Navigaziun principala

Cuntegn da la pagina

Incumbensa Epp concernent la deregulaziun e las distgargias administrativas

Sessiun: 21.04.2015
Pervia da la fermezza dal franc svizzer e pervia d'ulteriuras malsegirezzas che resultan er da la realisaziun da l'iniziativa dal pievel "Cunter l'immigraziun da massa" stat l'economia grischuna davant sfidas enormas. En spezial l'economia d'export, il turissem e l'economia da construcziun pateschan gia da quai.

Qua tras vegn la regenza incumbensada d'examinar e da sminuir da radent la birocrazia da permissiuns. Per quest intent stoi vegnir fatg il suandant:

1. Endrizzar in spurtegl virtual ch'è accessibel publicamain e che duai pussibilitar a nossas interpresas, ma er a persunas privatas d'inditgar ils custs da regulaziun, ils andaments da procedura, duplicitads e proceduras che duran ordvart ditg.

2. Limitar cun agid da termins regulars legals la lavur administrativa da las interpresas en proceduras da permissiun. Las adattaziuns correspundentas duain esser realisablas senza resursas persunalas supplementaras.

3. Mussar en l'avegnir en moda consequenta ils custs da regulaziun, e quai confurm al check-up da regulaziuns ch'è vegnì sviluppà dal SECO. La finamira sto esser quella da reducir ils custs che resultan tras la regulaziun.

Cuira, ils 21 d'avrigl 2015

Epp, Schneider, Caduff, Albertin, Blumenthal, Burkhardt, Casty, Casutt-Derungs, Cavegn, Caviezel (Tavau Clavadel), Crameri, Darms-Landolt, Dosch, Fasani, Foffa, Geisseler, Joos, Kasper, Kunfermann, Mathis, Niederer, Noi-Togni, Pedrini, Sax, Schutz, Stiffler (Tavau Plaz), Thomann-Frank, Tomaschett (Breil), Tomaschett-Berther (Trun), Zanetti, Cajacob, Cantieni, Ellemunter, Heini, Sigron

Resposta da la regenza

Er la regenza è da l'avis che l'economia grischuna è actualmain en ina situaziun difficila e ch'ella è confruntada cun las sfidas las pli differentas. A questas sfidas vul ella far frunt cun mesiras concretas. Numerusas finamiras èn vegnidas preschentadas dal cussegl grond en la debatta concernent il rapport da la regenza davart il svilup economic en il chantun Grischun. Per la realisaziun èsi dentant necessari da far ina priorisaziun. Sco emprim debattescha il cussegl grond en la sessiun d'avust 2015 davart la revisiun totala da la lescha davart il svilup economic. En la medema sessiun tracta il cussegl grond las finamiras e las directivas politicas surordinadas ch'èn vegnidas elavuradas da sia cumissiun strategica en collavuraziun cun la regenza per la perioda da planisaziun 2017-2020 dal program da la regenza e dal plan da finanzas. Sin basa da quai suonda lura en la sessiun da favrer 2016 la discussiun davart ils programs formulads da la regenza. Quels vegnan a cuntegnair finamiras e puncts centrals da svilup per ils proxims 4 onns principalmain en il sectur da l'economia. Davart las singulas pretensiuns da las incumbensadras e dals incumbensaders po vegnir menziunà il suandant:

1. In unic spurtegl virtual dal gener pretendì n'exista betg. Percunter è la purschida online vegnida cumplettada gist l'ultim temp cun infurmaziuns davart cumpetenzas, proceduras, persunas da contact responsablas e pussaivladads d'intervenziun en il senn da las incumbensadras e dals incumbensaders. La regenza renviescha en quest reguard a la resposta a la dumonda Felix (Haldenstein) che vegn tractada en la medema sessiun. Là èn er cuntegnidas infurmaziuns davart auters instruments da deregulaziun. Per l'applicaziun da quests instruments èn per part cumpetentas instituziuns che sustegnan l'economia.

2. Tut las autoritads èn suttamessas al princip d'acceleraziun: Ellas ston tractar en moda speditiva las proceduras introducidas tar ellas e procurar senza retard che quellas vegnian liquidadas. Plinavant èn las proceduras ed ils termins da liquidaziun per part reglads en la legislaziun speziala sin plaun federal e chantunal, uschia per exempel en la lescha chantunala davart la planisaziun dal territori. Termins regulars legals defineschan il temp che dastga vegnir duvrà per ina procedura da permissiun. Regular unicamain la durada porta pauc en vista a la distgargia administrativa da las interpresas. Savens è la cumplexitad dal cuntegn il motiv ch'ina procedura chaschuna blera lavur e gronds custs. En quest reguard porti dapli da rinforzar – sco prendì en consideraziun – la coordinaziun e la collavuraziun da las autoritads cumpetentas.

3. Il check-up da regulaziuns ch'è vegnì sviluppà dal SECO cuntegna in process cumplessiv per eruir las obligaziuns d'agir las pli impurtantas e per gruppar e reparter quellas sin classas d'interpresas. A maun dals dumbers da cas eruids ha lura lieu ina valitaziun tras expertas ed experts. Sch'ina tala valitaziun n'è betg pussaivla, ston vegnir fatgas intervistas cun las interpresas. La valitaziun tras las expertas ed ils experts sto vegnir validada tras ulteriuras intervistas cun las interpresas, e la finala vegnan calculads ils custs. Lura suondan lavuratoris, nua ch'i vegnan identifitgadas simplificaziuns. Quellas èn la basa per ina valitaziun finala da las consequenzas da la regulaziun. Il SECO prevesa d'incumbensar terzas persunas cun quests check-ups da regulaziuns. Er sche tals check-ups da regulaziuns vegnissan realisads sin plaun chantunal cun resursas entaifer l'administraziun, premettan els en mintga cas la participaziun da las interpresas. Quai chaschuna da sia vart ina nova chargia administrativa supplementara. Sin plaun chantunal vegni desistì d'ina procedura che chaschuna talmain blera lavur. Controllas ed optimaziuns dals process vegnan fatgas cuntinuadamain cun la finamira d'als meglierar permanentamain.

Tenor l'avis da la regenza existan avunda instruments da deregulaziun e da debirocratisaziun, che las interpresas e las persunas privatas na dovran dal rest betg en moda stravaganta. D'ulteriuras mesiras en questas sectur duai perquai vegnir desistì. La regenza propona al cussegl grond da refusar questa incumbensa.

27 da matg 2015