Navigaziun principala

Cuntegn da la pagina

Incumbensa Bondolfi concernent viandar = Grischun

sessiun: 17.02.2016

Il TURISSEM è il sectur economic il pli impurtant per il chantun Grischun. Dapi onns patescha il turissem en il Grischun. Las pernottaziuns sa reduceschan d'in cuntin e las perspectivas èn uschè nauschas sco strusch insacura. «L'onn 2008 avevan nus 6,3 milliuns pernottaziuns, ussa main che 5 milliuns, e la tendenza mussa vers engiu», ha constatà dacurt il president da Grischun vacanzas en ina intervista d'ina gasetta.

 

Ins ha l'impressiun che l'uffizi cumpetent e Grischun vacanzas – pigliads da l'atgna maxima d'acziun «dapli dal medem» – na fetschian betg pauca lavur per declerar la situaziun nuncuntentaivla. Er il departament e la regenza surpiglian mo ina tenuta d'observaziun (cf. resposta a la dumonda Salis dal schaner 2016). Dumandadas èn dentant ideas cunvegnentas che gidan a sortir da la spirala negativa.

 

Natiralmain che las aspectativas dals giasts èn daventadas pli multifaras, uschia ch'igl è pli difficil da sviluppar purschidas da vacanzas che tutgan il gust d'ina gruppa en mira relevanta e che giustifitgeschan damai expensas pli grondas per far reclama. Evident è dentant ch'in sectur, che ha in potenzial enorm, è vegnì e vegn negligì en noss chantun. Uschia han retschertgas scientificas mussà ch'il viandar è per bunamain la mesadad da las Svizras e dals Svizzers l'activitad preferida durant il temp liber. En Germania, noss pajais vischin ch'è uschè impurtant per noss turissem, èn schizunt passa 50% viandants activs. Per ina gruppa da glieud che daventa pli e pli gronda è il viandar l'expressiun d'ina attenziun creschenta per ina vita duraivla. Lur destinaziun èn ina natira intacta sco er bellas cuntradas autenticas. Gist quai pudain nus porscher a noss giasts. Il chantun Grischun è l'eldorado da viandar per excellence. Viandar è la situaziun da basa e da partenza per ulteriuras activitads turisticas che resultan directamain dal viandar. Viandants cuntents turnan per ir cun skis, per far passlung, per dar tennis, per ir cun velo e.u.v. Quai generescha ina valur agiuntada per l'entir chantun, la stad e l'enviern.

 

Cun ina campagna da reclama che ha cleras intenziuns ed ina basa duraivla sto il Grischun sa posiziunar sin plaun naziunal ed internaziunal sco paradis da viandar. Per quest intent ston vegnir messas a disposiziun las finanzas necessarias. Persunas spezialisadas partan dal fatg ch'i dovria plirs milliuns francs per onn. La finamira è quella d'associar il viandar sco in reflex cun il chantun Grischun.

 

Per betg puspè crudar en musters vegls, sto vegnir surdada ad ina gruppa da lavur, ch'è da nominar aposta per quest intent, l'incumbensa d'elavurar in concept correspundent e d'accumpagnar e survegliar las mesiras resultantas. Questa gruppa da lavur sto perquai vegnir constituida ordaifer ed independentamain da l'uffizi per economia e turissem e da Grischun vacanzas.

 

A norma da las explicaziuns qua survart vegn la regenza incumbensada da stgaffir las basas e da surdar las incaricas correspundentas, per ch'il posiziunament dal Grischun sco paradis da viandar vegnia prendì per mauns immediatamain.

 

Cuira, ils 17 da favrer 2016

 

Bondolfi, Casanova (Glion), Albertin, Alig, Atanes, Baselgia-Brunner, Bleiker, Blumenthal, Bucher-Brini, Cahenzli-Philipp (Vaz sut), Caluori, Casutt-Derungs, Cavegn, Caviezel (Cuira), Crameri, Danuser, Darms-Landolt, Della Vedova, Deplazes, Dosch, Epp, Florin-Caluori, Foffa, Gartmann-Albin, Giacomelli, Heiz, Jaag, Jenny, Joos, Kappeler, Kollegger, Kunfermann, Lamprecht, Locher Benguerel, Märchy-Caduff, Marti, Michael (Castasegna), Monigatti, Nay, Niederer, Noi-Togni, Papa, Paterlini, Pedrini, Perl, Peyer, Pfenninger, Pult, Rosa, Salis, Sax, Schneider, Schutz, Stiffler (Tavau Plaz), Stiffler (Cuira), Tenchio, Tomaschett-Berther (Trun), Vetsch (Pragg-Jenaz), Weidmann, Widmer-Spreiter, Wieland, Zanetti, Cahenzli (Trin Mulin), Lombardi, Pfister, Stäbler, Tuor

Resposta da la regenza

Il Grischun è gia oz posiziunà bain areguard il viandar. Il viandar quinta bain sco in dals motivs ils pli impurtants dals giasts per far in viadi e per visitar il Grischun. Cun var 11 000 kilometers vias e sendas dispona il Grischun d'ina fitg gronda rait da sendas da viandar ch'è signalisada excellentamain e mantegnida bain; tenor la lescha davart las vias èn las vischnancas responsablas per la construcziun ed il mantegniment da quella. Ina da las incumbensas centralas da mintga organisaziun per la gestiun da destinaziuns e da singuls offerents è quella da far reclama per la purschida da viandar.

Dapi l'onn 2007 metta il chantun a disposiziun ina contribuziun finanziala essenziala per la campagna da communicaziun «Gian & Giachen». Il maun public gida uschia ensemen cun partenaris turistics e betg turistics ad augmentar la dumonda per purschidas, per servetschs e per products dal Grischun. La purschida communitgada cumpigliava gia fin ussa e cumpiglia er actualmain il tema viandar, sco quai che las mesiras da Grischun vacanzas (GRV) per la stad 2016 mussan.

GRV fa reclama per differentas purschidas e per turas da viandar per divers segments da giasts (turas lungas e trekking, turas panoramicas, turas tematicas, turas per famiglias, turas culinaricas e turas da giudiment, turas alpinas, en parcs natirals, sin chamonas CAS e.u.v.). Sin la pagina d'internet www.graubuenden.ch sa chattan infurmaziuns detagliadas en chaussa. Ultra da quai è er vegnida sviluppada in'applicaziun mobila per viandar (cuntegn: dumber creschent da turas sin chartas topograficas a la scala 1:25 000, er pussaivel en il modus offline; planisader da turas che tschertga automaticamain rutas e.u.v.). Plinavant è il chantun gia dapi l'existenza da SvizraMobila, la rait svizra per il traffic betg motorisà, partenari activ e s'engascha per sviluppar vinavant ils differents geners dal traffic betg motorisà (viandar, ir cun velo da muntogna e.u.v.). Sin www.schweizmobil.ch vegni actualmain fatg reclama per 66 rutas da viandar en il Grischun che vegnan colliadas cun ulteriurs servetschs dal turissem. Las mesiras da marketing vegnan sustegnidas dal chantun en il rom da l'incarica da prestaziun cun Grischun vacanzas.

Il chantun sustegna las vischnancas areguard la signalisaziun e la garanzia da qualitad tras l'uffizi da construcziun bassa sco post spezialisà per il traffic betg motorisà cun contribuziuns a favur da l'engrondiment da las vias (a partir dal 1. da schaner 2016) e dals custs da signalisaziun sco er tras cunvegnas da prestaziun cun SvizraMobila e cun la cuminanza grischuna per sendas CGS che surpiglian differentas incumbensas en quest sectur sco la controlla surordinada dal stadi da la rait da vias e da rutas sco er l'actualisaziun dals differents inventaris.

Ils onns 2010 fin 2015 ha il chantun realisà cun success il project grischunBIKE. Il project è vegnì finanzià er da la fundaziun grischuna per innovaziun, svilup e perscrutaziun sco er cun meds finanzials da la nova politica regiunala da la confederaziun (NPR). Betg sco ultim grazia a quest project grischunBIKE ch'è vegnì realisà ils onns 2010 fin 2015 è il Grischun oz sin l'emprima plazza da la Svizra en quai che reguarda il segment da velos da muntogna che ha ina valurisaziun intensiva.

Per augmentar la cumpetitivitad dal chantun Grischun e pia la valurisaziun ha la regenza lantschà l'onn 2015 in project da plirs onns cun il num grischunHIKE che cumpiglia differents elements dal turissem da viandar e che integrescha tut ils partenaris relevants, analogamain a grischunBIKE. La finamira è quella da meglierar las cundiziuns generalas per il turissem da viandar en ils secturs rait da vias ed infrastructura, transport, alloschament ed ustarias, guidas, purschida e servetschs, cultura da viandar locala, events sco er organisaziun e colliaziun en ina rait. En quest connex vegn er resguardà il basegn dals giasts midà. Las singulas mesiras vegnan ultra da quai elavuradas e realisadas en stretga collavuraziun cun ils furniturs da prestaziuns turisticas. Il volumen dal project importa 3,2 milliuns francs, da quels vegnan 0,6 milliuns francs finanziads dal chantun e 0,4 milliuns francs da la confederaziun (NPR). Il project grischunHIKE vegn plinavant sustegnì en dumondas strategicas d'ina vasta gruppa accumpagnanta d'organisaziuns spezialisadas naziunalas e chantunalas (p.ex. Club alpin svizzer CAS, SvizraMobila, Sendas svizras, cuminanza grischuna per sendas CGS e.u.v.). Cun quest sustegn e cun la responsabladad da las destinaziuns e dals furniturs da prestaziuns da realisar il project para l'integraziun da cumpetenzas externas da bastar tenor l'avis da la regenza. Ella desista da furmar ina gruppa da lavur supplementara.

La basa per sviluppar vinavant sistematicamain il turissem da viandar è pia suffizienta. In'ulteriura "campagna da reclama che ha cleras intenziuns ed ina basa duraivla" per posiziunar il Grischun sco paradis da viandar en la dimensiun da plirs milliuns francs per onn, finanziads or da meds finanzials dal maun public, giuditgescha la regenza sco betg cunvegnenta ed er sco betg realistica en vista a las resursas finanzialas limitadas. La regenza desista da surdar l'incumbensa ad ina gruppa da lavur externa. Ella vul cuntinuar cun il project grischunHIKE ch'ella ha tschernì e garantir a medem temp la qualitad da la purschida. Igl è chaussa da las organisaziuns turisticas (incl. GRV) e d'ulteriurs furniturs da prestaziuns turisticas d'integrar il tema viandar en lur portfolio e da render enconuschent quel.

La regenza vegn a la conclusiun che las pretensiuns las pli impurtantas ch'èn formuladas en l'incumbensa èn gia en realisaziun. Quest process da realisaziun vegn cuntinuà. En quest senn propona la regenza al cussegl grond d'acceptar l'incumbensa.

4 da matg 2016