Navigaziun principala

Cuntegn da la pagina

Dumonda Tomaschett (Breil) concernent valurs previsas per multas disciplinaras e per denunzias tar il corp da polizia grischun

Sessiun: 08.12.2015

Ils 25 da settember 2015 ha il departament da giustia, segirezza e sanadad annunzià 17 novs polizists per la polizia chantunala dal Grischun. Quels èn vegnids brevetads en in rom festiv en la sala dal cussegl grond a Cuira. L'empermischun correspundenta «da respectar la constituziun e las leschas, da far obedientscha a la regenza dal chantun ed als superiurs, d'ademplir lur obligaziuns senza resguard da la persuna, senza sa laschar corrumper e tenor meglier savair e pudair, da sa tegnair strictamain a la vardad, da resguardar e da proteger ils dretgs dals burgais, da restar discret davart funcziuns e davart percepziuns da servetsch e d'impunder tut lur forza per liquidar lur incumbensas» han els fatg durant la festa da brevetaziun sur la bandiera dal Grischun.

 

Tenor la communicaziun a las medias da la polizia chantunala dal Grischun ha il cumandant da polizia Walter Schlegel appellà a ses novs collavuraturs da reagir da tut temp ed er en situaziuns difficilas cun persvasiun. Uschia stoppian els adina esser conscients dal fatg ch'els sajan engaschads per la segirezza da la populaziun. Il cusseglier guvernativ Christian Rathgeb ha explitgà che la polizia chantunala dal Grischun saja in corp da polizia modern, bain scolà, bain equipà ed haja ina direcziun effizienta.

 

Dapi il 1. d'october 2015 fan ils 17 polizists pia uffizialmain part da la polizia chantunala dal Grischun, e quai cun ils dretgs e cun las obligaziuns che resultan dal servetsch da polizia.

 

Ultra da l'incumbensa principala da procurar per la segirezza da la populaziun grischuna vegnan ils polizists suttamess pli e pli fitg a l'obligaziun da garantir per las entradas da daners da multas ch'èn planisadas en il preventiv dal chantun. Per las sutsegnadras ed ils sutsegnaders sa tschentan en quest connex las suandantas dumondas:

 

1. Existan tar la polizia chantunala dal Grischun valurs previsas per multas disciplinaras e per denunzias che ston vegnir cuntanschidas mintga onn?

 

2. Vegnan fatgas recumandaziuns als polizists da la polizia chantunala dal Grischun u vegn schizunt adossà in minimum da multas disciplinaras e da denunzias ch'èn d'emetter mintga onn?

 

3. Sche gea, tgi fixescha questas valurs previsas e co guardan quellas or per las differentas regiuns da noss corp da polizia?

 

4. Influenzescha il dumber da multas disciplinaras e da denunzias emessas d'in polizist sia ulteriura carriera professiunala?

 

5. Han la liquidaziun e la registraziun d'accidents da traffic (sco part da l'incumbensa principala da la polizia da procurar per la segirezza e per la protecziun da la populaziun) en la lavur quotidiana da la polizia la medema stima ed impurtanza tar ils posts surordinads sco l'emissiun da multas disciplinaras e da denunzias?

 

Cuira, ils 8 da december 2015

 

Tomaschett (Breil), Kunz (Cuira), Danuser, Albertin, Alig, Blumenthal, Caduff, Caluori, Casutt-Derungs, Caviezel (Tavau Clavadel), Crameri, Darms-Landolt, Dosch, Engler, Epp, Fasani, Florin-Caluori, Foffa, Geisseler, Giacomelli, Hitz-Rusch, Holzinger-Loretz, Jenny, Joos, Kunfermann, Märchy-Caduff, Niederer, Niggli (Samedan), Papa, Paterlini, Pedrini, Rosa, Sax, Schneider, Schutz, Thomann-Frank, Troncana-Sauer, Waidacher, Wieland, Zanetti, Andri, Berther (Segnas), Degiacomi, Spreiter, Tuor

Resposta da la regenza

Sco intenziun strategica en il sectur da la segirezza publica fixescha il program da la regenza per ils onns 2017-2020 tranter auter la reducziun da la criminalitad ed en spezial la reducziun dal turissem criminal sco er l'augment dal sentiment da segirezza da la populaziun.

Gia la fin da l'onn 2013 ha la polizia chantunala fatg in'examinaziun interna da las incumbensas, da las structuras e da las prestaziuns. En quella è er vegnida integrada l'enconuschientscha che la polizia chantunala stoppia augmentar sia preschientscha visibla e la pressiun da controllas per auzar il sentiment da segirezza e la quota da success en il cumbat cunter la criminalitad. Quai vala er per la preschientscha da la polizia sin las vias. Qua tras na vegn betg mo augmentada la segirezza en il traffic sin via, mabain vegnan er cuntanschids buns success areguard la tschiffada da persunas tschertgadas da la polizia criminala. Plinavant desistan persunas insumma da commetter delicts sin il territori chantunal. En quest connex ha la polizia – sin basa dal princip da legalitad – l'obligaziun da chastiar er cuntravenziuns en il traffic sin via. Ma la polizia n'ha betg la cumpetenza da desister en tscherts cas da la persecuziun penala d'in delict pervia da bagatella.

Resguardond questas finamiras ha la polizia chantunala definì valurs previsas per prestaziuns che ston vegnir furnidas primarmain en il servetsch extern, pia là, nua che la preschientscha visibla duai vegnir augmentada. Tut las prestaziuns pretendidas servan unicamain ad optimar l'adempliment da las incumbensas. Finamiras fiscalas n'existan naginas.

Sin basa da quests fatgs respunda la regenza las dumondas sco suonda:

1. Resguardond las finamiras numnadas ha la polizia chantunala fixà finamiras operativas minimalas per tschertas activitads polizialas, suenter ch'ella aveva – sco menziunà – examinà las incumbensas, las structuras e las prestaziuns. Latiers appartegnan tranter auter multas disciplinaras, controllas da persunas sco er denunzias en il sectur dal traffic sin via e dals narcotics. Las multas disciplinaras a chaschun da controllas da radar na fan explicitamain betg part da quai. Las finamiras menziunadas vegnan chapidas sco part da prescripziuns da finamiras e da prestaziuns pli cumplessivas.

2. L'administraziun chantunala e pia er la polizia chantunala vegnan manadas cun prescripziuns da finamiras e da prestaziuns. Quellas vegnan fixadas individualmain en il rom dal giudicament da las collavuraturas e dals collavuraturs, e quai mintgamai l'atun per l'onn suandant.

3. Las partiziuns da la polizia chantunala fixeschan independentamain las prescripziuns da finamiras e da prestaziuns sin basa da las differentas pretensiuns e dals divers basegns. Dal volumen da criminalitad en la Val dal Rain grischuna ed en la Mesolcina sco er da la situaziun da traffic sin la A13 (polizia da regiuns vest) resultan uschia autras pretensiuns che p.ex. en Engiadina ed en las vals dal sid cunfinantas (polizia da regiuns ost), nua ch'i vala bain er da cumbatter cunter il turissem criminal, ma nua ch'il volumen da traffic è pli pitschen. Perquai ston er las finamiras vegnir fixadas differentamain, tut tenor la regiun e tenor il territori dal post u da l'uffizi. Las valurs directivas annualas essenzialas èn las suandantas: Las collavuraturas ed ils collavuraturs da las basas da la polizia da traffic (BPT) tar la polizia da regiuns vest han actualmain ina finamira da 50 multas disciplinaras per onn. Specificamain tenor il territori d'acziun ston ellas ed els ultra da quai elavurar tranter 25 e 45 denunzias per onn. En il sectur da las cuntravenziuns cunter la lescha da narcotics n'existan naginas prescripziuns. Las collavuraturas ed ils collavuraturs dals posts da polizia ston incassar tranter 20 e 30 multas disciplinaras per onn. Plinavant è formulada la finamira da tschintg denunzias en connex cun la lescha da narcotics. Finamiras en il sectur da la legislaziun davart il traffic sin via (LTV) n'existan naginas per ils posts da polizia. Per resumar vul quai dir che las polizistas ed ils polizists da las BPT tar la polizia da regiuns vest han ina finamira da stgars 1 multa disciplinara e da 0,7 denunzias en il sectur da la LTV en media per emna. Tar las collavuraturas ed ils collavuraturs dals posts da polizia importan questas finamiras 0,5 multas disciplinaras e 0,1 denunzias en il sectur da la LN en media per emna.

Tar la polizia da regiuns ost, nua che la lavur è repartida autramain tranter las BPT ed ils posts da polizia, existan finamiras da 20 multas disciplinaras e da 50 denunzias per onn u funcziuns sumegliantas en il servetsch extern (p.ex. controllas da persunas). Quai èn 0,4 multas disciplinaras e stgars 1 denunzia/funcziun en il servetsch extern per emna.

Tar la polizia criminala n'existan per il territori dal post Cuira (Hansahof) naginas finamiras areguard las multas disciplinaras u la LN. Percunter han questas collavuraturas e quests collavuraturs finamiras da prestaziun pli autas en il sectur da las controllas da persunas.

4. Tenor l'ordinaziun da polizia cuntanschan ins grads da la truppa tut tenor ils onns da servetsch prestads. Las premissas per ina promoziun èn plinavant l'abilitad, la prestaziun, l'experientscha ed il cumportament da servetsch. Decisiv è in giudicament general che sa referescha a la funcziun. En cas da valurs previsas individualas vegni spetgà che quellas vegnian ademplidas, nun che pretensiuns da servetsch betg resguardadas han impedì in adempliment. Sche las finamiras annualas na vegnan betg ademplidas, po quai avair ina influenza sin il svilup dal salari u sin il pajament d'ina premia da prestaziun.

5. Las finamiras da prestaziuns menziunadas na mettan insumma betg en dumonda il servetsch d'accidents e la stima da tal. Senza dubi survegnan tut las collavuraturas e tut ils collavuraturs sco er il cader la stima necessaria, sch'els liquideschan las incumbensas delegadas en atgna responsabladad e cun ina buna qualitad. En quest connex vegnan il servetsch d'accidents, las acziuns per la prevenziun cunter la criminalitad e la segirezza dal traffic, ma er las autras incumbensas, che n'èn betg menziunadas qua, valitads tuts da medema maniera.

9 da mars 2016