Zum Seiteninhalt

Dumonda Cavegn concernent l'examinaziun preliminara materiala d'iniziativas chantunalas dal pievel

sessiun: 21.04.2015
Il favrer e l'avrigl 2015 èn duas iniziativas chantunalas dal pievel vegnidas decleradas sco nunvalaivlas dal cussegl grond. I na cuntenta betg, sch'i vegn debattà davart la nunvalaivladad d'ina iniziativa, suenter che quella è vegnida inoltrada.

Concernent l'examinaziun preliminara formala dumondan las sutsegnadras ed ils sutsegnaders perquai la regenza da preschentar al cussegl grond – sco cumplettaziun da l'art. 55 al. 1 vertent da la lescha davart ils dretgs politics – ina regulaziun per far in'examinaziun preliminara materiala d'iniziativas chantunalas dal pievel tenor ils criteris da l'art. 14 al. 1 da la constituziun chantunala (examinaziun facultativa u obligatorica, cun effect liant u nunliant). Uschia pudessan discussiuns davart il declerar iniziativas chantunalas dal pievel per nunvalaivlas vegnir evitadas resp. restrenschidas. Las iniziantas ed ils iniziants survegnissan ultra da quai ad ura la pussaivladad da render il text da lur iniziativa cumpatibel cun il dretg surordinà, avant che cumenzar a rimnar suttascripziuns.

Cuira, ils 21 d'avrigl 2015

Cavegn, Müller, Caluori, Albertin, Alig, Baselgia-Brunner, Brandenburger, Casanova-Maron (Domat), Casutt-Derungs, Crameri, Danuser, Darms-Landolt, Dosch, Epp, Fasani, Felix (Scuol), Foffa, Jaag, Joos, Koch (Tumein), Kunfermann, Locher Benguerel, Mathis, Nay, Niederer, Niggli (Samedan), Niggli-Mathis (Grüsch), Noi-Togni, Papa, Pedrini, Perl, Pult, Rosa, Sax, Steck-Rauch, Stiffler (Cuira), Tomaschett (Breil), Widmer-Spreiter, Heini, Rutishauser, Sigron, Vassella

Resposta da la regenza

Tenor l'art. 14 al. 3 da la constituziun chantunala (CC, DG 110.100) decida il cussegl grond davart la nunvalaivladad d'ina iniziativa chantunala dal pievel. Cunter sia decisiun poi vegnir recurrì tar la dretgira administrativa. Ils motivs da nunvalaivladad pussaivels èn enumerads en l'art. 14 al. 1 cifras 1 fin 4 CC. L'examinaziun preliminara d'iniziativas chantunalas tras la chanzlia chantunala, sco ch'ella è previsa en l'art. 55 al. 1 da la lescha davart ils dretgs politics en il chantun Grischun (LDPC, DG 150.100), è limitada ad aspects formals (furma da la glista da suttascripziuns e titel da l'iniziativa). L'introducziun d'ina procedura d'examinaziun preliminara materiala (dal cuntegn) che ha in effect liant pretendess – ultra d'ina midada da la lescha – er ina midada da la constituziun chantunala. Ina procedura d'examinaziun preliminara che n'è betg lianta per ils iniziants e per il cussegl grond pudess percunter vegnir installada sin il stgalim d'ina lescha.

Il tema d'ina examinaziun preliminara materiala d'iniziativas dal pievel cumpara periodicamain en la discussiun politica. La confederaziun che enconuscha en quest reguard ina regulaziun analoga sco il chantun Grischun (examinaziun preliminara formala tras la chanzlia federala, decisiun davart la valaivladad tras l'assamblea federala plenara; cf. art. 69 e 75 al. 1 da la lescha federala davart ils dretgs politics, CS 161.1) è gist ultimamain sa distanziada da persequitar vinavant il project per introducir in'examinaziun preliminara materiala nunlianta, e quai pervia dal resultat negativ da la consultaziun. En la consultaziun è er la regenza grischuna s'exprimida decididamain cunter ina tala examinaziun preliminara. Uschenavant ch'ils chantuns prevesan insumma in'examinaziun preliminara d'iniziativas dal pievel, sa restrenscha quella per regla, sco en il Grischun, ad aspects formals. In'excepziun è il chantun Son Gagl che enconuscha ina procedura d'examinaziun preliminara materiala ch'è obligatorica e lianta. La decisiun davart l'admissibladad da la dumonda d'iniziativa è en quest cas chaussa da la regenza. Cunter tala poi vegnir recurrì tar la dretgira administrativa. Pir cur che la decisiun è entrada en vigur, po il comité d'iniziativa annunziar la dumonda d'iniziativa per la rimnada da suttascripziuns (cf. art. 36 e 37 da la lescha davart il referendum e l'iniziativa, LRI, sGS 125.1). Il chantun Basilea-Citad prevesa almain la pussaivladad ch'ils comités d'iniziativa pon laschar sa cussegliar giuridicamain dal post designà dal cussegl guvernativ cur ch'els formuleschan ina iniziativa. L'infurmaziun n'è lianta ni per il comité d'iniziativa ni per il cusseglier guvernativ e per il cussegl grond (cf. § 4 al. 4 da la lescha concernent l'iniziativa ed il referendum [LIR, SG 131.100]). Quest ultim decida davart l'admissibladad giuridica d'ina iniziativa (§ 15 al. 1 LIR).

Per ils motivs menziunads qua sutvart s'exprima la regenza decididamain cunter l'introducziun d'ina procedura d'examinaziun preliminara materiala u cunter ina cussegliaziun giuridica preliminara dal comité d'iniziativa en cas d'iniziativas chantunalas dal pievel.
- L'iniziativa dal pievel è ina proposta dal pievel al pievel. Perquai pari dad esser delicat ord vista da la politica da stadi, sche posts statals pon influenzar il cuntegn d'ina dumonda d'iniziativa.
- Ina tala procedura po avair l'effect che las responsabladads vegnan disfatgas. Sch'il comité d'iniziativa accepta – en quai che concerna il cuntegn – prescripziuns u propostas dal post statal, na sa retira el – en la discussiun posteriura – correspundentamain betg mo da la responsabladad giuridica, mabain er da la responsabladad politica.
- Tras ina tala procedura survegn ina iniziativa, ch'è mo previsa, gia ina gronda paisa avant ch'ella è sa procurada la legitimitad necessaria sin basa dal dumber da suttascripziuns indispensabel.
- Pervia da la pauca lavur d'inizialisaziun che sto vegnir prestada (i n'è betg necessari da rimnar ordavant suttascripziuns), da la gratuitadad e dal potenzial d'attenziun mediala porta ina tala procedura er il privel latent en sai ch'ella pudess vegnir malduvrada per spirs intents da propaganda.
- En cas d'ina concepziun nunlianta da la procedura en il senn d'ina cussegliaziun preliminara dal comité d'iniziativa exista la problematica ch'i pon resultar giudicaments divergents tranter l'instanza administrativa pregiuditganta e l'instanza politica (cussegl grond) ch'è cumpetenta da decider liantamain davart la nunvalaivladad d'ina iniziativa. Talas divergenzas fissan fitg nauschas per la credibladad da la procedura e chaschunassan bain er regularmain confusiuns en il process public da furmaziun da l'opiniun.

La regenza è conscienta che la cumpetenza dal cussegl grond, sco ch'ella è vegnida fixada da l'autur da la constituziun, da decider davart la valaivladad d'iniziativas dal pievel, po esser fitg pretensiusa en l'applicaziun pratica, perquai ch'il cussegl grond sto s'occupar sfurzadamain il medem mument cun dumondas politicas e cun dumondas giuridicas. Dal puntg da vista da la regenza na resulta però nagina necessitad da la pratica vertenta dal cussegl grond da midar insatge vi da l'urden da cumpetenzas actual. Anzi, or da l'optica da la politica da stadi pari dad esser gist ch'il cussegl grond sco autoritad chantunala suprema e sco represchentanza dal pievel elegida gioghia ina rolla centrala en la procedura per giuditgar la validitad giuridica materiala d'iniziativas dal pievel.

3 da zercladur 2015