avert dapi l'enviern 2000/2001 tras l'uniun Pro Lucmagn. L'onn 2010, cur che la fasa d'emprova è ida a fin, han ins prendì l'occasiun d'actualisar l'analisa da las ristgas ch'il SLF aveva fatg l'onn 1998. Las enconuschientschas resultadas èn en spezial: 

Reducziun dals dis ch'il pass è serrà
Il pass dal Lucmagn vegn tegnì avert cun las mesiras "serrar" (vart dal sid) e "serrar e siglientar" (vart dal nord). Uschia ha il dumber da dis ch'il pass è serrà, pudì vegnir reducì en media da 155 a 37. Il pitschen dumber da lavinas che tutgan la via averta è in indizi ch'il concept tschernì è stà correct per segirar la via dal pass. Il dumber pli bass da dis serrads (mo pervia da lavinas) en cumparegliaziun cun las prognosas, mussa ch'il pass è stà avert uschè ditg sco pussaivel cun la segirezza correspundenta. Tuttina stoi vegnir menziunà ch'il concept da segirezza dependa da princip dal giudicament e da las mesiras che vegnan prendidas da las persunas ch'èn responsablas per la segirezza.

La gronda variabilitad dals temps d'avertura d'in onn a l'auter (8 dis serrads al minimum, 126 dis serrads al maximum) mussa, quant fitg che l'avertura durant l'enviern dependa – cun las mesiras tschernidas – da las relaziuns da l'aura e da la naiv. Cun ulteriuras mesiras organisatoricas pudess la serrada durant la notg eventualmain vegnir reducida per circa 6 notgs. Quai chaschunass dentant custs betg proporziunals.

Las ristgas principalas derivan dals irals da lavinas 30 e 34 (al nord da la galaria dal Scopi, GR) sco er S13 (Acquacalda, TI). Quests trais irals da lavinas èn la raschun per bunamain la mesadad da las ristgas da partenza. La construcziun da galarias tar quests irals da lavinas meglierass perquai la constanza e prolungass ils temps d'avertura. Da l'autra vart stattan dentant ils gronds custs per talas mesiras. Per realisar mesiras na dastga da princip betg mo vegnir giuditgà in singul iral da lavinas, perquai che plirs irals da lavinas sa mussan – sut relaziuns da l'aura e da la naiv sumegliantas – sco tuttina problematics. Per quest motiv fan mesiras architectonicas mo senn, sche las soluziuns tschernidas èn coordinadas ina cun l'autra sco concept general per tut ils irals da lavinas critics. Sin basa dal studi dal SLF vegnan ils chantuns Grischun e Tessin ad examinar pli detagliadamain las soluziuns proponidas, en spezial er areguard ils custs. 

Strategia dal stadi da la via dal pass dal Lucmagn
Ils chantuns Grischun e Tessin ston impunder ils proxims 20 onns meds finanzials considerabels per mantegnair la valur da la via dal Lucmagn tranter Mustér ed Olivone. Da la vart grischuna dal pass pretendan numerusas construcziuns artifizialas, ma er il vial mesiras da mantegniment e da reparaziun per passa 70 milliuns francs. Il chantun Tessin elavura actualmain in concept da mantegniment e da reparaziun per il traject dad Olivone fin sin il pass. Il basegn d'investiziun na po dentant betg anc vegnir stimà exactamain. I dastgass dentant er sa tractar d'ina summa da plirs diesch milliuns francs. En vista al fatg che quest basegn d'investiziun per mantegnair e per reparar la via dal Lucmagn è gia grond, èsi difficil da realisar a curta ed a media vista in'ulteriura renovaziun per meglierar la segirezza durant l'enviern.

La regenza è pronta d'acceptar l'incumbensa en il senn da las consideraziuns, ed ella sustegna l'incumbensa, uschenavant che las soluziuns proponidas duain vegnir examinadas pli detagliadamain areguard ils irals da lavinas 30 e 34 sin il territori grischun. En il program da construcziun da vias 2017-2020 duain plinavant vegnir resguardadas las mesiras voluminusas per mantegnair e per reparar l'infrastructura existenta da la via.

3 da zercladur 2015