Cuntegn da la pagina

Dumonda Cahenzli-Philipp concernent la realisaziun dal program d'aglomeraziun Cuira 2

sessiun: 27.08.2015
En il chapitel 6.2.1 «Aglomeraziun Cuira e conturns» dal plan directiv chantunal èsi menziunà ch'igl exista tranter Razén e Malans in grond potenzial per il traffic da velos a curta distanza. Plinavant vegni crititgà che las purschidas per il traffic betg motorisà sajan insuffizientas, e quai tant areguard la quantitad sco er areguard la qualitad. Sco finamira vegn lura formulada la construcziun d'ina stretga rait da colliaziuns dal traffic betg motorisà en l'entir territori d'aglomeraziun, e quai per garantir colliaziuns segiras, curtas e confortablas senza deturs.

Per cuntanscher questa finamira vegnan enumeradas sin ils fegls da mesiras tar il program d'aglomeraziun Cuira 2 dals 6 da zercladur 2012 las optimaziuns e las coordinaziuns planisadas en il traffic betg motorisà (fegl da mesiras nr. 10). En quest connex vegnan er menziunadas differentas mesiras che pretendan per part adattaziuns architectonicas pli grondas er sin las vias chantunalas (p.ex. mesira nr. 10.9: schlargiament da la punt dal Rain a Vaz sut).

Las mesiras han survegnì la prioritad A, e sco orizont da realisaziun vegni inditgà «a partir da l'onn 2015».

Nus supplitgain la regenza da respunder las suandantas dumondas:

1. Co sa preschenta l'urari per realisar il program d'aglomeraziun Cuira 2?

2. Dastgan ins partir dal fatg che las mesiras architectonicas che pertutgan las vias chantunalas vegnian integradas en il program da construcziun da vias 2017–2020?

3. Pon ins trair a niz sinergias raschunaivlas en connex cun il spustament dal vial nord da la A13 e cun la nova colliaziun traversala Zizers/Vaz sut?

Cuira, ils 27 d'avust 2015

Cahenzli-Philipp, Thöny, Geisseler, Atanes, Baselgia-Brunner, Blumenthal, Bondolfi, Brandenburger, Bucher-Brini, Buchli-Mannhart, Caluori, Cavegn, Deplazes, Felix (Haldenstein), Florin-Caluori, Gartmann-Albin, Hardegger, Hug, Jaag, Jeker, Koch (Tumein), Kollegger, Komminoth-Elmer, Lamprecht, Locher Benguerel, Märchy-Caduff, Monigatti, Noi-Togni, Paterlini, Perl, Peyer, Pult, Schneider, Tenchio, Vetsch (Claustra Vitg), Widmer-Spreiter, Zanetti (Landquart), Degiacomi, Föhn

Resposta da la regenza

La confederaziun paja contribuziuns finanzialas per mesiras che han l'intent da meglierar l'infrastructura da traffic en las citads ed en las aglomeraziuns (art. da la lescha davart il fond d'infrastructura, LFInfr; CS 725.13). Las mesiras che vegnan deducidas da programs d'aglomeraziun concernan strategias da svilup en l'areal d'abitadi sco er optimaziuns architectonicas e projects da renovaziun per il traffic individual motorisà, per il traffic public e per il traffic betg motorisà. L'avrigl 2015 han la confederaziun ed il chantun Grischun suttascrit ina cunvegna da prestaziun concernent il program d'aglomeraziun Cuira, 2. generaziun. Tenor quella èn previsas otg mesiras per il traffic motorisà e dudesch mesiras per il traffic betg motorisà per las vischnancas ch'èn situadas en il perimeter da l'aglomeraziun da Cuira. Cun la construcziun da las singulas mesiras duessi da princip vegnir cumenzà fin l'onn 2019 tenor la cunvegna da prestaziun, e las mesiras duessan esser realisadas fin l'onn 2027.

Tar la dumonda 1: Tenor la cunvegna da prestaziun menziunada sco er sin basa da las cunvegnas tranter il chantun e las vischnancas èn las vischnancas obligadas da preparar e da realisar las mesiras dals programs d'aglomeraziun. Questa cumpetenza correspunda er a l'art. 6 al. 4 da la lescha chantunala davart las vias (LVias; DG 807.100) che prevesa che las vischnancas projecteschian, construeschian e mantegnian ils stabiliments dal traffic betg motorisà. Normalmain vegn in project elavurà en enclegientscha cun il chantun. L'urari definitiv per las singulas mesiras vegn dentant per regla fixà pir en las dumondas da finanziaziun respectivas da las vischnancas. Consequentamain na po il chantun far actualmain naginas indicaziuns liantas areguard l'urari per realisar il program d'aglomeraziun Cuira, 2 generaziun.

Tar la dumonda 2: Il chantun surpiglia la realisaziun da singulas mesiras, sch'ellas pon vegnir realisadas en connex cun ina construcziun da vias. Quai vala per las colliaziuns da las vias da velos Cuira vest – rundella Favugn (per lung da la via taliana) e Landquart – Landquart fabricas (per lung da la via tudestga). Per tuttas duas colliaziuns èn ils projects d'exposiziun gia vegnids elavurads ed exponids publicamain. Cun las lavurs da construcziun duai vegnir cumenzà la primavaira 2016. Tuts dus projects figureschan en il program da construcziun da vias 2017–2020. Il schlargiament da la punt dal Rain a Vaz sut, che vegn menziunà en la dumonda, è – per ponderaziuns dals custs e dal niz – percunter giustifitgabel mo en il rom d'ina sanaziun da la punt. Tras quai che la punt è en in stadi general relativamain bun, n'è ina sanaziun betg previsa per il mument.

Tar la dumonda 3: Nua che quai è pussaivel e raschunaivel sco er economicamain giustifitgabel, tira il chantun adina a niz il potenzial per meglierar il traffic betg motorisà en cas da projects da construcziun che concernan las vias chantunalas e la rait da la via naziunala. Tras la construcziun da la nova colliaziun traversala Zizers/Vaz sut ha la mesira cuntegnida en il program d'aglomeraziun Cuira, 1. generaziun, per meglierar la colliaziun da las vias da velos (plan directiv regiunal "Traffic betg motorisà", mesira nr. 106) gia pudì vegnir resguardada en il project da construcziun da la confederaziun. Plinavant è vegnida cuntanschida ina meglieraziun duraivla da la colliaziun da las vias da velos en il territori industrial da Trimmis en il rom d'ina organisaziun temporara dal traffic individual motorisà. Il spustament dal vial nord da la A13 permetta d'optimar il trassé da la via da velos per lung dal Rain sco er l'access per Trimmis. Da medema maniera vegnan tratgas a niz las sinergias areguard la construcziun dal surpassadi da la via da velos tar la rundella Landquart/access A13 Landquart ed areguard la via da velos che maina da là a la staziun da Landquart (plan directiv regiunal "Traffic betg motorisà", mesira nr. 101). Cun las lavurs da construcziun da questa nova colliaziun da vias da velos duai vegnir cumenzà l'atun 2016.

14 d'october 2015