Navigation

Inhaltsbereich

Sessiun: 17.02.2016

Acquisiziuns publicas muntan in potenzial impurtant pertutgant lur valurisaziun per il chantun, per las vischnancas e per las regiuns ed èn d'ina impurtanza betg nunimpurtanta per il mastergn indigen. En la debatta davart il rapport "Svilup economic en il chantun Grischun" (missiva carnet 5/2014–2015) ha il cussegl grond deliberà il december 2014 ina direcziun concernent la concurrenza (chapitel VII. 13.4.). Quella prevesa ch'il chantun e las vischnancas duain exaurir, cur ch'ellas publitgeschan incumbensas publicas, il spazi d'agir che vala per la surdada directa sco er per la procedura d'invit. Uschia duai er la gronda part da las acquisiziuns restar sche pussaivel en il chantun, e quai resguardond las cundiziuns generalas giuridicas.

 

En il sectur betg cumpiglià da contracts internaziunals èn suttamessas da princip tut las acquisiziuns al dretg da submissiun, p.ex.:
• incaricas da furniziun davart l'acquisiziun da bains movibels, particularmain tras cumpra, leasing, locaziun, fittanza u tras cumpra a tschains;
• incaricas da prestaziuns da servetsch;
• incaricas da construcziun davart l'execuziun da lavurs da construcziun auta e bassa;

 

Per il 1. da schaner 2014 èn las limitas minimalas vegnidas adattadas en il sectur dal martgà intern ed augmentadas a las valurs maximalas che valan per la cunvegna interchantunala davart las acquisiziuns publicas CIAP. Ord vista dal cussegl grond pertutgant ina promoziun da l'economia sistematica stuessan las cundiziuns generalas en il chantun Grischun vegnir definidas uschia ch'ils interess economics dal mastergn indigen pudessan vegnir resguardads optimalmain. Uschia duessi vegnir pussibilità ch'i resultian dapli acquisiziuns per il mastergn indigen en la surdada directa sco er en la procedura d'invit.

 

La realitad mussa oz displaschaivlamain in maletg dal tuttafatg auter. Tar in grond dumber d'acquisiziuns na vegni betg tegni quint da quest princip. Tar incumbensas publicas vegn savens gia applitgada da vart da las vischnancas, ma er dal chantun la procedura averta a partir da valurs d'acquisiziun che sa chattan lunsch sut las valurs minimalas admessas tenor l'art. 14 al. 1 Lsub. Ultra da la blera lavur per far ils documents da publicaziun per questa procedura chaschuna er l'evaluaziun resp. la surdada da questas incumbensas supplementarmain blera lavur administrativa nunnecessaria.

 

Per las sutsegnadras ed ils sutsegnaders sa tschentan en quest connex pia las suandantas dumondas:

 

1. È la regenza pronta ed intenziunada d'explotar cumplainamain il spazi d'agir entaifer las directivas legalas permessas a favur d'ina promoziun sistematica da l'economia per il mastergn indigen? Sche gea, tge è gia vegnì fatg, u co vul la regenza proceder en questa fatschenta?

 

2. Èn las administraziuns chantunalas gia vegnidas instruidas en chaussa er da proceder en quest senn tar novas acquisiziuns?

 

3. Existan oz eventualmain anc directivas internas antiquadas che stuessan vegnir adattadas oz da nov en il senn da la direcziun "Concurrenza" deliberada dal cussegl grond?

 

4. Vesa la regenza ina pussaivladad d'obligar er las vischnancas d'applitgar medemamain e directamain quest princip en in rom sumegliant?

 

Cuira, ils 17 da favrer 2016

 

Felix (Scuol), Kappeler, Casty, Alig, Blumenthal, Brandenburger, Burkhardt, Caduff, Caluori, Casanova (Glion), Casanova-Maron (Domat), Casutt-Derungs, Caviezel (Tavau Clavadel), Danuser, Dosch, Engler, Epp, Felix (Haldenstein), Florin-Caluori, Foffa, Giacomelli, Gunzinger, Hartmann, Hitz-Rusch, Holzinger-Loretz, Jeker, Jenny, Kasper, Lamprecht, Mani-Heldstab, Märchy-Caduff, Marti, Müller, Nay, Niederer, Rosa, Salis, Steck-Rauch, Steiger, Tomaschett (Breil), Toutsch, Troncana-Sauer, Valär, Vetsch (Pragg-Jenaz), Waidacher, Weber, Weidmann, Wieland, Buchli, Föhn, Stäbler, Tuor

Resposta da la regenza

Las acquisiziuns dal maun public han ina gronda impurtanza per l'economia publica. Actualmain vegn la summa totala dal volumen da las acquisiziuns publicas (incumbensas da construcziun, da furniziun e da servetsch) stimada a circa 40 milliardas francs en Svizra. Quai correspunda a circa 25 pertschient da las expensas dal stadi ed ad 8 pertschient dal product naziunal brut. Pervia da sia topografia pretensiusa sco er pervia da las interpresas secturialas ch'èn er suttamessas al dretg da surdada (Viafier retica, societads d'ovras electricas) dastgassan questas valurs procentualas esser anc pli autas en il Grischun.

Tenor las statisticas da surdada da blers onns han pudì vegnir resguardads purschiders indigens tar lunschor la pli gronda part da las acquisiziuns tras ils incumbensaders publics. En quest connex gioga la protecziun natirala che resulta da la distanza gia dapi adina ina rolla centrala pervia da la situaziun perifera dal chantun. Correspundentamain han ils posts d'acquisiziun lunschor ils pli impurtants dal chantun (uffizi da construcziun bassa, uffizi da construcziun auta), che han in volumen d'acquisiziun da ca. 260 milliuns francs, pudì surdar l'onn 2015 – sco ils onns precedents – ca. 90 pertschient da tut las incumbensas a purschiders grischuns. Las valurs minimalas ch'èn vegnidas augmentadas per il 1. da schaner 2014 han en quest connex pudì vegnir exauridas da princip. In'excepziun pertutga la publicaziun da prestaziuns da construcziun che surpassan ina valur d'acquisiziun da 50 000 francs, sco ch'ella vegn pratitgada da l'uffizi da construcziun bassa dapi onns. Malgrà la publicaziun da questas prestaziuns da construcziun ch'èn standardisadas per gronda part han l'onn 2015 pudì vegnir surdadas schizunt 97 pertschient da tut las incumbensas a purschiders indigens. Pervia da las relaziuns spezialas en la construcziun da las vias dal chantun sco er sut l'aspect da las investigaziuns currentas tras la cumissiun da concurrenza (CUMCO) duai questa pratica vegnir mantègnida. Tenor la regenza gida questa pratica da publicaziun differenziada ad impunder cun quità ils meds finanzials publics e tegna il medem mument adequatamain quint dals interess da l'economia regiunala.

Tar la dumonda 1: Il chantun profita en general en moda raschunaivla da la libertad d'agir ch'el ha tenor lescha per fixar il tip da procedura. Las lavurs a l'intern da l'administraziun per tschertgar eventualmain ulteriuras libertads d'agir dal dretg da surdada en il senn da l'incumbensa Felix (Haldenstein) concernent l'impurtanza da las acquisiziuns publicas per l'economia publica han stuì vegnir sistidas ad interim pervia da las investigaziuns da la CUMCO ch'èn vegnidas extendidas sin tut il chantun sco er pervia da la revisiun actuala dal dretg da surdada svizzer.

Tar la dumonda 2: Ils uffizis chantunals èn vegnids infurmads da la regenza davart las valurs minimalas pli autas che valan dapi l'onn 2014. Ma gia avant han ils posts d'acquisiziun chantunals resguardà las valurs minimalas fixadas en la lescha per definir il tip da procedura. L'experientscha mussa che quai è er pli u main uschia en las vischnancas.

Tar la dumonda 3: A l'intern dal chantun na datti naginas directivas antiquadas. Tenor il manual per acquisiziuns publicas en il chantun Grischun, che serva als posts d'acquisiziun sco agid pratic e che ha l'intent da cuntanscher ch'il dretg da surdada vegnia applitgà dapertut en ina moda uschè eguala sco pussaivel, duain las libertads d'agir concedidas da la lescha vegnir duvradas uschè bain sco pussaivel per tscherner la procedura. Sch'il post dal chantun ch'è spezialisà per submissiuns vegn dumandà da dar in cussegl, recumonda el regularmain a l'incumbensader d'exaurir la valur minimala.

Tar la dumonda 4: Er las vischnancas enconuschan las pussaivladads da profitar cumplainamain da las libertads d'agir cun tscherner la procedura. Pervia da l'urden da cumpetenzas vertent na po la regenza dentant betg scumandar ad ellas da tscherner eventualmain proceduras cun valurs minimalas pli autas per promover la concurrenza.

 20 d’avrigl 2016