En il rom da la consultaziun davart la promoziun dal sport da la confederaziun è la regenza grischuna s'exprimida en moda dal tuttafatg positiva davart la realisaziun dal Center naziunal da sports da naiv Lai (CNSN). En quest connex ha ella er punctuà ch'il sport en general n'haja betg mo ina gronda impurtanza per il turissem e per l'economia, mabain er per ils aspects da la sanadad e dal svilup social.
"Tenor l'avis da la regenza avess in CNSN en l'entira Svizra ina gronda attracziun per ils sports da naiv. Retschertgas pli novas han mussà che l'interess dals uffants e dals giuvenils per ils sports da naiv è sa reducì ils ultims onns", uschia la regenza grischuna en sia communicaziun a las medias davart il rapport da consultaziun.
Perquai era il plaschair da la regenza grond – e bain er quel dal chantun en general – ch'il project da Lai ha fatg la cursa cunter las autras candidaturas ed è vegnì valità sco meglier project. Ma sin quai è suandada la dischillusiun ch'il CNSN duai daventar la victima dals plans da spargn sin plaun federal.
Il cussegl federal ha stimà ils custs d'investiziun per il Center naziunal da sports da naiv Lai a 60 fin 80 milliuns francs, ils custs da gestiun a var 10 fin 15 milliuns francs per onn. Il chantun è stà pront da pajar 10 milliuns francs als custs d'investiziun. Na da cumparegliar per exempel cun ils custs per manar tras gieus olimpics. Ultra da quai fissan las investiziuns en in CNSN da lunga durada e cleramain pli persistentas. Quellas vegnan dabun directamain al sport indigen da massa e d'elita ed a la giuventetgna. Tar l'accessibladad per il traffic stuess vegnir preferì il traffic public. Da quai profitass puspè la populaziun da tut la regiun. Investiziuns secundaras, cun las qualas i po vegnir fatg quint, portan ina gronda valurisaziun sur onns ed er sur la regiun ora. Ultra da quai ha il chantun en maun da planisar e da realisar en moda ecologica intervenziuns en la natira. In tal center simplifitgass la finala er da dar susta a bleras occurrenzas da sport naziunalas ed internaziunalas periodicas sco il final da la cuppa mundiala da skis u la Tour de Ski.
La fracziun da la PS vesa blers avantatgs en in Center naziunal da sports da naiv. Ella pretenda per quai da la regenza da preschentar variantas, co ch'in tal project pudess vegnir realisà e manà dal chantun er senza u cun ina participaziun minimala da la confederaziun. La participaziun e/u la collavuraziun cun federaziuns da sport e cun persunas privatas sto en quest connex vegnir resguardada.
Cuira, ils 13 da zercladur 2016
Degiacomi, Atanes, Baselgia-Brunner, Bucher-Brini, Cahenzli-Philipp, Caviezel (Cuira), Gartmann-Albin, Locher Benguerel, Monigatti, Noi-Togni, Perl, Peyer, Pfenninger, Pult, Thöny