Tenor l'art. 29 da la constituziun chantunala èn las sesidas dal cussegl grond publicas – abstrahà d'intginas excepziuns. Ultra da las collavuraturas e dals collavuraturs da las medias sa rendan er adina puspè burgaisas e burgais interessads sin la tribuna. Cunzunt en cas da fatschentas dispitaivlas, sco dacurt p.ex. tar l'iniziativa cunter la chatscha speziala u tar l'iniziativa da linguas estras, exista in grond interess da vart da las aspectaturas e dals aspectaturs. Pervia da la grondezza da noss chantun n'han betg tut las abitantas e tut ils abitants las medemas premissas per persequitar facilmain ina debatta. En spezial per persunas e per classas da scola da las regiuns perifericas poi esser fitg stentus da s'infurmar d'emprim maun davart ils svilups en il cussegl grond. Uschia dovra p.ex. ina burgaisa da Brusio 2,5 uras (auto privat) resp. 4 uras (traffic public) per far il viadi ad ina debatta. Quella fatschenta che vegn tractada la damaun sco emprima po questa persuna persequitar de facto mo, sch'ella arriva gia la saira avant a Cuira.

Grazia a la tecnica moderna na stuess quai betg pli esser uschia ozendi. La confederaziun e differents chantuns, p.ex. Basilea-Citad, Soloturn, Vad, Vallais, Genevra, Berna (mo audio), Giura e Tessin, tiran gia a niz la pussaivladad dal livestream en l'internet. Las debattas vegnan transmessas live cun tun e maletg sur la pagina d'internet dal chantun. Persunas interessadas pon guardar las debattas en moda facila e nuncumplitgada a chasa al computer u en viadi al smartphone. Purschidas da livestream èn usitadas ozendi er en auters secturs, p.ex. a las universitads, tar occurrenzas da sport u tar conferenzas da pressa. Ina tala pussaivladad fiss perquai giavischabla er per la transmissiun da las debattas parlamentaras dal cussegl grond.

Il chantun Grischun ha renovà l'onn 2012 la sala dal cussegl grond. I èn vegnids installads in sistem da votaziun electronic modern ed in indriz da microfon d'auta qualitad. Qua tras è avant maun ina gronda part da las premissas tecnicas per realisar ina purschida da livestream. Uschia vegn il tun gia transmess en ils locals da medias da las staziuns da radio, ed er il maletg vegn transmess en moda rudimentara en questas localitads. I stuessan pia vegnir fatgas adattaziuns tecnicas mo relativamain pitschnas. En emprima lingia duvrassi cameras automaticas cun ina buna resoluziun ch'èn colliadas cun l'indriz da microfon. Usitadamain vegnan applitgadas trais, quatter cameras da paraid che zoomeschan mintgamai la persuna che ha avert il microfon. Grazia al manaschi automatic senza persunal da camera na resultan pia strusch custs da gestiun. I sa chapescha da sez ch'il chantun Grischun na dovra nagina soluziun da luxus resp. na sto betg sviluppar sez ina soluziun. In product da livestream favuraivel existent resp. in product che vegn applitgà en auters parlaments è da prender en mira.

Questa purschida da livestream porscha la pussaivladad da render accessibla la politica ad in public uschè vast sco pussaivel. Spezialmain er per persunas giuvnas ch'èn savens ed en moda rutinada en l'internet, è ina tala purschida interessanta. In access facil a las debattas politicas è adina er ina schanza che dapli glieud sa participescha sezza ad ina debatta resp. s'engascha politicamain.

Sa basond sin l'art. 50 da la lescha davart il cussegl grond po il cussegl grond prender in conclus direct en il sectur da sias atgnas cumpetenzas. En quest senn proponan las sutsegnadras ed ils sutsegnaders ch'i vegnian stgaffidas las premissas tecnicas (e sche necessari giuridicas), per che las burgaisas ed ils burgais possian persequitar las debattas dal cussegl grond cun maletg e tun sur livestream en l'internet.

Cuira, ils 21 d'october 2015

Caviezel (Cuira), Epp, Kuoni, Albertin, Alig, Baselgia-Brunner, Blumenthal, Bucher-Brini, Buchli-Mannhart, Cahenzli-Philipp (Vaz sut), Caluori, Campell, Casanova (Glion), Casanova-Maron (Domat), Cavegn, Caviezel (Tavau Clavadel), Crameri, Danuser, Darms-Landolt, Della Vedova, Deplazes, Fasani, Felix (Scuol), Florin-Caluori, Gartmann-Albin, Hitz-Rusch, Holzinger-Loretz, Jaag, Jenny, Koch (Tumein), Kollegger, Kunfermann, Locher Benguerel, Märchy-Caduff, Monigatti, Müller, Nay, Niederer, Noi-Togni, Papa, Pedrini, Perl, Pfenninger, Pult, Schneider, Steck-Rauch, Thöny, Tomaschett-Berther (Trun), von Ballmoos, Widmer-Spreiter, Antognini, Cajacob, Decurtins-Jermann, Degiacomi, Sonder