Navigation

Inhaltsbereich

Dumonda Caluori concernent la finanziaziun da la scolaziun en in ospital

Sessiun: 20.04.2016

En connex cun la revisiun totala da la lescha da scola l'onn 2012 ha il departament d'educaziun, cultura e protecziun da l'ambient (DECA) relaschà ils 9-6-2015 ina disposiziun dal departament che regla da nov a partir dal 1-1-2016 la garanzia e la surpigliada dals custs da la scolaziun e da la promoziun d'uffants da la vegliadetgna prescolara e scolara fin ch'els han cuntanschì la vegliadetgna da 20 onns, ch'èn en ospitals dal chantun Grischun sco er en ospitals ed en clinicas ordaifer il chantun.

 

Cun la finanziaziun vertenta che sa basa sin la lescha chantunala da scola resp. sin l'ordinaziun chantunala tar la lescha da scola (art. 68) sco er sin la lescha d'impedids han las vischnancas pajà ina tariffa da 21 francs per di da scola. La participaziun als custs da las persunas cun la pussanza dals geniturs importava 5 resp. 10 francs per di da dimora, il rest dals custs ha surpiglià il chantun. Da nov na vegnan – tenor la disposiziun dal DECA – uffants ospitalisads betg pli resguardads sco scolars da la scola speziala, mabain sco scolars da la scola regulara. Per la scolaziun dals uffants ospitalisads è perquai cumpetenta l'instituziun ch'è responsabla per la scola da la vischnanca respectiva. A las vischnancas vegnan uschia mess a quint ils custs cumplains per di da scola, q.v.d. ina pauschala tranter 110 e 125 francs per di.

 

La disposiziun dal departament ch'è vegnida messa en vigur il 1-1-2016 chaschuna areguard la realisaziun, en mancanza d'ina clera basa legala, differentas dumondas e malsegirezzas che ston vegnir scleridas urgentamain. Correspundentamain han l'ospital chantunal dal Grischun e la psichiatria d'uffants e da giuvenils dal Grischun drizzà il december 2015 lur brevs al DECA ed al departament da giustia, segirezza e sanadad (DGSS) che mussan la problematica actuala e la largia en l'ordinaziun u en la lescha ch'è colliada cun quai. Dapi la disposiziun dal departament dals 9-6-2015 datti ina gronda malsegirezza, spezialmain areguard la cumpetenza da dar l'incumbensa per la scolaziun sco er da tschentar quint per la scolaziun en l'ospital sco er en la staziun da giuvenils da la psichiatria.

 

En ina brev da resposta cuminaivla dal DECA e dal DGSS dals 31-3-2016 èn vegnids menziunads tranter auter ils suandants puncts:

 

Scolaras e scolars da la scola populara han il dretg da vegnir instruids. Questa instrucziun sto avair lieu a chasa, en ina clinica u en in ospital. La cumpetenza per garantir l'instrucziun (decisiun, organisaziun, finanziaziun) è chaussa da l'instituziun responsabla per la scola. En quest connex sa basa la regenza sin ils art. 11 e 69 da la lescha da scola. Quai muntass che mintga vischnanca, mintga instituziun responsabla per la scola decidess autonomamain, co e nua concret ch'in uffant duai vegnir scolà, sch'el è malsaun u ha gì in accident, e quant grond ch'il rom finanzial è per quai.

 

En connex cun il giavisch areguard il relasch d'ina ordinaziun davart la scolaziun en in ospital scriva la regenza plinavant: 

"Ina cumpetenza speziala che permettess a las scolas d'ospital da decider autonomamain davart la scolaziun da las scolaras e dals scolars da la scola regulara ch'èn ospitalisads n'è betg previsa en la lescha da scola."

 

Las sutsegnadras ed ils sutsegnaders tschentan las suandantas dumondas a la regenza:

 

1. Co giuditgescha la regenza la gronda malsegirezza en las vischnancas sco er en las scolas d'ospital areguard la cumpetenza da dar l'incumbensa sco er da tschentar quint per la scolaziun durant ina dimora en l'ospital u en ina clinica?

 

2. È er la regenza da l'opiniun ch'i sto vegnir prendida en mira ina regulaziun unitara per tut las vischnancas per garantir la scolaziun dals uffants e dals giuvenils ch'èn obligads d'ir a scola e che sa chattan en in ospital, en ina clinica u en ina staziun da la psichiatria d'uffants e da giuvenils entaifer ed ordaifer il chantun?

 

3. È la regenza pronta da stgaffir ina clera basa legala che regla l'obligaziun da surpigliar ils custs?

 

4. È la regenza pronta da stgaffir ina regulaziun transitorica sin il stgalim d'ina ordinaziun fin che la basa legala è avant maun?

 

5. È la regenza pronta d'examinar in'ordinaziun davart la scolaziun en in ospital sco ch'il chantun Turitg ha?

 

Cuira, ils 20 d'avrigl 2016

 

Caluori, Bucher-Brini, Casty, Aebli, Atanes, Baselgia-Brunner, Berther, Bleiker, Caduff, Cahenzli-Philipp, Casanova-Maron (Domat), Casutt-Derungs, Cavegn, Caviezel (Cuira), Clalüna, Crameri, Danuser, Deplazes, Dosch, Engler, Fasani, Florin-Caluori, Gartmann-Albin, Geisseler, Gunzinger, Hardegger, Heiz, Holzinger-Loretz, Kollegger, Kunfermann, Lamprecht, Mani-Heldstab, Märchy-Caduff, Niederer, Niggli (Samedan), Niggli-Mathis (Grüsch), Noi-Togni, Perl, Pfenninger, Pult, Sax, Schutz, Stiffler (Tavau Plaz), Thomann-Frank, Thöny, Tomaschett-Berther (Trun), Troncana-Sauer, Widmer-Spreiter, Wieland, Degiacomi, Derungs, Sigron, Tuor

Resposta da la regenza

Sa basond sin ils art. 11 e 69 da la lescha davart las scolas popularas dal chantun Grischun dals 21 da mars 2012 (lescha da scola; DG 421.000) han ils purtaders da scola respectivs da las vischnancas cumpetentas la responsabladad per l'instrucziun da scolaras e scolars da la scola regulara ch'èn malsauns u che han in accident. Tenor l'art. 6 da l'ordinaziun tar la lescha da scola dals 25 da settember 2012 (ordinaziun da scola; DG 421.010) po in uffant vegnir admess – en cas motivads – a la scola d'in auter purtader da scola, sche las persunas responsablas per l'educaziun dumondan quai. En quest cas decida il cussegl da scola da l'auter purtader davart l'admissiun sco er davart ils daners da scola, e quai cun il consentiment dal purtader da scola cedent. En applicaziun analoga da l'art. 6 da l'ordinaziun da scola premetta er l'instrucziun temporara en ina scola d'ospital ch'il purtader da scola cumpetent dettia ina incumbensa respectiva. La realisaziun da questas regulaziuns vegn declerada pli exactamain en la disposiziun dal departament d'educaziun, cultura e protecziun da l'ambient (DECA) nr. 2447 dals 9 da zercladur 2015.

Betg adina n'èsi pussaivel u necessari d'instruir scolaras e scolars ch'èn malsauns u che han in accident gist a partir da l'emprim di suenter l'entrada en l'ospital. Ina survista da l'uffizi per la scola populara ed il sport (USS) davart la scola da l'ospital chantunal durant ils onns 2013 fin 2015 mussa che 96 % da var 200 uffants en media per onn han frequentà la scola da l'ospital tranter 1 e 15 dis da scola (82 % dad els tranter 1 e 4 dis da scola). Mo 4 % (en media otg uffants per onn) han gì dapli che 15 dis da scola.

Malsognas sco la grippa u accidents pli pitschens pon medemamain chaschunar absenzas da normalmain fin a 5 dis u dapli en la scola regulara al lieu. Durant quest temp n'instrueschan per regla nagins purtaders da scola ils uffants pertutgads. Cuntrari n'exista er da vart da las persunas responsablas per l'educaziun strusch in'aspectativa en quest reguard. Tenor l'art. 28 da la lescha da scola pon ils purtaders da scola plinavant dar congedi a las scolaras ed als scolars durant maximalmain 15 dis da scola per onn da scola. Durant quest temp n'ha normalmain er lieu nagina instrucziun organisada e finanziada tras ils purtaders da scola. Da quai pon ins deducir ch'i n'exista per regla er en cas da dimoras a l'ospital d'ina durada da fin a 15 dis nagina necessitad d'instrucziun.

Tar la dumonda 1: Dapi il relasch da la disposiziun dal DECA nr. 2447 dals 9 da zercladur 2015 ha il USS survegnì ina dumonda en scrit e quatter dumondas per telefon da purtaders da scola davart dretgs, obligaziuns e cumpetenzas en connex cun l'instrucziun a l'ospital. D'ina gronda intschertezza na poi pia betg vegnir discurrì sin fundament da quest pitschen dumber da dumondas. Plinavant ha l'associaziun dals cussegls da scola dal Grischun infurmà – cun la brev dals 18 d'avrigl 2016 – tut ils purtaders da scola davart dumondas en connex cun l'instrucziun a l'ospital.

Tar la dumonda 2: La regenza è da l'avis che las basas giuridicas sajan cleras areguard ils dretgs, las obligaziuns e las cumpetenzas grazia a las prescripziuns da la lescha da scola e da l'ordinaziun da scola sco er al relasch da la disposiziun dal DECA nr. 2447 dals 9 da zercladur 2015. Il basegn per ina instrucziun adequata è individualmain fitg different, e l'instrucziun sto adina avair lieu resguardond il plan d'instrucziun, ils basegns da la singula scolara u dal singul scolar sco er la situaziun al lieu. Per quests motivs na dovri naginas regulaziuns pli detagliadas ord vista da la regenza. Perquai che mo paucas persunas èn pertutgadas, n'exista nagin basegn per ina regulaziun unitara.

Tar la dumonda 3: Basas giuridicas cleras per la surpigliada dals custs tras ils purtaders da scola existan gia. Ils custs dependan dentant da las prestaziuns individualas necessarias che ston vegnir furnidas per ina scolara u in scolar en cas d'ina malsogna u d'in accident. Da stgaffir basas giuridicas supplementaras resp. da reveder la lescha da scola n'è perquai betg necessari ord vista da la regenza.

Tar la dumonda 4: Per regulaziuns transitoricas sin il stgalim d'ina ordinaziun n'existan naginas basas giuridicas.

Tar la dumonda 5: Er per in'ordinaziun davart l'instrucziun a l'ospital analogamain a quella dal chantun Turitg manca ina basa giuridica.

29 da zercladur 2016