Navigaziun principala

Cuntegn da la pagina

Incumbensa Niederer concernent ina solidarisaziun pertutgant ils custs da l'agid social per las fugitivas ed ils fugitivs renconuschids

Sessiun: 09.12.2015

En ina communicaziun a las medias dal departament da giustia, segirezza e sanadad (DGSS) dals 2 da december 2015 pon ins leger il suandant: "Il dumber da requirentas e requirents d'asil ch'èn vegnids attribuids ils ultims mais als chantuns ed uschia er al Grischun è creschì massivamain e resta sin in nivel constantamain aut. (...) Quest onn èn vegnids attribuids al chantun fin la fin d'october 814 novas requirentas e novs requirents d'asil. Talmain bleras fugitivas e fugitivs n'hai betg pli dà en il Grischun dapi il cumenzament dal conflict dal Cosovo a la fin dals onns 90. Er l'onn proxim sto il Grischun far quint ch'il dumber da requirentas e requirents d'asil attribuids al chantun saja almain tuttina aut."

 

Quest fatg signifitga che pli e pli requirentas e requirents d'asil vegnan attribuids ad alloschis collectivs en vischnancas da noss chantun. Questas requirentas e requirents d'asil vegnan assistids da l'uffizi da migraziun e da dretg civil dal Grischun (UMDC). En questa fasa surpiglia il chantun er ils custs da collocament e d'assistenza.

 

Fugitivas e fugitivs renconuschids (document da legitimaziun B) percunter pertutgan il champ da cumpetenza da las vischnancas, q.v.d. las vischnancas ston surpigliar ils eventuals custs da l'agid social. Perquai che tenor ina infurmaziun dals 25 da november 2015 davart il tema fugitivs e fugitivs minorens betg accumpagnads, a las represchentanzas communalas dal cussegl grond, mo circa 10-15 % dals fugitivs renconuschids pon surpigliar sezs lur custs da viver, vegn la gronda part dad els a stuair viver da l'agid social. Dal mument ch'els vegnan renconuschids pon ils fugitivs cumenzar a tschertgar individualmain abitaziuns en las vischnancas. Ussa sa mussi che quests umans vegnan a chattar mo fitg difficilmain in'abitaziun e vegnan pia a restar vinavant al lieu usità u en ils centers da transit communals. Uschia resta però er cumpetenta per l'agid social quella vischnanca, sin il territori da la quala sa chatta il center da transit. Pia sa concentrescha ina grevezza surproproziunala sin intginas vischnancas che han in center da transit, entant che bleras autras vischnancas èn libras da tala. Questa grevezza massiva sto vegnir purtada solidaricamain, tant pli che las vischnancas che han in center da transit n'han betg sezzas chaschunà questas chargias e tant pli che la gulivaziun da las grevezzas n'è insumma betg suffizienta.

 

Sin fundament da las explicaziuns qua survart incumbenseschan las sutsegnadras ed ils sutsegnaders la regenza da suttametter al cussegl grond entaifer in onn la basa legala necessaria per obtegnair ina solidarisaziun pertutgant ils custs da l'agid social da las vischnancas che han centers da transit.

 

Cuira, ils 9 da december 2015

 

Niederer, Hitz-Rusch, Dudli, Albertin, Baselgia-Brunner, Berther (Mustér), Blumenthal, Bucher-Brini, Caduff, Cahenzli-Philipp, Caluori, Casanova (Glion), Cavegn, Caviezel (Cuira), Caviezel (Tavau Clavadel), Crameri, Danuser, Darms-Landolt, Davaz, Della Vedova, Deplazes, Dosch, Epp, Fasani, Florin-Caluori, Foffa, Gartmann-Albin, Geisseler, Hardegger, Heiz, Hug, Jaag, Jenny, Joos, Kappeler, Koch (Igis), Komminoth-Elmer, Kunfermann, Mani-Heldstab, Märchy-Caduff, Marti, Mathis, Nay, Noi-Togni, Papa, Paterlini, Pedrini, Perl, Pfenninger, Pult, Sax, Schneider, Tenchio, Thomann-Frank, Thöny, Tomaschett (Breil), Valär, Vetsch (Claustra Vitg), von Ballmoos, Waidacher, Weber, Widmer-Spreiter, Wieland, Andri, Berther (Segnas), Degiacomi, Natter, Spreiter, Tuor

Resposta da la regenza

Requirents d'asil, als quals vegn dà asil u ils quals vegnan renconuschids sco fugitivs, tutgan a la cumpetenza da las vischnancas, las qualas ston er surpigliar ils custs da l'agid social. Quai vala er per persunas che vegnan admessas provisoricamain, che n'han betg il status da fugitiv e che sa trategnan pli ditg che 7 onns en Svizra. A partir dal mument da l'inoltraziun da la dumonda d'asil survegnan las vischnancas ina pauschala globala da la confederaziun durant maximalmain 5 onns per fugitivs renconuschids e durant maximalmain 7 onns per fugitivs admess provisoricamain. Uschia resguarda la confederaziun il fatg, ch'ina gronda part dals fugitivs n'è betg en il cas – almain durant l'emprim temp – da surpigliar sezs ils custs da viver.

A partir da l'onn 2016 importa la pauschala per fugitiv da la confederaziun a favur dal chantun Grischun 1473.59 francs per persuna e per mais. L'onn 2016 tegna il chantun enavos 272.– francs da quai per cuvrir ils custs per l'assistenza e per la collocaziun da fugitivs minorens betg accumpagnads (FMBA). Gia a partir da l'onn 2017 duain quests custs chaschunads dals FMBA vegnir repartids solidaricamain per abitanta ed abitant sin tut las vischnancas. La revisiun parziala da la lescha chantunala da sustegn ch'è necessaria per quest intent, è en lavur. A partir da l'onn 2017 vegn essenzialmain transferida a las vischnancas l'entira pauschala per fugitiv da la confederaziun. Tenor las calculaziuns dal secretariat da stadi per migraziun (SEM) correspunda questa pauschala als custs mesauns per ils fugitivs che basegnan sustegn. Tenor l'art. 25 da l'ordinaziun d'asil 2 da la confederaziun (CS 142.312) vegnan indemnisads cun la pauschala per fugitiv tut ils custs bunifitgabels dals chantuns a favur da l'agid social en cas da soluziuns favuraivlas. Ma i n'è betg enconuschent, sche ed eventualmain en tge dimensiun ch'ils custs da l'agid social da las vischnancas grischunas surpassan la pauschala federala.

Uschespert che requirents d'asil vegnan renconuschids sco fugitivs u sco persunas admessas provisoricamain, pon els tschertgar independentamain in'abitaziun. Per incumbensa dal chantun survegnan els qua l'agid da la Caritas dal Grischun. Ad els statti liber d'eleger lur vischnanca da domicil. Effectivamain vulessan blers fugitivs abitar en emprima lingia en l'aglomeraziun d'ina citad. Quest giavisch na po dentant en blers cas betg vegnir realisà. La constataziun en l'incumbensa Niederer, tenor la quala las persunas cun dretg da dimora permanenta en Svizra tschertgian principalmain in'abitaziun en la vischnanca da staziunament dal center da transit, na sa lascha betg confermar. Pli impurtanta ch'il lieu enconuschent è la disponibladad d'ina abitaziun pajabla ed adattada. Correspundentamain n'èsi betg correct che las vischnancas da staziunament dals centers da transit sajan engrevgiadas sproporziunadamain en consequenza dals centers manads dal chantun, sco ch'i vegn preschentà en l'incumbensa.

Ils 15 da december 2015 ha la regenza concludì in'ulteriura mesira per distgargiar administrativamain e finanzialmain las vischnancas da staziunament dals centers da transit. Dapi il 1. da schaner 2016 finanziescha il chantun quels fugitivs che n'han anc betg chattà in'atgna abitaziun e ch'èn pia anc collocads en ils centers da transit. Quai è vegnì communitgà a las vischnancas cun la brev da l'uffizi dal servetsch social chantunal dals 16 da december 2015.

Plinavant stoi vegnir observà che las vischnancas da staziunament dals centers collectivs profitan a partir da l'onn 2016 da la nova gulivaziun da las resursas (GRes). Quels requirents d'asil che sa trategnan dapi passa 12 mais en Svizra, fan part da la populaziun permanenta. Integrond questas persunas, s'augmenta il dumber da la populaziun ch'è decisiv per la GRes e diminuescha la fermezza da las resursas per abitanta u abitant da las vischnancas da staziunament. Da quai resultan contribuziuns da GRes pli autas.

I sto vegnir supponì che tras la domiciliaziun da fugitivs vegnian intginas vischnancas engrevgiadas cun custs d'agid pli auts che autras vischnancas pervia da questa gruppa da persunas. Pertutgadas da quai èn principalmain vischnancas cun ina quota d'agid social gia relativamain auta. Questas vischnancas vegnan sustegnidas correspundentamain dal chantun tras la nova gulivaziun da las grevezzas socialas (GGS). Contribuziuns da la GGS vegnan pajadas, uschespert ch'ils custs nets per prestaziuns da sustegn surpassan 3 pertschient da las entradas ch'èn decisivas per calcular la GRes. Questas contribuziuns s'augmentan sproporziunadamain, sch'ils custs nets s'augmentan. Ellas importan 100 pertschient per quels custs che surpassan 9 pertschient da las entradas. Sa basond sin las calculaziuns approximativas importa la contribuziun da GGS mesauna a quellas vischnancas cun fugitivs che basegnan sustegn passa 50 pertschient dals custs da l'agid social, nun ch'ella vegnia cuvrida tras la pauschala federala per questa gruppa da persunas. La GGS garantescha pia – cumplementarmain a la pauschala federala – er per questa gruppa da persunas che nagina vischnanca vegnia engrevgiada sproporziunadamain pervia dals custs da l'agid social.

En il rapport davart il program da la regenza e davart il plan da finanzas per ils onns 2017–2020 ha la regenza formulà ina intenziun strategica cun il suandant text:
"Rinforzar la solidaritad tranter las vischnancas grischunas cun egualisar ils custs per la collocaziun, per l'assistenza e per l'integraziun da fugitivs tranter las vischnancas da dimora e las autras vischnancas." (Missiva carnet nr. 12/2015–2016, Champ d'acziun 6, p. 839 e punct central da svilup 12/24 Spazi d'abitar per requirents d'asil e per fugitivs, p. 848). En il rom da la realisaziun dal punct central da svilup 12/24 e cun integrar las vischnancas è la regenza pronta d'examinar, co ch'ils custs da l'agid social per fugitivs renconuschids ed admess provisoricamain pon vegnir "solidarisads" pli fitg e vegnir repartids sin tut las vischnancas. En il senn da questas explicaziuns è la regenza pronta d'acceptar l'incumbensa.

3 da mars 2016