Navigation

Inhaltsbereich

Sessiun: 09.12.2015

Dapi l'onn da scola 2013/14 è en vigur la nova lescha da scola. En quella vegn reglada da nov l'integraziun da scolaras e scolars che han in basegn spezial da promoziun. La realisaziun da quai munta ina sfida per las scolas publicas.

 

En partiziuns d'ina classa, er numnadas classas d'annada, èn las scolaras ed ils scolars che han in basegn spezial da promoziun e che ston vegnir integrads savens quellas e quels che profitan d'in tractament spezial. Vers anora fan classas d'annada l'impressiun ch'ellas hajan – pervia da la vegliadetgna – ina cumposiziun omogena e che tut las scolaras ed ils scolars da la medema vegliadetgna duajan sche pussaivel savair tut tuttina bain en il medem mument.

 

Auter è quai en partiziuns da pliras classas. Quellas porschan bunas premissas per mussar che mintga individi che sesa en ina partiziun e different da l'auter. E quai betg mo en quai che concerna ils interess, las abilitads u las enconuschientschas, mabain er en quai che concerna la vegliadetgna. Normal è ch'ins è auter. En ils conturns da scola discurran ins er da l'emprender en gruppas cun uffants da differentas vegliadetgnas (EGDV). Il EGDV pudess esser ina via pussaivla per las sfidas da las scolas popularas che resultan tras l'integraziun.

 

En quest connex supplitgan las sutsegnadras ed ils sutsegnaders la regenza da respunder las suandantas dumondas:

 

1. Quantas partiziuns d'ina, da duas, da trais e da dapli classas datti en il Grischun?

 

2. Hai dà ina tendenza vers dapli partiziuns da duas u da trais classas en ils onns passads?

 

3. Co giuditgescha la regenza l'emprender en gruppas cun uffants da differentas vegliadetgnas (EGDV) sco model d'organisaziun per che l'integraziun gartegia?

 

4. Èsi pussaivel tenor la lescha da scola d'introducir il EGDV?

 

5. È il EGDV ina part integrala da la scolaziun a la scola auta da pedagogia dal Grischun?

 

Cuira, ils 9 da december 2015

 

Thöny, Märchy-Caduff, Atanes, Blumenthal, Buchli-Mannhart, Caduff, Cahenzli-Philipp, Caluori, Casutt-Derungs, Caviezel (Cuira), Darms-Landolt, Della Vedova, Deplazes, Fasani, Gartmann-Albin, Jaag, Locher Benguerel, Monigatti, Niggli-Mathis (Grüsch), Noi-Togni, Papa, Pedrini, Perl, Peyer, Pult, Andri, Degiacomi

Resposta da la regenza

La dumonda qua avant maun concerna dumondas pertutgant l'integraziun da scolaras e scolars che han in basegn spezial da promoziun e las furmas organisatoricas che vegnan applitgadas persuenter sco classas d'annada, partiziuns da pliras classas u emprender en gruppas cun uffants da differentas vegliadetgnas (EGDV).

Sa basond sin la lescha davart las scolas popularas dal chantun Grischun dals 21 da mars 2012 (lescha da scola; DG 421.000) han scolaras e scolars che han in basegn spezial da promoziun il dretg da survegnir mesiras da la pedagogia speziala. Quest dretg sto vegnir realisà tenor l'art. 46 da la lescha da scola, e quai en moda orientada als basegns ed en furmas da scolaziun e da promoziun integrativas u separativas. Sche la scolaziun e la promoziun da questas scolaras e da quests scolars ha lieu cun avantatg en la classa regulara ed è supportabla per la classa, vegn ella realisada en moda integrativa, cas cuntrari en moda parzialmain integrativa sco instrucziun en gruppa u individuala ubain en moda separativa en partiziuns d'instituziuns da la scolaziun speziala u en famiglias. Ni la lescha da scola ni l'ordinaziun tar la lescha da scola dals 25 da settember 2012 (ordinaziun da scola; DG 421.010) fan ulteriuras indicaziuns davart la moda da realisar las mesiras da la pedagogia speziala.

Pertutgant la noziun EGDV ha la regenza prendì posiziun gia en la resposta a la "incumbensa Claus concernent l'emprender en gruppas maschadadas areguard la vegliadetgna en la scola populara dal Grischun" (conclus da la regenza nr. 186 dals 9 da mars 2010) ed ha renvià al fatg che las definiziuns e descripziuns da la noziun EGDV èn fitg irregularas en il sectur da furmaziun en Svizra e tanschan da tschertas unitads d'emprender che pertutgan pliras classas en scolas da pliras classas sur l'emprender en gruppa cun uffants da differentas classas, q.v.d. en classas cumbinadas, fin ad ina dissoluziun cumpletta da las classas d'annada.

Dumonda 1: Al stgalim primar datti en il Grischun actualmain 414 partiziuns d'ina classa, 175 partiziuns da duas classas, 55 partiziuns da trais classas e 7 partiziuns da pliras classas.

Dumonda 2: Na. Nagina tendenza è vesaivla. La furmaziun da partiziuns da duas u da trais classas dependa fin ussa en emprima lingia da motivs da la planisaziun da la scola (p.ex. fusiuns) u da motivs demografics (p.ex. dumbers diminuints da scolaras e da scolars).

Dumonda 3: Per che l'integraziun reusseschia n'è tenor l'avis da la regenza betg uschè decisiva la furma organisatorica che plitost la tenuta ch'è colliada cun quai. Experientschas d'auters chantuns mussan ch'ina midada da structuras vertentas d'ina classa en structuras da pliras classas po esser cumbinada cun avantatgs pedagogics sensibels. Natiralmain ston las structuras esser favuraivlas a l'integraziun. Sco che la pratica mussa, èsi pussaivel che l'integraziun gartegia tant en classas d'annada sco er en partiziuns da pliras classas. Decisiva è qua la differenziaziun. Perquai ch'er en classas d'annada èn las prestaziuns fitg differentas, ha la differenziaziun er là in'auta valur. Tant en partiziuns d'ina classa sco er en partiziuns da pliras classas èsi ultra da quai pussaivel da prender resguard commensuradamain dals muments da svilup accelerads sco er retardads da las scolaras e dals scolars.

Dumonda 4: Tenor l'art. 23 da la lescha da scola è structurada la scola populara grischuna tenor stgalims da scola e tenor classas d'annada. Mintga uffant è attribuì sin il stgalim primar e sin il stgalim secundar I ad ina tscherta classa. Davart la furma organisatorica concreta (classa d'annada, classa cumbinada u partiziun da pliras classas) decida l'instituziun responsabla per la scola. Ina promoziun individuala na chaschuna betg la dissoluziun da la classa d'annada, sco ch'ella è previsa tar tschertas furmas dal EGDV. La dissoluziun cumpletta dal princip da classa n'è er betg pussaivla, perquai che l'organisaziun da la scola (p.ex. plans d'instrucziun, meds d'instrucziun, attestat) sa basa sin quest princip. L'avertura da las structuras da classa fixas en sequenzas spezialas da l'instrucziun, en tschertas fasas da l'emprender ed en connexs tematics specifics è percunter admessa er tar nus, sut tschertas constellaziuns è ella schizunt raschunaivla. La decisiun respectiva è primarmain chaussa da las persunas d'instrucziun.

Dumonda 5: La tematica dal ir enturn cun l'eterogenitad ha ina gronda paisa en l'instrucziun da la scola auta da pedagogia dal Grischun. En differents moduls vegnan las studentas ed ils students preparads per las cundiziuns en las scolas cun partiziuns da pliras classas. Il EGDV vegn tematisà sco ina "metoda" pussaivla resp. sco ina furma da realisaziun da l'emprender en gruppas eterogenas. Durant lur scolaziun han las studentas ed ils students ultra da quai adina puspè singuls contacts cun partiziuns da pliras classas e cun il EGDV.

24 da favrer 2016