Navigaziun principala

Cuntegn da la pagina

Dumonda Widmer-Spreiter concernent prestaziuns da la spitex en cas da clients domiciliads ordaifer il territori d'activitad

Sessiun: 08.12.2015
En la sessiun d'avust avain nus deliberà la lescha per promover il svilup economic en il chantun Grischun. En quest connex èsi vegnì debattà er davart la promoziun dal turissem ed en spezial davart il turissem da sanadad.

Gist en il sectur dal turissem da sanadad exista tenor mes avis in grond potenzial. La populaziun vegn pli e pli veglia, e cun la vegliadetgna resultan er adina dapli restricziuns. Glieud cun ina restricziun da la sanadad prefereschan da passentar lur vacanzas en Svizra, perquai che nus avain in bun sistem da sanadad. Blers da quests giasts dovran a chasa ed er en vacanzas prestaziuns da la spitex.

Nus differenziain qua trais categorias:

1. possessurs d'abitaziuns secundaras;

2. giasts d'hotels;

3. giasts che vulessan passentar lur vacanzas tar parents.

Tut quests giasts pon duvrar prestaziuns da la spitex. Displaschaivlamain n'è quai betg uschè simpel.

Tenor l'art. 31e al. 2 en cumbinaziun cun l'art. 31c al. 1 LTM (lescha per promover la tgira da persunas malsaunas; DG 506.000) han ils servetschs cun ina incarica da prestaziun communala l'obligaziun da furnir las prestaziuns a clients ch'èn domiciliads en il territori d'activitad (prestaziuns da tgira, prestaziuns da la tgira acuta e transitorica, prestaziuns da tegnairchasa e d'assistenza, servetsch da pasts).

Sch'in client n'è betg domicilià en il territori d'activitad, po la spitex refusar l'engaschi er senza motivaziun (tenor la decleraziun da l'uffizi da sanadad).

Servetschs senza incarica da prestaziun communala sco er tgirunzas e tgirunzs renconuschids n'han da princip nagina obligaziun da furnir prestaziuns a persunas ch'èn domiciliadas en il Grischun e che basegnan tgira ed assistenza.

Dumondas:

1. Renconuscha la regenza il basegn d'agir?

2. Co po questa problematica vegnir schliada? Ha er il chantun in interess d'extender quest sectur da giasts?

3. Poi vegnir fatg dapli squitsch sin las organisaziuns da la spitex cun ina incarica da prestaziun communala, per ch'ellas s'engaschian a favur da soluziuns cun ils clients numnads qua survart?

Cuira, ils 8 da december 2015

Widmer-Spreiter, Holzinger-Loretz, Cahenzli-Philipp, Atanes, Bleiker, Blumenthal, Brandenburger, Bucher-Brini, Buchli-Mannhart, Burkhardt, Casanova (Glion), Casty, Clalüna, Danuser, Davaz, Deplazes, Dosch, Foffa, Gartmann-Albin, Geisseler, Hardegger, Hitz-Rusch, Jaag, Jenny, Kasper, Koch (Tumein), Komminoth-Elmer, Lorez-Meuli, Mani-Heldstab, Märchy-Caduff, Marti, Michael (Donat), Nay, Niggli (Samedan), Niggli-Mathis (Grüsch), Noi-Togni, Papa, Pedrini, Perl, Salis, Steiger, Stiffler (Tavau Plaz), Tenchio, Thomann-Frank, Thöny, Waidacher, Costa, Degiacomi, Föhn, Spreiter

Resposta da la regenza

Tenor l'art. 31e al. 2 LTM (lescha per promover la tgira da persunas malsaunas; DG 506.000) han ils servetschs cun ina incarica da prestaziun communala l'obligaziun da furnir las prestaziuns subvenziunablas a clients ch'èn domiciliads en il territori d'activitad (prestaziuns da tgira, prestaziuns da la tgira acuta e transitorica, prestaziuns da tegnairchasa e d'assistenza, servetsch da pasts). Sch'in client n'è betg domicilià en il territori d'activitad, n'èn ils servetschs da spitex betg obligads da furnir las prestaziuns.

L'uffizi da sanadad ha fatg in'enquista tar ils servetschs communals da spitex concernent las prestaziuns che quests servetschs han furnì a giasts (clientas e clients domiciliads ordaifer il territori d'activitad). Ils ultims 2 onns han ils servetschs da spitex cun ina incarica da prestaziun communala survegnì 320 dumondas da giasts concernent prestaziuns da la spitex. Tut ils servetschs da spitex inditgeschan ch'els sajan fitg pronts da porscher lur prestaziuns er a giasts. L'enquista mussa er che mo singulas dumondas èn vegnidas refusadas ils ultims 2 onns (main che 5%). Motivs da refusa èn stads: Dumondas a vista memia curta, uschia che las capacitads persunalas mancavan, sco er giavischs memia fixs, sco per exempel adina la medema collavuratura, u pretensiuns nunflexiblas envers las uras da servetsch. En cas da dumondas infurmeschan ils servetschs da spitex ils giasts davart il proceder per dumandar la vischnanca da domicil la garanzia da surpigliar ils custs restants.

La regenza respunda las dumondas sco suonda:

1. Sin fundament da l'enquista tar ils servetschs communals da spitex na vesa la regenza nagin basegn d'agir.

2. La regenza ha ina tenuta positiva envers mintga mesira che gida d'attrair dapli giasts da vacanzas en il chantun. Per la problematica tematisada en la dumonda n'exista dentant ord vista da la regenza nagin basegn d'agir da vart dal chantun. Sche las vischnancas han la finamira d'extender il segment da giasts da vacanzas cun restricziuns da la sanadad, pon ellas far cun ils servetschs da spitex cunvegnas da prestaziun che fixeschan in'obligaziun da furnir las prestaziuns a giasts e che reglan consequentamain la finanziaziun restanta tras las vischnancas da dimora.

3. Na, per far in squitsch correspundent n'ha il chantun nagina basa legala.
L'enquista tar ils servetschs communals da spitex ha mussà ch'igl è avant maun ina fitg gronda prontezza ed in buna pratica concernent la furniziun da prestaziuns a giasts. Perquai che mo paucas dumondas han stuì vegnir refusadas, na vesa la regenza nagins motivs per adattar las prescripziuns legalas.

17 da favrer 2016